ዎሲ ጴጥሮስኒ እሶንሳ ዎሲያ
ጋችግሩ
ዎሲ ጴጥሮስኒ ቴሱኒ ዎሲያ ትቼናስ ዎስባስ «ሀኦሲ ኮርቶ ዳራ» ይስቴሬ ቴግቴሴፌ ባሶክናዋ ጋሮ ኢስያኒ ዬሽዳኪ ድማስሲ ሲክቴሬ ፌሴ ክርስታናኒ ሜያክዋ። ዎሲያስ አሪክሮን ቢፋናስ አማንቶቤሲሲ ቦርአ ካቡግቶነዋ ራኮነ ባሶስታ ካርፋን ፌሬትፌ ባሶትን ችኑክናዋ ዛጉክናዋ። ትችባር ኤስ ባሮን ዛግናስ ክቱባሶን፥ ክቱን ካቡባሶን፥ ዎል ሌ ዮባሲ አብድኖን ማኬፋ የሱስ ክርስቶስኒ ምስራቹኒ ካማሶን ፌሬትፌ ባሶክ ያዳሱክዋ። የሱስ ክርስቶስኒ ካሶን ቤሶ ዛግሴሬ ብያክ ራክኮሶን ፋክያክ ኤጴቶ ሾልስፋናማቶ ማኬፌ። ኤስ ባርኔን ቱስሬ ሻና አማንቶቤሲስ ካይማኖን ፋታኖኒር ስኒባሶን «የሱስ ክርስቶስ ዎል ሌ ዮና ዎኖ» ባሶክ ሾልሲ ዋግቤሲሶን ዳኖነማቶ ማኬፌ።
ትችባር ሻናስሲ ፋኩሶነክ ችኑባስታን ኦማ ፌሬትሴፌ ባሶ ክርስቶስኒክ ዞንኑሱሲክ ፎሶነክ ሾልስፋናስንነ ፋሮን ፎሶነክ ማኬፌ።
ማፃፋሲ ስሩክ ኤጵና ኤጶባስ
ጋችግሩ 1:1-2
ሀኦሲ ፋቱኒ ያዳታ 1:3-12
ኮርቶ ካክ ፎሲክ እምቴ ኪቶ 1:13—2:10
ራኮኒ ዎኖ ክርስታናኒ ሀእሱ 2:11—4:19
ክርስታናኒ ሜኒ ጋራማኒ ዎስቶ 5:1-11
ኮርኡባ 5:12-14
1
1 የሱስ ክርስቶስኒ ዎሲ ስና ጴጥሮስኒኪን፥ ፓንቶስ፥ ጋላትያ፥ ኬጳዶክያ፥ ኢስያናዋ ብታኒያና አሲስ ስኬቴሬ እርባ ስነሬ ፌሴ ሀኦ ኮሪና ባሶክ፤
2 አባ ሀኦስ ዜምማ አሪራ የሱስ ክርስቶስኒክ አጃጃምቶክ ሀርንባሲክ ዊርቴራ ኮርቶ አያናስኪ ካሞ ኮርቶ ስና ንቶክ፤ ሀኦሲ ኦቱምነዋ ናጋነ ንቶክ አሪክፋዉጝዋ።
ሀየዋ አብድ
3 የሱስ ክርስቶስ ክቱኒ ካቡባሲክ ሀየዋ ስና አብዲሶን እኖክ እምማ፤ አካማ ፋኪባሲክ ጋድዶ ኮኒቶክ እኖትን ባሪ ናንጎታ ዛግ ዳምኒ የሱስ ክርስቶስኒ አባ ሀኦሲክ ጋላታ ስንፋውጝዋ።
4 ባር ደን ሳማክ ትሹኖር፤ ማጙኖይ ደይ ኩርኡኖይ ሆሬራ ፋ ርስት ንቶክ ሆሲ።
5 ንቶ ደይ ኮእኒ ዎናስታ ዮኒ ፋሩሶን አማንቶስኪ ካሞ ሀኦሲ ሁግናክ ኦድቴራ ፋሴትር።
6 ሀሽ ሾዎ ቴሳ ፋታናክ ጋሮ ዎኒሮን ፋታንቴፌትክኑ ኤስ ፋታናሲክ ግሮትዋ።
7 ኤስ ፋታናስ ንቶስታ ካርናስ ንቶ አማንቶስ ዛጋ ስኒባሶን ቤሱክዋ፤ ትሹኒ ዋርቄስኑ ጌሲ ግርራቱ ኬስፋዋ፤ ዋርቄስታን ደናሎ ስና ኡልፍንቶ አማንቶኒትስ ኤሲስማቶ ፋታንቶናክ ሾልሲፋዋ። ኤስ ፋታንቴራ ኬሳ አማንቶኒትስ የሱስ ክርስቶስ አምማኖን ዎል ሌ ዬፌና ካባሲክ ጋላታ፥ ኡልፍነዋ ካጱስቶነ ንቶክ እማና።
8 የሱስኒን ቢኖይፋጌዶ ሹንፌትዋ፤ ሀሽ ብያ ቤይፌትክኑ ባሪክ አማነሴትዋ፤ ኤካ ይስቴራ ማኮክ ችምቶኖይ ኡልፍንቶ ግራ ግሮትዋ።
9 አማነራ ኦድፌት ካኒትሲ ፋሩኖን ዳናትዋ።
10 ንቶክ እምቶኒ ሀኦሲ ኦትማኒ ራጂሶን ማኬ ራጁኒ ሜያ ሀን ፋሩሲ ቾዋኖን ማእስሬ ቱንኢት ፌሴቴርዋ።
11 ባሶስሲ ፋ ክርስቶስኒ አያናስ ክርስቶስኒስታ ካርኒ ሻናሶንናዋ ኤስ ሻናስኔን ኦርፎ ዳናና ኡልፍናሶንና ቤሲራ ፋርዋ። ባሶ ደይ ኤስ ዉዛስ ዙታምባሴ ኣጌናዋ ኣካክና ስናናማቶ ቱኒሬ ፌሴቴርዋ።
12 ኤስ ራጁኒ ሜያ ዎስቴት ፌሴቴስ ንቶክታኖ ባሶ ቴታሲክታ ስንናማቶ ባሶክ አምማኖን ቤስቴራ ፋርዋ። ንቶክ ዎስቴሴቴስ ሳማን ዎስቴራ ያ ኮርቶ አያናስኪ ካሞ ምስራቹኒ ካማሶን ሀሽቲ ንቶክ ማክሴ አሱኒ ሜያ ማክሴቴ ባሮን አምማኖን ኪስሬ ቤሱክዋ። ኤስ ባሮን ደይ ሀኦሲ ዎስያሲክቶኑ ብዮሶናክ ኤናንቴት ፋሴርዋ።
ኮርቶ ፎክ ፎ
13 ኤስ ባሪ ቦርኣ ንብንትሶን ጉዝግራ ሆሮት፤ ቴትንትሶን ሀእሱት፤ የሱስ ክርስቶስ አምማኖን ዎል ሌ ዬፌና ካባሲክ ዳናት አካማ ፋሩሲ ኦትማኖን ዳናትክ ቱማ አብድንት ፎኒ።
14 አጃጃሜ ናንጎታ ስንትታኖ አሩኖይ ዜሞቲ ፋፌት ማጙ ኤናንቶሲክ ዞኑስቶትታ።
15 ስኑንታኖ ንቶትን ቴጌ ሀኦስ ኮርቶ ስንናማቶ ንቶ ደይ ፎንት ዙታምባሴ አሲክ ኮርቶ ስንትዋ።
16 ኮርቶ ማፃፋስሲ፦ «ታ ኮርቶ ስንና ቦርአ ንቶ ደይ ኮርቶ ስንት» ይስቴራ ትቼዋ።
17 ኦኒንኑ ኮሩኖይ እሳርባ እሳርባሲክ ዎስቶባሲማቶ ማጝሱ ካርኒ ሀኦሶን፦ «አባ» ይራ ቴግሴትር ስንፋናነ ሀን ዳስታክ እርባ ስንና ፋፌት ካባሲክ ሀኦሶን ድጋክ ፎቲ።
18 ንቶ አባንቲሳታን ዋራሴት ኬኖይ ፎስን ፉርቴትስ ትሹኒ ብርክ ወደይ ዋርቄክ ስና ቤይባሶን አርሴፌትዋ።
19 ስኑንታኖ ንቶ ፉርቴሴትስ ዝና ወደይ ሙዳባ ፎንቶ ካይማ ፋንቱ ስና ክርስቶስኒ ኡልፍንቶ ሀንናሲክዋ።
20 ባር ኮርቴናስ ሀን ዳስ ቴስቶኖይፌን ዜምማ ስንፋናክኑ ሀሽ ኮእኒ ነያስታክ ንቶክዋ እያት አምማኖን ኬስሴ ቤስቴዋ።
21 የሱስኒን ክቱን ካብግራ ኡልፍና እማ ሀኦሲክ አማኖሶትዋ፤ ኤሲሲክ አማንቶኒትሴዋ አብድንትሴ ሀኦስታ ስናናዋ።
22 አማኝኒ ሜያክ ኬሽታኒትስ ካይማ ኬናክ ስናናክ ፉቶሲክ አጃጃሞክ ካኒትሶን ካይንትዋ። ኤስ ባሪ ቦርኣ ንቶትና ንቶትና ዛግራ ንብንትስን ኬሽቶሶትዋ።
23 ሄፕሳ ኮንቴሴትስ ሀየዋ ስና ኮእባ ፎንቶኖን ዛግራ ፋፋ ሀኦሲ ካማክ ትሹኖይ ዛላስንታኖ ትሹኒ ዛላስንታዋ።
24 ማፃፋስሲ ማክቴናሲማቶ፦
«አሱ ዙታምባሴ ኩኒማቶዋ፤
ኡልፍንባስ ደይ ቡርሁኒ ፉርኣሲማቶዋ፤
ኩዋስ እችማና፤ ፉርኣስ ደይ ዎቶና።
25 ስኑንታኖ ዳሚሳ ካማ፤
ኮእባ ፎንቶኖን ዛግራ ፎና»
ንቶክ ማክቴ ምስራቹኒ ካማስ ኤሲስዋ።