4
Nebukadnesar nê me kêtu luagêcŋa
1 Kiŋ Nebukadnesar nê biŋ tonec êndêŋ lau to tenteŋlatu ma lau aweŋ teŋ-aweŋ teŋ pebeŋ, taŋ sêmoa nom ŋagamêŋ samob naŋ, gebe “Biŋmalô ênam amac auc.
2 Aê gabe janac miŋ gêŋsêga to gêŋtalô samob, taŋ Anôtô Lôlôc Ŋatau tau gêgôm gêdêŋ aê naŋ gebe
3 “Nê gêŋsêga kaiŋ teŋ
ma nê gêŋtalô kapôêŋanô.
Nê gamêŋ kiŋŋa kêtu gamêŋ gêmoa teŋgeŋŋa teŋ
ma nê ŋagôliŋ gêc gôlôac to gôlôac ŋêŋgeŋ gêja.
4 “Aê Nebukadnesar kalêwaŋ tauc gaêc ŋoc andu ma kamoasiŋ tauc gamoa ŋoc andu kapôêŋ.
5 Gêdêŋ taŋ aê gaêc mê naŋ, galic gêŋ teŋ kêtakê aê e katuc gêjaŋa. Ma gêŋ ŋakatu, taŋ galic gêc ŋoc kauclêlôm naŋ, kêlênsôŋ aê ŋanôgeŋ.
6 Kêtu tonaŋŋa aê kajatu gebe lau mêtê samob aŋga Babilon mêŋsêkô aê laŋôcnêm gebe sêwa mê tau ŋam sa êndêŋ aê.
7 Go beŋwaga to lau mectomaŋ ma lau Kaldea to sêpuc-utitalata-ŋamwaga samob sêsô sêmêŋ ma aê gajac miŋ mê tau gêdêŋ êsêac, mago sêwa ŋam sa gêdêŋ aê kêtôm atom.
8 Kêtu ŋamu Daniel, taŋ sê aêŋoc anôtô Beltesasar nê ŋaê kêpi eŋ ma anôtôi dabuŋ nêŋ ŋalau gêjam eŋ auc naŋ, mêŋkêkô aê laŋôcnêm ma gajac miŋ mê tau gêdêŋ eŋ amboac tonec gebe
9 O Beltesasar, lau mêtê samob nêŋ laumata aôm, aê kajala gebe anôtôi dabuŋ nêŋ ŋalau gêjam aôm aucgoc, tec gêŋ ŋalêlômŋa teŋ kêsiŋ tau gêdêŋ aôm atom. Mê tec galic nec, ôŋô ma ôwa ŋam sa êndêŋ aê.
10 “Ŋakatu taŋ galic gêc ŋoc kauclê-lômgeŋ gêdêŋ taŋ gaêc mê naŋ, amboac tonec gebe Aê galic ka teŋ kêkô nom ŋaluŋgeŋ, ma ka tau kêpi e baliŋanô.
11 Ka tau kêtôp e kêtu kapôêŋ to ŋajaŋa kêsa ma ŋatêpôê kêsuŋ sa kêpi e jagêdêŋ undambê. Ma lau nom ŋagamêŋ sêlic ka tau.
12 Ŋalauŋ ŋawawa ŋajam ma gêjam ŋanô taêsam ŋasec. Kêtôm gebe lau samob sêniŋ ka tau ŋanô e gêôc êsêac tôŋ. Bôc to gêŋ saleŋŋa sêc ŋaajuŋlabu ma moc sêjam sac sêŋgôŋ ŋalaka ma gêŋ mateŋ jali samob seŋ ŋanô tau.
13 “Aê taêc gêjam ŋakatu, taŋ galic su naŋ, gamoa ma galic gebe aŋela mata jali to kêsala gêŋŋa teŋ kêsêp aŋga undambê gêmêŋ.
14 Eŋ kêpuc awa sageŋ ma kêsôm gebe ‘Asap ka tau tulu ma asapu ŋalaka su to ansêlô ŋalauŋ ênaŋa ma apalip ŋanô êliŋ-êliŋ êna. Ma ansoc bôc aŋga ajuŋlabu ma moc aŋga ŋalaka sêc su.
15 Mago andec ŋakatuc to ŋawakac gacgeŋ êkô nom ŋalêlôm. Kapoacwalô ki to kopa endeŋ eŋ tôŋ êkô gêgwaŋ ŋamêdôb kôm ŋa ŋalêlôm. Eŋ êliŋ maniŋ umboŋŋa to êniŋ gêgwaŋ êwiŋ bôc.
16 Nê kauc ŋamalacŋa êmbacnê ma bôc nêŋ kauc naêjô su. Eŋ êmoa amboac tonaŋ e têm ŋasawa 7 êmbacnê.
17 Biŋ tonaŋ aŋela dabuŋ sêjac mata e kêtu tôŋ ma sêsôm lasê gebe lau mateŋ jali sêjala gebe Lôlôc Ŋatau kêtu ŋamalacnêŋ gamêŋ ŋatau ma gêjac sam gamêŋ kêtôm eŋ taê gêjam ma oc êkêŋ êndêŋ lau ŋasec teŋ sêwê kaiŋ.’
18 Aê kiŋ Nebukadnesar galic mê tau tonaŋ. Ma aôm Beltesasar galoc ôwa mê tau ŋam sa gebe lau mêtê ŋoc gamêŋ samobŋa sêwa mê tonaŋ ŋam sa têtôm atom. Aôm oc ôtôm gebe anôtôi nêŋ ŋalau gêmoa gêwiŋ aôm.”
Daniel gêwa mê tau ŋam sa
19 Daniel taŋ nê ŋaê teŋ gebe Beltesasar naŋ, kêtakê sauŋ atom e gêjac nê lênô auc ŋasawa ec ŋêŋgeŋ. Mago kiŋ tau kêsôm gebe “Beltesasar, mê tau to ŋam êŋgôm aôm taêm dani taôm atom.” Beltesasar gêjô eŋ awa gebe “O ŋoc ŋatau, aê gabe mê tau êkanôŋ êsêac, taŋ sedec aôm naŋ, ma êkanôŋ aômnêm ŋacjo acgommaŋ.
20 O kiŋ, ka taŋ gôlic kêtôp e ŋajaŋa kêsa ma ŋatêpôê kêsuŋ kêpi e jagêdêŋ undambê ma gêu laeŋ su gêja,
21 ma ŋalauŋ ŋawawa ŋajam ma gêjam ŋanô e ŋalaka sêlêlib laŋgwageŋ ma gêŋ samob seŋ ŋanô tau, ma bôc to gêŋ saleŋŋa sêc ŋaajuŋlabu ma moc sêjam sac sêŋgôŋ ŋalaka naŋ.
22 “O kiŋ, ka tau tonaŋ aôm taôm. Aôm kôtu kapôêŋ ma ŋajaŋa kêsa. Nem ŋaclai kesewec e jagêdêŋ undambê. Nêm waem gêjam nom ŋagamêŋ samob auc.
23 Aôm kiŋ, gôlic aŋela dabuŋ kêsêp gêmêŋ ma kêsôm gebe ‘Asap ka tonaŋ tulu ma anseŋ su, mago ŋakatuc to ŋawakac andec gacgeŋ êkô nom ŋalêlôm. Kapoacwalô ki to kopa endeŋ eŋ tôŋ ênêc gêgwaŋ ŋamêdôb kômŋa ŋalêlôm. Eŋ êliŋ maniŋ umboŋŋa to êniŋ gêgwaŋ êwiŋ bôc e têm ŋasawa 7 êmbacnê.’
24 “Biŋ tau ŋam amboac tonec. O kiŋ, Lôlôc Ŋatau kêmasaŋ biŋ, taŋ kêkanôŋ aôm naŋ.
25 Eŋ oc êtiŋ aôm su aŋga ŋamalacnêŋ naômoa ôwiŋ bôc saleŋŋa ma ôniŋ gêgwaŋ amboac bulimakao ma nop ênôm aôm ônêc awê e têm ŋasawa 7 êmbacnê e nêm kauc êsa acgom, gebe Lôlôc Ŋatau kêtu ŋamalacnêŋ ŋatau ma gêjac sam gamêŋ kêtôm eŋ tau taê gêjam.
26 Ma jatu, taŋ kêsa gebe sendec ka ŋakatuc to ŋawakac gacgeŋ êkôŋa naŋ tonaŋ gêwa sa gebe êndêŋ taŋ aôm ôjala Anôtô, taŋ gêjam gôliŋ nom ŋagamêŋ samob naŋ, aôm oc ôtu kiŋ êtiam.
27 O kiŋ, kêtu tonaŋŋa aê gabe janac biŋsu aôm gebe Ôŋgôm sec êtiam atom, ôsa lêŋ biŋgêdêŋŋa. Ônam lau ŋalêlôm sawaŋa sa ma taêm walô lau ŋasec. Talic acgom, oc ômoa ŋajam me masi.”
28 Biŋ samob tonaŋ ŋai ŋanô kêsa kêpi kiŋ Nebukadnesar.
29 Ajôŋ 12 gêjaŋa su acgom, go kiŋ kêsêlêŋ gêmoa nê andu kiŋŋa aŋga Babilon ŋasalôm tapa-tapa ŋaô.
30 Ma kiŋ awa gêôc tau gebe “Malac tau tonec Babilon kapôêŋ, taŋ ŋoc ŋaclai kêkwê sa kêtu ŋoc gamêŋ kiŋŋa ma kêkêŋ aê waec kiŋŋa kêtu tapa naŋ atom me.”
31 Biŋ taŋ kiŋ kêsôm kêsa naŋ, gêjac pep atom tageŋ ma awa teŋ kêsa aŋga undambê gêmêŋ gebe “O kiŋ Nebukadnesar, biŋ tonec kepeŋ aôm gebe gamêŋ tonec ŋagôliŋ kiŋŋa kêkac tau su aŋga aômnêm.
32 Lau oc têtiŋ aôm su aŋga ŋamalacnêŋ ma oc ômoa ôwiŋ bôc gabuŋ. Aôm oc ôniŋ gêgwaŋ amboac bulimakao e têm ŋasawa 7 êmbacnê acgom, go nêm kauc êsa ma ôjala gebe Lôlôc Ŋatau tau gêjam gôliŋ ŋamalacnêŋ gamêŋ kiŋŋa ma gêjac sam gamêŋ kêtôm eŋ tau taê gêjam.”
33 Ma biŋ tau gacgeŋ ŋanô kêsa kêpi Nebukadnesar. Lau têtiŋ eŋ su aŋga ŋamalacnêŋ ma eŋ geŋ gêgwaŋ amboac bulimakao, nop gênôm eŋ ma môkêlauŋ kêtu baliŋ kêtôm noniŋ ôlilu ma lêmakêku kêtu baliŋ kêtôm momboaŋ lêmakêku.
Nebukadnesar kêlambiŋ Anôtô
34 “Aê Nebukadnesar gamoa e têm tau gêbacnê acgom, go gaôc matocanô sa kêpi undambê ma ŋoc kauc kêsa kêtiam. Aê kalanem Lôlôc Ŋatau tau ma kalambiŋ to katoc eŋ, taŋ gêmoa teŋgeŋ to teŋgeŋ naŋ, sa gebe
Ênê gôliŋ oc ênêc teŋgeŋ
to ênê gamêŋ, taŋ gêjam gôliŋ naŋ, oc ênêc teŋgeŋ e gôlôac togôlôac ŋêŋgeŋ êna.
35 Lau nomŋa samob amboac gêŋôma
ma eŋ gêgôm kêtôm taê gêjam gêdêŋ lau undambêŋa ma gêdêŋ ŋamalac nomŋa amboac tonaŋgeŋ.
Ma ŋac teŋ kêtôm gebe êkô eŋ auc
me êtu kênac eŋ gebe ‘Aôm gôgôm asageŋ’ nec atom.
36 “Gêdêŋ têm tecênaŋgeŋ aêŋoc kauc ŋawa kêsa kêtiam ma ŋoc waec to ŋawasi amboac tonaŋgeŋ kêtu ŋoc gamêŋ ŋawaeŋa. Aêŋoc lau seŋeŋ to apômtaui sesom aê ma sêkêŋ aê katu kiŋ kêtiam ma ŋoc waec kêsa kêlêlêc gêmuŋŋa su.
37 Galoc aê, Nebukadnesar, gabe jalanem to jalambiŋ ma jatoc kiŋ undambêŋa sa gebe eŋ gêgôm nê gêŋ samob jakêtôm ma nê gôliŋ jagêdêŋ. Êsêac taŋ tetoc tauŋ sa naŋ, eŋ oc êkôniŋ êsêac tôŋ.”