6
Kaswan Dana Ni ĀPO Israel
1 Adngeyen nyo batahen ni ĀPO a maikontra do Israel!
“Maytēnek ka kan irasonan mo darom kwaya tan saksyan dan tokotokon
kan siraw paytoytokonanaya tan adngeyen da an āngo ibahey mo.”
2 Inyo a tokotokon, adngeyen nyo daromaya ni ĀPO!
Aran inyo a abos pandan a pondasyon no lōbongaya, mangadngey kamo,
ta myan darom ni ĀPO dyirad tawotawo na.
On, kaswan dana ni ĀPO Israel.
3 Binata ni ĀPO a kāna, “Inyo a tawotawo ko, āngo pinarin ko dyinyo?
Maypāngo a nayparin ako a rahmet nyo? Atbayen nyo yaken!
4 Inihtot koynyo a yapo do Egipto,
kan insalākan koynyo do nakatagabwan nyo.
Tinoboy ko sa Moyses,
Aaron kan Miriam a nangipangōlo dyinyo.
5 Inyo a tawotawo ko, nakmen nyo pa
an maypāngo pangta a nakaabay dyinyo ni Balak a āri no Moab,
kan an maypāngo nakabindisyon dyinyo ni Balaam a pōtot ni Beor.
Nakmen nyo paw nakapanakey nyowaw a yapo do Sittim a komwan do Gilgal
tan matonngan nyo an āngo saw malinteg a kaparin ni ĀPO.”
No Iyahes No Israel Kan Iyaw Atbay Ni ĀPO
6 “Āngo iyangay ko di ĀPO
anchan maydogod ako do salapen matan-ok a Dyos?
Mapanaybi akori so masosohan a dāton do salapen na
a apagtawen a orbon bāka?
7 Rawaten paro ni ĀPO an manoroh ako so rinibo a mahahakay a karniro,
mana asa poho a ribo a oksong no moyog a lana no olibo?
Idāton kori iyaw matoneng a anak ko a pagbāyad so kasokir ko,
iya a asi no inawan ko para do gatos no pahad ko?
8 Namna, inbahey narana dyimo, imo a tawo, an āngo maganay,
kan āngo chakey ni ĀPO dyimo.
Sira abawriw nya: kapamarin so nainkalintegan, kadaw so kāsi,
kan maybibyay a sipapakombaba do salapen no Dyos?”
No Gatos Kan Dōsa No Israel
9 “Adngeyen nyo! Manawag si ĀPO so tawotawo do syodadaya!
No masīrib, myan so kāmo do ngaran ĀPO.
Annadan nyo, ta īto dana iyaw naikeddeng a dōsa nyo.
10 Mawayakan ko paro tawo saw a maywam do marahet
a napno so kinabaknang do bahabahay da a yapo do kosit da?
Nonolay ko paro saw mangosaraw so dya kosto a pagkilwan
a taywara ipsok ko?
11 Pakawanen ko paro tawo a kōrang so kapagtimbang
kan kosit so pagkilwan?
12 Siraw babaknang mwaya, ki taywara sa so karanggas.
Siraw omyanaya dyimo, ki dān daw mabayataw
kan sabong no rida da.
13 Dawa, isagāna ko kadōsa mo,
kan rohnwan koynyo a rarayawen a maynamot do gatogatos mo.
14 Koman kanchi, ki mabsoy kaba.
Nāw monchi a saraāwen.
Mangapya kanchi, ki abaw makpeh mo,
ta tabon chinpeh mo, rarayawen konchi do gobat.
15 Maymoha kanchi, ki imo abanchiw magāpit.
Mamis kanchis asi no olibo, ki imo abanchiw mangosar so lana na.
Mamitos kanchi so ōbas, ki imo abanchiw minom so palek na.
16 Maparin saw nyaya, ta tinongpal mo saw linteg ni Āri Omri
kan tabo kaparin saw no kamanganakan Āri Ahab,
kan innonotan mo dadakay da.
Dawa, iparawat konchimo do kararayawan,
kan siraw omyanaya dyimo, oyawen da sanchi,
kan iroromen danchimo no nasnasyon.”