10
No Kari No Dyos a Kaisalākan
1 Akdawen nyo di ĀPO chimoy do chimpo no rayon.
Ta si ĀPO, iyaw mamarin so konem.
Iya, ki manoroh so chimoy do tawotawo
kan mohamoha do bengkag a para do katayitayisa.
2 Mangalillaw saw didyosen.
Siraw mangarobōob, mangparmata sas bayataw.
Mangibahey sa so tayēnep da sa a palso.
Manoroh sas pangahwahok a abos sirsirbi.
Dawa, mapawaw saw tawotawo akmay karniro.
Maidadanes sa do kabo no pastor da.
3 “Somdeb kasoli ko dyirad dawri a sinpapastor,
kan dosāen ko saw nawri a magtotoray.
Ta yaken a ĀPO a Manakabalin, ki aywanan ko arban ko a siraw tawotawo no Joda.
Payparinen ko sanchi a akmas mabīleg saw a kabalyo do paggogobatan.
4 Yaponchi do Joda iyaw bato a panoli.
Yaponchi daw parey no tolda,
yapo pa dyaw bai a para gobat,
kan kāda magtoray.
5 Mayparin sanchi a mabibīleg a tawotawo
a mangpitapita siras kabōsor da do hota do kalsāda.
Maynamot ta si ĀPO, ki myan dyira,
machigobat sanchi kan paksyaten da sanchiw kabōsor daw a nakakabalyo.
6 “Payiten konchiw tawotawo no Joda,
kan isalākan ko sanchiw Israelita
Pabidyen ko sanchi a isabat
maynamot ta chāsi ko sa.
Akma ko na sanchiw dya inpoha,
ta yaken ĀPO a Dyos da as kan atbayen ko dasal da.
7 Siranchiw tawotawo no Israel, ki mayit sanchi a akmay soldādo,
kan masoyot sanchi a akmas tawotawo saw a nakaynom so palek.
Maboya danchin anak da sayaw nya kan chasoyot da;
magragsak sanchi maynamot do pinarin naya ni ĀPO.
8 “Tawagan ko sanchi,
as kakpeh ko sira.
Sigorādo a isalākan ko sanchi,
as kan pārohen ko sanchi a akmas sigodaw a kāro da.
9 Aran pinaychawpit ko sa do nasnasyon saya,
alit na, manakem da yaken do mateng saya tana.
Sira kan anak da saw, ki makalāsat sanchi,
as kan maybidi sanchi.
10 Isabat ko sanchi a mirwa a yapo do Egipto kan do Asirya,
kan paomyanen ko na sanchi do bokod da tana.
On, pagyanen ko sanchi do tana a Gilead kan do Lebanon
mandad kapnon intīro a tana do tawotawo ko.
11 Anchan mamtang sa do tāw no lidyat,
yaken a ĀPO abāken konchiw kelsang saw no tāw,
as kan mayachan anchiw kensad naw no oksong a Nile.
Iyaw pangas no Asirya, ki mapabodis anchi
as mabonchi no Egipto kapagtoray na.
12 Payiten ko sanchiw tawotawo ko.
Magdāyaw kan magtongpal sanchi dyaken.”
Nyaw inchirin ni ĀPO.