11
No Kaābak Dan Maranggas a Magtoray
1 Iwangan mo saw pantaw mo, mo Lebanon
tan temtemen san apoy kayokayo mo a sidro.
2 Magdongdong-aw kamo, inyo a kayokayo a saleng,
ta no kayokayo a sidro, ki nalba dana sa.
On, siraw madayag saw a kayokayo, ki narārayaw dana sa.
Magdongdong-aw kamo, inyo a mapapateg a kayokayo a logo do tana a Basan,
ta nakayowan danaw matokpohaw a kakahasan!
3 Adngeyen nyo maynyinaya a katanyis dan magpaspastor,
ta nabo danaw mabaknang a pasto da.
Adngeyen nyo ngernger dayan lion,
ta narārayaw danaw bongbongro saw do payahosongan do Jordan.
No Dadwa Sa Magpaspastor
4 Nyaw batahen ni ĀPO a Dyos ko dyaken a kāna, “Mayparin ka pastor dan arban saya a nairanta dana maparti.
5 Partyen da san gomātangaw kan madōsa saba. Siraw akin dyiraw a mangilāko sira batahen da a kon da, ‘Madaydāyaw si ĀPO, mabaknang kami na!’ Aran siraw mismo a mangipastor dyira, chināsi da saba.
6 Apabaw kāsi ko so tawotawo sa do tanaya. Paysin-iipsoken ko saw tawotawo, as ipaitoray ko sa dyirad magtotoray da. Rārayawen danchiw tana no nya sa magtotoray, kan isalākan ko saba yapo do kakamay dan mangpalidyat saya dyira.”
7 Siraw gomatgātangaw kan maglaklāko so karniro, ki tangdanan da yaken a si Sakaryas, kan nayparin ako a pastor dan karniro saw a nairanta a maparti. Nanghap ako so dadwa sarokod. Iyaw asaw, ki pinangaranan ko so Parābor. As iyaw asaw, ki Tōnos, kan inaywanan ko arbanaw.
8 Do irahem no asa kabohan, pinaksyat ko saw tatdo saw a magpaspastor. Chinaōma ko na sa, kan inipsok da pa yaken.
9 Dawa, nyaw binata ko dyira a kon ko, “Yaken pabaw mangipastor dyinyo. An myan madiman, bāli. An myan marārayaw, bāli. An myan makalāsat nolay ko sa maysintatabtab.”
10 Sinpangan na, inhap ko sarokod kwaw a pinangaranan ko so Parābor, as nakapotot ko sya tan pangipaboyan ko sya a rārayawen ni Āpo nakapachitōlag na dyirad tabo nasnasyon saw.
11 Dawa, do dāwri a araw, naibabāwi danaw nakapachitōlag kwaw dyira. Siraw gomatgātang saw kan maglaklāko so karniro, ki chiniban da yaken, kan chinapatak da a chirin a tabo ni ĀPO nyaya.
12 Sinpangan na, binata ko dyira a kon ko, “An kosto kan nainkalintegan dyinyo, itoroh nyo dyaken tangdan ko. Ki an engga, kapyahen nyo na.” Dawa, tinangdanan da yaken so tatdo a poho a plata a pirak.
13 Binata ni ĀPO dyaken a kāna, “Ipoha mo tatdwaya poho a plata a pirak do pangapyanaw so kwarta do Timplo.” Dawa, iyaw bata daya kakoskostwan na a bāyad ko inhap ko, as nakaipoha ko sya do pangapyanaw so kwarta do Timplo.
14 Sinpangan na, pinotot ko chadadwa naw a sarokod a napangaranan so Tōnos tan pangipaboyan ko sya a narārayaw tōnos no kapaylipos no Joda kan Israel.
15 Katayoka na, binata dana ni ĀPO dyaken a kāna, “Changori, mirwa ka na magpaspastor, ki mayparin ka akmas sīgodaw a abo so sirsīrbi a pastor.
16 Ta mapatnek akonchi do dya tana so asa magpaspastor so karniro ko a manginonolay sira do pakarārayawan da, mana dya maychichwas so orbon, mana dya mangāgas so mabigaran, mana dya mamakan so masalon-at. Basbāli a michan siras matatabaw, as kakso nas koko daw tan masitsitan na tabo asi daw.
17 “Kapakāsi pa no nawri
a abos sirsīrbi a pastor a mangaro so arban na!
Matabtaban pakono tachay na kan kawanan a mata na.
Magsingkol pakono intīro a tachay na,
kan komplito pakono a bolding kawanan a mata na!”