5
ኦቱምኒ ሜያክ እምቴ ኬኦ
1 ኤሴ ንቶ ኦቱምኒ ሜኖ ኦዶትዋ! አካማ ሻና ንቶስታ ዮኒር ስንና ቦርአ ቻግጋ ዋሱትዋ።
2 ኦቱምኒትስ ዙቴራ ኩፓና፤ ማይኒትሶን ደይ ኮኝማር ሙና።
3 ዋርቄንትሴዋ ብርንትሴ ደይ ሺራ ማጙናዋ። ባሪ ሽያስ ደይ ንቶስታ ዛላ ሲናናዋ። አሽንትሶን ደይ ጌኒማቶ ኪቹናዋ። ሀን ኮእኒ ዎናሲክቱ ኦትማ ዙቲሴትዋ።
4 ኤሴ ኦዶትዋ! ፎሽኒትሶን ዙቲ ዎስትኛአሳ ዋጋ ንቶስታ ኩንፋት ቻግድፋዋ። ኤስ ባሶ ቻጋሶን ደይ ዙታምባሴ አሲስታ ሁግናባ ፋና ዳሚስ ኦዴዋ።
5 ማአ ፎክናዋ ግራክና አቱንትሶን ሹክቶናክ ሆሬራ የሬ ጋቹኒማቶ ኩልሲትዋ።
6 ንቶትን ቱጋኦኖይ ካይም ማጝሱቤስ ፎንቶ ሜያኖን ማጝሱ ባሶስታ ካርኤቲ ደይ ዎርሴትዋ።
ዳሚሳ ዎሌ ዮኖን ፋኪያክ ኦዳ ሾልሲር
7 አይታሳክቶኖ! ዳሚስ ዮና ካባኔን ፋኩትዋ። ቡልኛአስ ዳባስ ቤጋኒ እሮሴዋ ዬሹሲ እሮነ አስን ዳንና ማአ ጋና እማናኔን ፋክያክቱ ፎሽባሲ ጋናኖን ኦድፌዋ።
8 ዳሚስ ዮና ባር ታእ ስንና ቦርአ ንቶ ደይ ኤሲስማቶ ፋኪራ አብድክ ችምማ ኦድትዋ።
9 አይታሳክቶኖ! ንቶስታ ማጝሱ ካቶኖይናማቶ ንቶትና ንቶትና ዎል ኡኙሶቲታዋ። ማጝሱ ካርኒ ባር ዮና ዎና ካርእዋ።
10 አይታሳክቶኖ! ዳሚሳ ሱናክ ማክሴ ራጁኒ ሜያ ሻናሶን ፋኪያክ ኤጴቶክ ቤሶ ስና ባሶትን ቢትዋ።
11 ኤሲስማቶ ደይ ፋኒያክ ችምሜ ኣታ ባሶትንቱ፦ «ሱስቶዋ» ይፌኒዋ። እዮብ ደይ ኣካክ ፋኪናማቶ ኦደትዋ። ዳሚስ ደይ ኮእባስታ ባሪክ ዛግና ባሮን ቢትዋ። ዳሚስ ፋክር ደይ ኬናሽቴር ስንባሶንቱ ቤስፋዋ።
12 አይታሳክቶኖ! ዙታምባሴ አሲስታን ደናሎ ደን ሳማክ ወደይ ሀን ዳስታክ ወደይ ኦማ እሳ ዉዛክነ ቴዉትታዋ። ዎሉምኒትስ ኣ ስንፋናነ ኣ፤ እንዳነ ስንፋናነ እንዳነ ስኑንዋ። ኤካ ስና ሻካናነ ንቶስታ ማጝሱ ካቴርዋ።
13 ንቶ ጋነያሲ ራክኮ ባሳስታ ካርእና አሱ ፌፋናነ ሺጶዎዋ። ግሬት ፌ አሱ ፌፋናነ ባር ሀኦሲክ ጋላትኒ ጋማ ጋሞዎዋ።
14 ንቶ ጋነያሲን ሜትቴ አሱ ፌፋናነ ቤቴክርስታንኒ ኩርኡኒ ሜያኖን ባርኪ ቴጎዎዋ። ባሶ ደይ ዳሚሳ ሱናክ ዛይት ዎሽሬ ባሪክ ሺጶሶቶዋ።
15 አማነሬ ሺጶስ ሜታኒስን ፋትርዋ። ዳሚስ ደይ ኤስ ሜሮባስን ባሪን ፋቱናዋ፤ ቦርእባ ፋፋናነ ደይ ባሪክ ፌሹን ኡስቶናዋ።
16 ንቶትና ንቶትና ዎል ቦርእኒትሶን ሀርሙትዋ። ሜሮንትስን ፋሩትክ እሳይስ ኦሚሲክ ሺጶዎዋ። ኦኮ አሱኒ ሺጶስ ጋንባ ፋር ደይ አካማ ሁግናባ ፋርዋ።
17 ኤልያስ እንኖነ ፌ አሱዋ፤ እሮ እችኖይናማቶ ዛጊግሬ ሺጴን ኬዝ ዎጋነዋ እሱን አስነ ዳስታክ እሮ ኣነ እቻዋ።
18 ሄፕሳ ደይ ዎል ሌ ሺጴን ሳማን እሮ ኬሬዋ። ዳስ ደይ ሜያ ካይግዋ።
19 አይታሳክቶኖ! ንቶስን እሳር ፉቶኒ ኡግናስታን ሻቴፋናነ ኦሚስ ደይ ኤስ አሱስን ዎልግፋናነ፤
20 ቦርእኛአስን ቦርባስን ዎልግፌ ባር ቦርእኛአሳ ካኖን ክቱስን ፉኤናማቶናዋ አካማ ቦርባሲ ፋኪያኖን ዳናናክ ዛግናማቶና አሩዎዋ።