14
Okomen Nyo Abaw Kakteh Nyo do Kapanganohed
(1 Kor. 6:12-13; 8:1-13; 10:23-33)
1 Nya paw ibahey ko dyinyo a masisīta a parinen nyo: Rawaten nyo saw tawotawo saw a mawnged pa so kapakaāwat di Kristo. Ki nya abaw pachisogalan nyo dyira maynamot do katarekayan kapangtokto da do kapangtokto nyo.
2 Ta kaspangarigan, myan manganohed a maparin na kanen aran āngo. Bahes nabad dēkeyaw so kapakaāwat, ta rakarakanen lang mākan na.
3 No makaparin a koman so aran āngo, dyi pakono a nawriw paynamotan na a mangoyaw so dyaw a makakan so mākan na. Masaw do rakarakanenaw lang so mākan, dyi na pakono a okomen komanaw so aran āngo maynamot ta rinawat dana no Dyos nawri a tawo.
4 Ta sino ka kono, ta dawa, a mangokom so tobotoboyen matarek? Machita a iyaw āmo naw a si Jesos, ki iyaw mangikeddeng sya an iyaw pinarin naw, ki maganay mana engga. Ki syimpri ikeddeng nanchi a maganay, maynamot ta pagballīgyen nanchi ni Āpo na a mamarin so kosto.
5 Asa pa, myan saw makabata a masisīta kono kadwan saw a araw. Ki myan saw matarek a makabata a kon da, “Wā! Taywaran matatarek araw a mayeyengay sa tabo?” Dyi ta pakono a magmangamanga a maynamot lang do akmayay dedeng, basbāli a machita a mangtokto ta a maganay do bokbōkod ta a aktokto.
6 On, no tawowaw a mangdāg so asa karaw, ki parinen na a maynamot do kapagdāyaw na di Āpo Dyos. Masaw tawowaw a abos dāg do aran āngo a mākan a maynamot ta magyāman di Āpo Dyos do katatarek no mākan na. As komwan do arwaw so dāgen a kanen, ki alit na magyāman di Āpo Dyos an myan ibodek na.
7 Ta do kabibyay taya, ki machita a iyabaw pagsīrbyan taw chakeyaw no inawan ta, an dya si Kristo pakono pagsīrbyan ta. As dawa, do kapaybibyay ta mana pakadimanan ta, tongpalen ta pakono a tabo chakey na.
8 Ta do tabo a kayayan kabibyay ta do hapotayan tana mana aran do kadiman ta, ki pagdayāwan ta pakono si Āpo Jesos. As dawa, aran mabyay ta mana madiman ta, ki alit na dyira na yaten.
9 Ta nawriw naynamotan no nakadiman kan nakapagōngaraw ni Kristo, tan komwan, ki iya danaw Āpo dan sibibyay kan siraw nadiman dana.
10 Ki an inyo dana sichangori, āngo ta okomen nyo kakteh nyo di Kristo? Mana, āngo ta pachimadēkeyan nyo? Komwan taba ah, ta abanchiw maitayo ta anchan maytēnek ta a tabo do salapen no Dyos, as kan okomen na yaten a tabo.
11 Ta akmas naitolasaw do Masantwan a Tolas a binata no Dyos a kāna,
“Yaken a myan so abos pandan a byay, ki ikari ko
a sigorādo a maydogod sanchi a tabo tawotawo do salapen ko,
as ipodno danchi a tabo a yaken Dyos da.”
12 Dawa, somalap tanchi a tabo a katakatayisa do salapen no Dyos a mangatbay so tabo pinarin ta do lōbongaya.
Dyi Nyo Pakono a Asdayen Kakteh Nyo
13 As dawa, dyi ta pakono a tongtongen mapagatos, basbāli a ihawa ta pakono tan dya yaten pakayapwan kapenpenan mana pakachichadan no kakakteh ta saw do kapanganohed.
14 Ta maynamot do kapachasa ko di Āpo Jesos, anohdan ko a aba polos kapagdwadwa ko a abaw mākan a malapos mana mapaygatos. Ki an iktokto no asa tawo a malapos, syimpri, malapos dya.
15 An napaynyinan nyo kakteh nyo do kaipapati nyo a koman so dāgen na, adaw abaw inpaboya nyo dya. Samna! Maynamot lang do kanen, dyi pakono a nawriw irārayaw nyo so kapanganohed no kakakteh nyo ah! Ta naknakmen nyo pakono a nadiman si Kristo do kros tan maisalākan nawri a tawo.
16 Dawa, ihawa nyo, ta āngonchan marahet pakaistoryaan hahawen nyo saw a kaparin nyo a maganay.
17 Ta iyaw chakey no Dyos do pagāryan na, ki iyabaw maynamot do kanen kan inomen. Ta no chakey na, ki kalinteg, kapagtotōnos, kapagkakapya, kan no kasoyot a intoroh no Ispirito Santo.
18 No komwan so kapagsīrbi di Kristo, ki mahwahok dyaw Dyos, kan myan dyaw dāyaw a yapo do tawo.
19 As dawa, nāw ta parinen siraw makaitorohaw so kapagkakapya kan siraw makasidong saw a mapayit do katakatayisa dyaten.
20 Pirwahen ko na a ibahey dyinyo a dyi nyo pakono a rārayawen pinarin no Dyos a maynamot do kanen. Naon, maparin a kanen aran āngo a makan, ki marahet a koman kamo an nawriw pakayapwan kakteh nyo a maygatos.
21 No chakey na batahen, ki iyaw nya: Maganaganay dana an dyi kamo na michan so karni mana minom so palek mana parinen aran āngo a makaitoroh so kapaygatos no kakteh nyo.
22 As dawa, tongpalen nyo nyaya a kapanganohed nyo a sitatalna do salapen ni Āpo Dyos, as kan paysawasawat nyo aba do kapayngay nyo a tawo. Ta magāsat tawo a dya pagatosen no mismo na pangtokwan do kanāw na mamarin so chakey no Dyos.
23 Ki no tawo a naycharwa so kapangtokto a maynamot do dāgen naw a kanen, as pilpiliten naw inawan na a koman sya, makagatos dana do Dyos, ta maitōnos aba do mismo naw a kapanganohed. On, ta aran āngo a dya maitōnos do kapanganohed, ki gatos.