15
No Inawan Nyo Aba Lang Iktokto Nyo
(Gal. 6:2-5)
1 Sichangori, yaten a mararahem danas kapakaāwat di Kristo, machita anōsan ta pakono sa a sidongan mababaw saw so kapakaāwat. Nawri abaw iktokto taw inawan ta lang.
2 On, nya dana pakono iktokto no katakatayisa dyaten, iyaw kapyan kan kasoyotan no kakakteh ta tan maypayit kan maypaganay sa do kapanganohed da.
3 Ta aran si Kristo, ki nawri abaw iniktokto naw bōkod na kaganayan. Ta akmas naitolasaw do Masantwan a Tolas a kāna, “Yaken naybadiw a nangayan kapang-oyaw daw dyimo mo Āpo Dyos.”
4 Kawayakan nyo aba a tabo naitolasaw do Masantwan a Tolas, ta naitolas sa tan myan pachinanawan ta. Ta maynamot do chirinaya no Dyos, myan pakahwahokan ta, kan makaibtor ta do lidyalidyat ta saya tan myan hahawen ta do hanyit.
5 On, si Āpo Dyos pakayapwan ānos ta a magibtor so lidyat, as kan iya paw pakayapwan ahwahok ta do kayan ta madama a malidyatan. Iya pakono manoroh dyinyo so kapagtotōnos nyo do kawnot nyo so pagtolādanaya a pinarin ni Kristo Jesos.
6 Tan komwan, ki māsa kamo do kapangtokto tan akma danay asaw bosis nyo a mangidaydāyaw so Dyos a Āmang ni Āpo Jeso-Kristo.
No Maganay a Dāmag Dyirad Dya-Jodyo
7 As dawa, kakakteh a akmas nakarawataw ni Kristo dyinyo, komwan kamo pakono a maysinrarawat do katakatayisa dyinyo tan maidāyaw dana si Āpo Dyos.
8 Ta ibahey ko dyinyo nyaya: Nayparin si Kristo a tobotoboyen ni Āpo Dyos a para dyirad Jodyo saw tan maipaboya na a mapagtalkan si Āpo Dyos a mangtongpal so kari naw dyirad kapoonan da saw
9 kan tan magdaydāyaw saw Dya-Jodyo do Dyos a maynamot do kāsi naya dyira. Ta akmas naitolasaw do Masantwan a Tolas a kāna,
“Dawa, idaydāyaw konchimo dyirad Dya-Jodyo.
Ikanta konchiw kapagdaydāyaw ko do ngaran mo.”
10 Myan paw naitolas do Masantwan a Tolas a kāna,
“Inyo a Dya-Jodyo, ki machipagragsak kamo pakono
dyirad tawotawo saya a pinidi no Dyos.”
11 Myan paw naitolas a kāna,
“Dayāwen nyo pakono si Āpo, inyo a tabo a Dya-Jodyo.
On, magdaydāyaw kamo a tabo do Dyos.”
12 Binata pa ni Isayas,
“Myan anchiw mangay a yapo do kapotōtan Jesse.
Iyanchiw maytēnek a mangitoray siras Dya-Jodyo,
kan iya panchiw yanan namnāma da.”
13 Sichangori, iya pakono Dyosaya a pakayapwan namnāma tayaw omapno dyinyo so soyot kan kaydamnayan no kapangtokto a maynamot do kapanganohed nyod Kristo. On, parinen na pakono dyinyo nyaya tan maypaypangay kapanghahaw nyowaya a maynamot do panakabalin Ispirito Santo.
Iyaw Naynamotan Pablo a Natored a Naytolas
14 Sichangori, an maynamot dyinyo a kakakteh ko di Kristo, sigorādo ako a maganay danaw dadakay nyo kan myan dyinyo rakoh a kapakaāwat a maynamot do oyod. On, chapatak ko na a maparin kamo na a mamagbaga so katakatayisa dyinyo.
15 Ki aran komwan, ki alit na matored akpad tolas kwaya dyinyo tan dyi nyo a kawayakan nanawowaya. Oyod a matored ako, ta si Āpo Dyos a mismo nanoroh dyaken so parābor na a nayparin a asa a apostol,
16 tan pinayparin na yaken a tobotoboyen ni Kristo Jesos tan mangay ako a mangikasaba dyirad Dya-Jodyo so Maganay a Dāmag a yapo do Dyos. On, maytarabāko ako a akmay asa pādi a mangiparawat do Dyos siras Dya-Jodyo tan maynamot do panakabalin no Ispirito Santo, ki mayparin sa a makadadaw kan masantwan a dāton.
17 As dawa, maynamot do kapachasa kwaya di Kristo Jesos, maparin ko a itangsit rebbeng kwaya a magsīrbi a para do Dyos.
18 Matored akwaba a magpangas, malaksid do inpaparin naya ni Kristo dyaken a mapawnot siras Dya-Jodyo a manganohed do Dyos a maynamot do nakaosar na dyaken a naychirin kan namarin sira syay.
19 On, maynamot do panakabalin no Ispirito Santo, ki inpaparin na sa dyaken āro saw a makaskasdāaw a pakaboyan kan milagro. No pagtongpalan na, ki nāw ko a ikaskasabaw Maganayaya a Dāmag a maynamot di Kristo a somniknan do Jerosalem, kan hinanyib ko a inaktaktas a nandad mateng saw a loglogar da do Iliriko.
20 Ta sīgod a inplāno ko a ikasaba ko Maganayaya a Dāmag do yanan daw no dyi pa nakadngey so maynamot di Kristo tan dyi kwa sokoten dāyaw da no nanmanma saya kan yaken a nangnanawo.
21 Ta akmas naitolasaw do Masantwan a Tolas a kāna,
“Matonngan danchin dyi pa saw a nakadngey so maynamot dya,
kan makaāwat sanchiw dyi pa saw a nakadngey.”
No Plano Ni Pablo a Magsarongkar do Roma
(1 Kor. 16:1-4; 2 Kor. 8:16-9:5)
22 On, maynamot do kapaytarabāko kwaya, iyaw nyayaw naynamotanaya a masanyib nakabalabalay ko do kangay ko dyinyo.
23 Ki changori, maynamot ta apabaw logar dya a dyi ko pa nagpasyaran a nangikasabaan, as kan maynamot ta papira dana katawen a am-āmang danaya chakey koynyo a sarongkaran, changori danaw hahawen ko a katohod na.
24 On, inplanplāno ko somibah a magsarongkar dyinyo daw do kangay kwaya do Ispanya, as kan an makailiw ako nas dēkey dyinyo, ki mapasidong akonchi dyinyo do kakwan kwaw do Ispanya.
25 Ki manmak pa a mangay do Jerosalem a mangyangay so sidong dyirad tawotawo saw no Dyos daw.
26 Ta siraw iglisya saw do Masedonya kan Akaya, ki siaadaw sa a nanoroh so sidong da a kwarta dyirad mapopobri saw a manganohed do Jerosalem.
27 Iyaw nawri a kasidong da, ki yapo do bōkod da a pangtoktwan, as kan chinasoyot daw nanoroh. Ta no kaoyodan na, ki kosto nyaya pinariparin da, ta akmay nanakem daw ōtang daw a kapagyāman dyira. Ta maynamot do kapanganohed dan Jodyo saw do Jerosalem, nairāman sa a Dya-Jodyo do naispiritwanaya a bindisyon no Dyos. Dawa, iyaw warawara daw pamahemahes da.
28 Anchan tayoka ko na iparawat dyiraw tabwaya a bidang no kwarta a or-or dan kakakteh saya a nawriw ibidang ko a asi no kapanganohed da, nawri dananchiw kayam ko a mangay do Ispanya. Do dawrinchiw kasibah ko na dyinyo do Roma.
29 Chapatak ko a anchan mangay ako, ki mabindisyonan tanchi a yapo do somawasaway saya a bindisyon ni Kristo.
30 Kakakteh, maynamot di Āpo Jeso-Kristo kan adaw a intoroh no Ispirito Santo dyinyo, akdakdawen ko a machipangdidiw kamo dyaken do kanāw nyo a maydaydasal do Dyos so sidong na dyaken.
31 On, mangdakdaw kamo pakono do Dyos a maisalākan ako dyirad dyi saw a manganohed do Jodya. Akdawen nyo pa a rawaten da pakono no tawotawo saw a manganohed do Jerosalem, iyaw kapagsīrbi kwaya dyira.
32 On, paydasal nyo pakono yaken tan an ipalōbos ni Āpo Dyos, masoyot akonchi do kawara ko dyinyo as kan tan mahwahok akonchi a maynamot do kapagsarongkar ko dyinyo.
33 Myan pakono a tabo dyinyo Dyosaya a manoroh so kaydamnayan no kapangtokto. Amen.