21
Jesu jagêô lasê Jerusalem
(Mar 11:1-11; Luk 19:28-38; Joaŋ 12:12-19)
Ma gêdêŋ taŋ êsêac têdabiŋ Jerusalem jasêsa Betpage, taŋ gêc Lôckatêkwi naŋ, Jesu kêsakiŋ ŋacseŋom luagêc ma kêsôm gêdêŋ êsêagêc gebe “Agêc asêlêŋ apeŋ malac, taŋ gêc nêmŋa naŋ, ana ma gaôgeŋ andac doŋki têna teŋ sêkô tôŋ ma ŋalatu kêkô gêwiŋ, naŋ aŋgamboac su ma awê andêŋ aê amêŋ. Ŋac teŋ embe êsôm biŋ êndêŋ amagêc, naŋ agêc asôm gebe ‘Apômtau kêpô lêna geŋ tau’ ma oc êkêŋ gaôgeŋ êndêŋ amagêc.”
Biŋ tonaŋ kêsa gebe biŋ, taŋ propete kêsôm naŋ, êtu anô gebe
“Asôm êndêŋ Sion latuo gebe
Gôlicgac me, nêm kiŋ gêdêŋ aôm gêmêŋ,
ŋac malô kêpi jagêŋgôŋ doŋki
ma gêŋgôŋ bôc wabaŋa ŋalatu ŋaô.”
Ŋacseŋomagêc sêja jasêsôm kêtôm Jesu kêsakiŋ êsêagêc, sêwê doŋki têna to ŋalatu sêja jasêu nêŋ ŋakwê gêsac ma Jesu gêŋgôŋ ŋaô. Lau topom nêŋ taêsam sêja nêŋ ŋakwê gêc intêna, ma ŋagêdô, sêsapu kalauŋ mêŋsêja gêc intêna. Ma lau, taŋ sêwê topom-topom sêmuŋ to têdaguc naŋ, sêmôêc gebe “Osana êndêŋ Dawidnê Latu, alanem eŋ, naŋ gêmêŋ gêjam Apômtau laŋô. Osana êsa aŋga lôlôc.”
10 Ma gêdêŋ taŋ Jesu jagêô lasê Jerusalem naŋ, lau malacŋa samucgeŋ sêjam sêjô ma sêsôm gebe “Tônê asa.” 11 Go lau topom tonaŋ sêsôm gebe “Propete Jesu, taŋ aŋga Nasaret Galilaiaŋa naŋ, ŋac tau tonsc.”
Jesu kêjanda lau aŋga lôm dabuŋ
(Mar 11:15-19; Luk 19:45-48; Joaŋ 2:13-22)
12 Ma Jesu kêsô lôm dabuŋ jakêjanda lau-samob, taŋ têtulu gêŋ sêmoa lôm dabuŋ ŋalêlôm naŋ, sêsa awê sêja ma kêtiŋ lau sêjam-mone-gêjô-tauwaga nêŋ tebo to lau-têtulu-balôsiwaga nêŋ lêpôŋ piŋpoŋ. 13 Go kêsôm gêdêŋ êsêac gebe “Teto gêc gebe ‘Aêŋoc andu sêsam gebe andu mecŋa,’ mago amac agôm kêtu kêjaŋgowaganêŋ gêsuŋ.”
14 Ma mateŋpec to magiŋ kêsu dêdêŋ eŋ sêja ma gêgôm êsêac ôliŋ ŋajam kêsa aŋga lôm dabuŋ. 15 Lau dabuŋsêga to biŋsutau sêlic gêŋ kaiŋ teŋ, taŋ eŋ gêgôm naŋ, to ŋapalê, taŋ sêmôêc sêmoa lôm dabuŋ gebe “Osana êndêŋ Dawidnê Latu,” tec têtu môsi, 16 ma sêsôm gêdêŋ Jesu gebe “Biŋ tec êsêac sêsôm nec aôm gôŋô me.” Ma Jesu kêsôm gêdêŋ êsêac gebe “Aec, gaŋôgac. Ma bi ŋ tonec gebe ‘‘Aôm kômasaŋ lambiŋ kêsa ŋapalê sauŋ to gêŋ dedec aweŋsuŋ’ nec amac asam atom me.” 17 Ma gêwi êsêac siŋ kêsa aŋga malac gêja Betania ma gêc tônê.
Jesu kêpuc boa jambô
(Mar 11:12-14, 20-24)
18 Gêdêŋ bêbêcgeŋ Jesu gêmu gêja malac kêtiam e mo gêjô eŋ. 19 Ma gêlic jambô teŋ kêkô intêna, tec kêtu gasuc gêja e gêlic gêŋ teŋ atom, gêlic ŋalauŋ naômageŋ. Ma kêsôm gêdêŋ ka tau gebe “Aôm oc ônam ŋanô êtiam atom endeŋ tôŋgeŋ.” Ma jambô tau kêsêlic sep tageŋ. 20 Ma ŋacseŋomi sêlic e sêŋac lemeŋ ma sêsôm gebe “Amboac ondoc, tec jambô kêsêlic sep tageŋ nec.” 21 Tec Jesu gêjô êsêac aweŋ gebe “Biŋŋanô, aê jasôm êndêŋ amac gebe Embe akêŋ ôwiŋ ma têmtac lulu atomanô, oc aŋgôm gêŋ amboac tonaŋ api jambôgeŋ atom. Embe asôm êndêŋ lôc tonec gebe ‘Ômbuc taôm sa nau taôm ôsêp gwêc ôna,’ ma oc alic ŋanô êsa. 22 Ma gêŋ samob, taŋ amac ateŋ êsêp nêm mec ŋalêlôm embe akêŋ êwiŋ, oc atap ŋanô sa.”
Judawaga têtu kênac Jesunê ŋaclai ŋam
(Mar 11:27-33; Luk 20:1-8)
23 Jesu kêsô lôm dabuŋ gêja kêtiam jakêdôŋ lau. Tec lau dabuŋsêga to launêŋ laumata dêdêŋ eŋ sêja ma têtu kênac eŋ gebe “Aôm gôgôm gêŋ tonaŋ gôjam ŋaclai ondoc laŋô. Ma asa kêkêŋ ŋaclai tau gêdêŋ aôm.” 24 Jesu gêjô êsêac aweŋ gebe “Aê gabe jatu kênac biŋ teŋ êndêŋ amac amboac tonaŋ. Embe ajô ŋoc kênac, go aê Jasam ŋaclai, taŋ gêjam aê sa ma gagôm gêŋ tau naŋ, êndêŋ amac amboac tonaŋgeŋ. 25 Joaŋnê saŋgu aŋga ondoc, oc aŋga Anôtônê me aŋga ŋamalacnêŋ.” Ma Êsêac taêŋ gêjam gêc tauŋgeŋ gebe “Embe tasôm gebe aŋga Anôtônê, eŋ oc êsôm êndêŋ aêac gebe Ma amboac ondoc tec akêŋ gêwiŋ eŋ atom. 26 Ma embe tasôm gebe aŋga ŋamalacnêŋ, oc tatêc lau gebe samob sêlic Joaŋ kêtôm propete.” 27 Tec sêjô Jesu awa gebe “Aêac ajam kauc.” Ma eŋ kêsôm gêdêŋ êsêac gebe “Amboac tonaŋ aê jasôm ŋaclai, taŋ gêjam aê sa ma gagôm gêŋ tau naŋ, lasê êndêŋ amac atom amboac tonaŋgeŋ.
Biŋgôliŋ latuagêcnêŋ biŋ keso tauŋa
28 “Amac abe amboac ondoc. Ŋac teŋ latu luagêc sêŋgôŋ. Eŋ gêdêŋ ŋacsêga gêja ma kêsôm gebe ‘Latucenec, ocsalô ôna ônam kôm wainŋa.’ 29 Ŋac tau gêjô eŋ awa gebe ‘Apômtau, aêc.’ Mago gêja atom. 30 Go gêdêŋ ŋac sêu ŋ gêja ma kêsôm amboac tonaŋgeŋ gêdêŋ eŋ. Tec ŋac tau gêjô eŋ awa gebe ‘Aê gadec.’ E sauŋgeŋ, go taê gêjam tau tec gêja. 31 Ŋaclagêc tonaŋ nêŋ asa gêgôm tameŋinê biŋ kêtu tôŋ.” Ma êsêac sêsôm gebe “Ŋac sauŋ.” Jesu kêsôm gêdêŋ êsêac gebe “Biŋŋanô, aê jasôm êndêŋ amac gebe Teloŋ to mockaiŋo oc sêsô Anôtônê gamêŋ sêna sêmuŋ amac. 32 Joaŋ tec gêdêŋ amac gêmêŋ ma kêtôc biŋ, taŋ Anôtô kêjatu naŋ, gêdêŋ amac gebe andaŋguc, mago akêŋ gêwiŋ eŋ atom. Teloŋ to mockaiŋogeŋ tec sêkêŋ gêwiŋ eŋ. Amac tec alicgac, mago taêm gêjam taôm to akêŋ gêwiŋ eŋ atom.
Biŋgôliŋ kêpi kôm wainŋa to ŋagejobwaga
(Mar 12:1-12; Luk 20:9-19)
33 “Aŋô biŋgôliŋ teŋ. Andu ŋatau teŋ gêmoa, naŋ kêsê wain kôm teŋ, gêsô tuŋ e kêsô tau ma kêsap sêpip wain ŋamala to kêkwê andu ŋaatêkwa baliŋ kêtu sejop kôm tauŋa, go kêmasaŋ biŋ gêdêŋ lau sênam kôm êpiŋa ma eŋ tau gêja gamêŋbôm teŋ. 34 Noc wain ŋanô êsaŋa kêdabiŋ, go kêsakiŋ nê sakiŋwaga gêdêŋ kômwaga sêja gebe sêkôc ênê ŋanô. 35 Ma lau-sêjam-kômwaga sêkôc ênê sakiŋwaga tôŋ jasi teŋ ma sêjac teŋ êndu ma têtuc teŋ ŋa poc. 36 Ma kêsakiŋ ŋagêdô kêtiam sêlêlêc ŋamataŋa su sêja e sêgôm gêŋ tonaŋgeŋ gêdêŋ êsêac. 37 Kêtu ŋamu eŋ kêsakiŋ nê latu gêdêŋ êsêac gêja ma kêsôm gebe ‘Êsêac oc tetoc aêŋoc latuc sa.’ 38 Kômwaga sêlic latu tau gêmêŋ ma sêsôm gêdêŋ tauŋ gebe ‘Ŋac-gêwê-kaiŋ-gêŋlênsêmwaga tau tonec. Ajôc, tanac eŋ êndu ma ênê gêŋlênsêm êtu aêacnêŋ.’ 39 Go sêkôc eŋ tôŋ ma têtiŋ eŋ aŋga kôm wainŋa kêsa gêja e sêjac eŋ êndu. 40 Amboac tonaŋ kôm wainŋa ŋatau embe êô lasê, oc êŋgôm lau-sêjam-kômwaga tonaŋ amboac ondoc.” 41 Ma êsêac sêsôm gêdêŋ eŋ geb “Oc enseŋ lau sec tonaŋ popoc ma êwi kôm wainŋa siŋ êndêŋ lau teŋ sênam kôm êpi, taŋ sêkêŋ kôm ŋanô êndêŋ eŋ êtôm ŋanocgeŋ naŋ.” 42 Ma Jesu kêsôm gêdêŋ êsêac gebe
“ ‘Poc taŋ sêkwêwaga sêbaliŋ siŋ naŋ,
poc tonaŋgeŋ tec kêtu poc kêclêsuŋa.
Gêŋ tonaŋ Apômtau gêgôm,
tec mateŋanô talic amboac gêŋsêga teŋ.’
Biŋ tonaŋ teto gêc, oc asam atom me. 43 Amboac tonaŋ jasôm êndêŋ amac gebe sêkôc Anôtônê gamêŋ su aŋga amacnêm ma sêkêŋ êndêŋ lau teŋ gebe sênam ŋaŋanô. 44 Ŋac teŋ embe êtuc êpi poc tonec, oc ôli êŋgic, ma poc tau êmbe êtuc êpi teŋ, oc êsac eŋ popocgeŋ.”
45 Lau dabuŋsêga to Parisai sêŋô ênê biŋgôliŋ e sêjala gebe eŋ kêsôm biŋ kêpi êsêac. 46 Tec sebe sêkam eŋ tôŋ, mago têtêc lau gebe sêlic eŋ kêtôm propete teŋ. *
* 21:46 Osana ŋam gebe lambiŋ.