ಪೌಲನು ಕೊರಿಂಥದವರಿಗೆ ಬರೆದ ಎರಡನೆಯ ಪತ್ರಿಕೆ
ಕೊರಿಂಥ್‍ಕಾರಾಕ್ನಿಪಾವ್ಲುನ್ ಲಿವಲ್ಲಿ ದೊನ್ವೆಚಿ ಚಿಟಿ
ವಳಕ್
ಅಪೊಸ್ತಲ್ ಪಾವ್ಲುನ್ ಹಿ ಚಿಟ್ ಕ್ರಿಸ್ತ್ ಜಲಮ್ಲ್ಯಾ ಮಾನಾ ಲೈ ಕರುನ್ ಪನ್ನಾಸಾರ್ ಪಾಂಚ್ ಅನಿ ಪನ್ನಾಸಾರ್ ಸಾ ವ್ಯಾ ವರ್ಸಾತ್ ಲಿವ್ಲ್ಯಾನ್ 1:1. ಪಾವ್ಲುನ್ ಕೊರಿಂಥ್‍ಕಾರಾಕ್ನಿ ಲಿವಲ್ಲ್ಯಾ ದೊನ್ ಚಿಟಿಯಾತ್ನಿ, ಹಿ ದೊನ್ವೆಚಿ ಚಿಟಿ ಪಾವ್ಲುನ್ ಕೊರಿಂಥ್‍ಕಾರಾಕ್ನಿ ಲೈ ಗಂಬಿರ್ ಹೊವ್ನ್ ಹೆಜ್ಯಾನ್ ಪೈಲೆಚಿ ಚಿಟಿ ಲಿವಲ್ಯಾನ್ ಮನುನ್ ಬುದ್ವಂತ್ ಲೊಕಾ ವಿಶ್ವಾಸ್ ಕರ್ತಾತ್ 2:3-4 ತ್ನಿ ಲಿವ್ನ್ ಹೊಲ್ಲ್ಯಾಸಾರ್ಕೆ ತ್ಯಾ ಚಿಟಿಚಿ ಖಲಿಬಿ ಭಾಗಾ ಅಮ್ಕಾ ಗಾವ್ಕ್ನಾತ್.ಕೊರಿಂಥ್ ಕಾರಾಕ್ನಿ ಪಾವ್ಲುನ್ ದೊನ್ವೆಚಿ ಚಿಟ್ ಪಾವ್ಲುನ್ ಲೈ ಕರುನ್ ಮೆಸಿದೊನಿಯಾತ್ ರಾತಾನಾ ಲಿವ್ಲಾ 2:13
ಕೊರಿಂಥ್ ಕಾರಾಕ್ನಿ ಲಿವಲ್ಲಿ ಹಿ ಚಿಟ್ ಲೈ ವಿಶೆಶ್ ಹೊವ್ನ್ ಹಾಯ್ ಅನಿ ಭುತ್ತುರ್ಲ್ಯಾ ಮನಾತ್ಲಿ ದಾಕ್ವುನ್ ಹೊವ್ನ್ ಹಾಯ್, ಪಾವ್ಲುನ್ ಕೊರಿಂಥ್ ಕಾರಾಂಚ್ಯಾ ವಿಶಯಾತ್ ತಿತಾಕ್ನಾ ಘೆಟಲ್ಯಾ ಖಬ್ರೆಚ್ಯಾ ವಿಶಯಾತ್ ಲೈ ಖುಶಿ ಹೊತಾ. ಹ್ಯಾ ಚಿಟಿತ್ ನವ್ಯಾ ಕರಾರಾಕ್ ಆಧಾರ್ ಹೊವ್ನ್ ಹೊತ್ತಿ ಸ್ವತಾ ವಿವರನ್ ಕರಲಿ ಶಿಕಾಪಾ ಅಮಿ ಬಗುಕ್ ಹೊತಾ,ಲೈ ಕರುನ್ ಪಾವ್ಲುನ್ ಜೆರುಜಲೆಮಾಚ್ಯಾ ದೆವಾಚ್ಯಾ ಲೊಕಾಕ್ನಿ ಮಜತ್ ಹೊಯ್ ಸಾರ್ಕೆ ಪೈಸೆ ಗೊಳಾ ಕರ್ತಲ್ಯಾ ವಿಶಯಾತ್ ಶಿಕಾಪ್ ಕರ್ತಾ. ಹಿತ್ತೆ ಉಲ್ಲಿ ಝುಟಿ ಅಪೊಸ್ತಲಾ ತಾಂಡ್ಯಾತ್ನಾ ಭಾರ್ಯ ಲೊಕಾಂಚೆ ಬರೆಪಾನ್ ವಾಪ್ರುನ್ ಘೆವ್ನ್ ಅಪ್ನಾಕ್ನಿಚ್ ಪಾವ್ಲುಕ್ ವಿರೊದ್ ಕರುನ್ ಘೆಟಲ್ಯಾನಿ,ತೆನಿ ಪಾವ್ಲುಚ್ಯಾ ಅದಿಕಾರಾ ವರ್ತಿ ಸಂಶವ್ ಕರುಲಾಗಲ್ಯಾನಿ ಕೊರಿಂಥ್ ಕಾರಾಕ್ನಿ ಲಿವಲ್ಯಾ ದೊನ್ವೆಚ್ಯಾ ಚಿಟಿಚ್ಯಾ ಸರ್ತಾನಾ ತೆನಿ ಜೆಜು ಕ್ರಿಸ್ತಾಚ್ಯಾ ಅಪೊಸ್ತಲಾಚೊ ಅಧಿಕಾರ್ ಘೆಟಲೆ ಹೊತ್ತೆ ತೊ ಹಕ್ಕ್ ಲೈ ಕರುನ್ ತೆಚ್ಯಾ ವಿಶಯಾತ್ ಪುಸ್ಟಿ ದಿಯ್ತ್ ಹೊತ್ತೊ.
ಭಾಗಾ
1 ಪಾವ್ಲು ತಾಂಡ್ಯಾಕ್ ನಮಸ್ಕಾರ್ ಕರುನ್ಗೆತ್ ಅಪ್ಲಿ ಚಿಟ್ ಶುರು ಕರ್ತಾ 1:1-7
2 ಮಾನಾ ಪಾವ್ಲು ಅಪ್ಲ್ಯಾ ಪರ್ಯಾನಾತ್ ಹೊಲ್ಲಿ ಬದ್ಲಾವನಿಯಾ ಅನಿ ಅಪ್ಲ್ಯಾ ಪೈಲೆಚ್ಯಾ ಚಿಟಿಚ್ಯಾ ವಿಶಯಾತ್ ಲಿವ್ತಾ 1:8—7:16
3 ಮಾನಾ ಪಾವ್ಲು ಜೆರುಜಲೆಮಾತ್ಲ್ಯಾ ದೆವಾಚ್ಯಾ ಲೊಕಾಕ್ನಿ ಮಜತ್ ಹೊಯ್ಸಾರ್ಕೆ ಪೈಸೆ ಗೊಳಾ ಕರ್ತಲ್ಯಾ ವಿಶಯಾತ್ ಮಾರ್ಗದರ್ಶನ್ ದಿತಾ 8:1—9:15
4 ಆಕ್ರಿಕ್ ಪಾವ್ಲು ಅಪ್ಲ್ಯಾ ಅಪೊಲ್ಲೊಚ್ಯಾ ವಿಶಯಾತ್ ಲಿವ್ತಾ ಅನಿ ಅಪ್ಲ್ಯಾ ಫಿಡ್ಲ್ಯಾ ಭೆಟಿಚ್ಯಾ ವಿಶಯಾತ್ ಹುಶ್ಯಾರ್ಕಿ ದಿತಾ 10:1; 13:10
1
1 ಪಾವ್ಲುನ್ ದೆವಾಚ್ಯಾ ಮನಾನ್ ಜೆಜು ಕ್ರಿಸ್ತಾಚೊ ಅಪೊಸ್ತಲ್ ಅನಿ ಅಮ್ಚ್ಯಾ ಭಾವಾ ತಿಮೊತಿನ್ ಕೊರಿಂಥ್ ಮನ್ತಲ್ಯಾ ಶಾರಾತ್ ಹೊತ್ತ್ಯಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾತ್ ಅನಿ ಅಖಾಯಿಯಾ ಮನ್ತಲ್ಯಾ ಪ್ರಾಂತ್ಯಾತ್ ಹೊತ್ತ್ಯಾ ಸಗ್ಳ್ಯಾ ದೆವಾಚ್ಯಾ ಲೊಕಾಕ್ನಿ ಲಿವ್ತಲೆ.
2 ದೆವಾ ಅಮ್ಚ್ಯಾ ಬಾಬಾಚಿ ಅನಿ ಧನಿಯಾ ಜೆಜು ಕ್ರಿಸ್ತಾಚಿ ಕುರ್ಪಾ ಅನಿ ಶಾಂತಿ ತುಮ್ಕಾ ಗಾಂವ್ದಿತ್.
ಪಾವ್ಲು ದೆವಾಕ್ ಧನ್ಯವಾದ್ ದಿತಾ
3 ದೆವಾಕ್ ಅನಿ ಅಮ್ಚ್ಯಾ ಧನಿಯಾ ಜೆಜು ಕ್ರಿಸ್ತಾಚ್ಯಾ ಬಾಬಾಕ್ ಹೊಗ್ಳಾಪ್, ತೊ ದಯಾ ದಾಕ್ವುತಲೊ ಬಾಬಾ, ಸಗ್ಳಿ ಮಜತ್ ತ್ಯಾಚ್ ದೆವಾಕ್ನಾ ಯೆತಾ.
4 ತೊ ಅಮ್ಚ್ಯಾ ಸಗ್ಳ್ಯಾ ತರಾಸಾಕ್ನಿ ಅಮ್ಕಾ ಮಜತ್ ದಿತಾ; ತಸೆ ಮನುನ್ ತೆಚ್ಯಾ ವೈನಾ ಅಮ್ಕಾ ಗಾವಲ್ಲ್ಯಾ ಮಜತಿಚ್ಯಾ ವೈನಾ ಸಗ್ಳ್ಯಾ ಕಸ್ಟಾತ್ನಿ ಪಡಲ್ಲ್ಯಾ ದುಸ್ರ್ಯಾಕ್ನಿ ಮಜತ್ ಕರುಕ್ ಅಮಿ ಪಾವ್ತಾವ್.
5 ಕಶೆ ಕ್ರಿಸ್ತಾಚ್ಯಾ ಕಸ್ಟಾತ್ನಿ ಅಮಿ ವಾಟೊ ಘೆತಾಂವ್, ತಸೆ ಕ್ರಿಸ್ತಾ ವೈನಾ ಭರ್ಪುರ್ ಮಜತ್‌ಬಿ ಅಮ್ಕಾ ಗಾವ್ತಾ.
6 ಅಮಿ ಕಸ್ಟಾತ್ನಿ ಶಿರಕ್ತಾವ್ ಹೆ ತುಮ್ಚ್ಯಾ ಮಜತಿ ಅನಿ ಸುಟ್ಕಾಸಾಟ್ನಿ; ಅಮ್ಕಾ ಮಜತ್ ಗಾವ್ತಾ ಜಾಲ್ಯಾರ್ಬಿ ತಿ ತುಮ್ಚ್ಯಾ ಮಜತಿಸಾಟ್ನಿ ಅನಿ ಆಮ್ಕಾ ಗಾವಲ್ಲೊ ಕಸ್ಟ್ ತುಮ್ಕಾಬಿ ಗಾವಲ್ಯಾ ತನ್ನಾ ತೆ ಸೊಸುಕ್ ಧೈರೊ ಅನಿ ಬಳ್ ಗಾವ್ಕ್ ಸಾಟ್ನಿ.
7 ತುಮ್ಚ್ಯಾ ವರ್ತಿ ಹೊತ್ತೊ ಅಮ್ಚೊ ಬರೊಸೊ ಬಿಲ್ಕುಲ್ ಹಾಲಿ ಸಾರ್ಕೊ ನಾ; ಕಶ್ಯಾಕ್ ಮಟ್ಲ್ಯಾರ್, ಅಮ್ಚ್ಯಾ ಕಸ್ಟಾತ್ ತುಮಿ ಬಾಗ್ ಘೆಟ್ಲ್ಯಾಶಿ. ತಸೆಚ್ ಅಮ್ಕಾ ಪಾಳ್ತಾ ತ್ಯಾ ಮಜತಿತ್‌ಬಿ ತುಮಿ ಭಾಗ್ ಘೆತ್ಯಾಶಿ.
8 ಭಾವಾನು ಅನಿ ಭೆನಿಯಾನು ಅಮಿ ಅಸ್ಸಿಯಾ ಮನ್ತಲ್ಯಾ ಪ್ರಾಂತ್ಯಾತ್ ಸೊಸಲ್ಲ್ಯಾ ತರಾಸಾಂಚ್ಯಾ ವಿಶಯಾತ್ ತುಮ್ಕಾ ಗೊತ್ತ್ ರ್‍ಹಾವ್ಚೆ ಮನುನ್ ಮಾಜಿ ಆಶಾ, ಅಮ್ಕಾ ಸೊಸುಕ್ ಹೊಯ್ನಾ ತವ್ಡ್ಯಾ ಕಸ್ಟಾತ್ ಅಮಿ ಸಿರಕಲ್ಲಾವ್, ಸಾಂಗುಚೆ ಜಾಲ್ಯಾರ್ ಅಮಿ ಹುರ್‍ತಾವ್ ಮನ್ತಲೊ ಬರೊಸೊಚ್ ನತ್ತೊ.
9 ಖರೆ ಮಟ್ಲ್ಯಾರ್ ಅಮ್ಕಾ ಮರನಾಚಿ ಶಿಕ್ಷಾ ಲಿವಲ್ಲಿ ಹಾಯ್ ಸರ್ಕೆ ಅಮ್ಕಾ ದಿಸ್ಲೆ, ಅಮಿ ಅಮ್ಚ್ಯಾ ವರ್ತಿ ನ್ಹಯ್, ಮರಲ್ಲ್ಯಾಕ್ನಿ ಝಿತ್ತೆ ಕರುನ್ ಉಟ್ವುತಲ್ಯಾ ದೆವಾಚ್ಯಾ ವರ್ತಿ ವಿಶ್ವಾಸ್ ಥವ್ಕ್ ಅಮಿ ಶಿಕ್ತಲ್ಯಾಸಾಟಿ ಅಶೆ ಹೊಲೆ.
10 ಮರ್‍ನಾಚ್ಯಾ ಭಯಂಕರ್ ಕಸ್ಟಾತ್ನಾ ತೆನಿಚ್ ಅಮ್ಕಾ ರಾಕ್ಲ್ಯಾನ್; ಅನಿ ಫಿಡೆಬಿ ತೊಚ್ ಅಮ್ಕಾ ರಾಕ್ತಾ. ಅಮ್ಕಾ ಕನ್ನಾಬಿ ಸೊಡುನ್ ಘಾಲಿನಸಲ್ಲ್ಯಾ, ತೆಚ್ಯಾ ವರ್ತಿ ಅಮ್ಚೊ ಬರೊಸೊ ಅಮಿ ಥವ್ಲ್ಯಾಂವ್.
11 ಖರೆ ತುಮಿಬಿ ತುಮ್ಚ್ಯಾ ಮಾಗ್ನಿಚಿ ಮಜತ್ ಅಮ್ಕಾ ದಿವ್ಚೆ, ತನ್ನಾ ಎವ್ಡ್ಯಾ ಜನಾಂಚ್ಯಾ ಮಾಗ್ನ್ಯಾಚೊ ಫಳ್ ಹೊವ್ನ್, ಅಮ್ಕಾ ಗಾವಲ್ಲ್ಯಾ ಮಜತಿಸಾಟ್ನಿ ತೆಕಾ ಲೈ ಲೊಕಾ ತೆಕಾ ಧನ್ಯವಾದ್ ದಿತ್ಯಾತ್.
ಪಾವ್ಲುಚ್ಯಾ ಯವ್ಜನಿಚೆ ಬದ್ಲಾವನ್
12 ಹ್ಯಾ ಎಕ್ ವಿಶಯಾತ್ ಅಮ್ಕಾ ಅಭಿಮಾನ್ ದಿಸ್ತಾ; ಸಗ್ಳ್ಯಾ ಮಾನ್ಸಾಂಚ್ಯಾ ಮದ್ದಿ ಅನಿ ವಿಶೆಸ್ ರಿತಿನ್ ತುಮ್ಚ್ಯಾ ಮದ್ದಿ ಬೊಲ್ತಾನಾ, ಅಮ್ಚಿ ಚಾಲ್ ಪ್ರಾಮಾನಿಕ್ ಅನಿ ದೆವಾಚ್ಯಾ ಭಿಂಯಾನ್ ಭರಲ್ಲಿ ಹಾಯ್ ಮನುನ್ ಅಮ್ಚೊ ಭುತ್ತುರ್ಲೊ ಮನ್ ಅಮ್ಕಾ ಸಾಕ್ಷಿ ದಿತಾ. ಜಗಾಚೆ ಶಾನ್‍ಪಾನ್ ನ್ಹಯ್, ದೆವಾಚಿ ಕುರ್ಪಾಚ್ ಅಮ್ಚ್ಯಾ ಹ್ಯಾ ಚಾಲಿಕ್ ಪ್ರೆರನ್.
13 ತುಮಿ ವಾಚುನ್ ಅರ್ತ್ ಕರುನ್ ಘೆವ್ಕ್ ಹೊತಾ ತವ್ಡೆಚ್ ಅಮಿ ತುಮ್ಕಾ ಲಿವ್ತಾಂವ್. ಆಕ್ರಿಚ್ಯಾ ಎಳಾ ಪತರ್ ತುಮಿ ಸಮ್ಜುನ್ ಘೆತ್ಯಾಶಿ ಮನ್ತಲೊ ಮಾಜೊ ಬರೊಸೊ.
14 ತುಮ್ಕಾ ಅಜುನ್‌ಬಿ ಅಮ್ಚ್ಯಾ ವಿಶಯಾತ್ ಹೊತ್ತಿ ಸಮ್ಜನ್ ಕಮಿಚ್, ಜಾಲ್ಯಾರ್ಬಿ ಅಮ್ಚ್ಯಾ ವಿಶಯಾತ್ ಪುರಾ ಸಮ್ಜುನ್ ಲಗ್ಗುನಾ ಗಾವ್ತಾ. ಅನಿ ಧನಿ ಜೆಜು ಪ್ರತ್ಯಕ್ಷ್ ಹೊತಲ್ಯಾ ದಿಸಿ ಕಸೊ ತುಮಿ ಮಾಜೊ ಅಭಿಮಾನ್ ಹೊವ್ನ್ ಹಾಸಿ, ತಸೆಚ್ ಮಿಯಾಬಿ ತುಮ್ಚೊ ಅಭಿಮಾನ್ ಹೊವ್ನ್ ರ್‍ಹಾತಾ ಮನ್ತಲೊ ಬರೊಸೊ ಮಾಕಾ ಹಾಯ್.
15 ಹ್ಯಾ ಸಗ್ಳ್ಯಾ ವಿಶಯಾಂಚಿ ಖಾತ್ರಿ ಮಾಕಾ ಹಾಯ್ ಮನುನುಚ್, ಮಿಯಾ ಅದ್ದಿ ತುಮ್ಕಾ ಭೆಟುಚೆ ಮನುನ್ ಚಿಂತಲ್ಲೊ. ಅಶೆ ತುಮ್ಕಾ ದೊನ್ ಮಾಪಾನ್ ಖುಶಿ ದಿವ್ಚೆ ಮನುನ್ ಮಿಯಾ ಚಿಂತಲ್ಲೊ.
16 ತಸೆ ಮಟ್ಲ್ಯಾರ್ ಮೆಸಿದೊನಿಯಾಕ್ ಜಾತಾನಾ ಅನಿ ಮಾನಾ ಥೈತ್ನಾ ಫಾಟಿ ಪರ್ತುನ್ ಯೆತಾನಾಬಿ ತುಮ್ಚ್ಯಾಕ್ಡೆ ಯೆವ್ಚೆ ಅನಿ ಮಾನಾ ಮಾಜ್ಯಾ ವಾಟೆಕ್ ಗರಜ್ ಅಸಲ್ಲೆ ದಿವ್ನ್ ತುಮಿಚ್ ಮಾಕಾ ಜುದೆಯಾಕ್ ಧಾಡ್ತಲೆ ಮನುನ್ ಮಿಯಾ ಯವ್ಜುನ್ ಘೆಟಲ್ಲೊ.
17 ಅಶೆ ಕರುನ್ ಯವ್ಜಲ್ಲ್ಯಾ ತನ್ನಾ ಮಿಯಾ ಚಂಚಲ್ ಮನಾಚೊ ಮನುನ್ ಹೊಲೆ ಕಾಯ್? ಮಾಜಿ ಯವ್ಜನಿಯಾ ಮಜ್ಯಾ ಗರುಕಿನ್ ಯೆಲಾತ್ ಮನುನ್ ಹೊಲೆ ಕಾಯ್? ಎಗ್ದಾ ಹೊಯ್ - ಹೊಯ್ ಮಟಲ್ಲೆ ತನ್ನಾಚ್ ಮಿಯಾ “ನ್ಹಯ್ - ನ್ಹಯ್” ಮಟ್ಲೊ ಕಾಯ್?
18 ಖರೆ ವಿಶ್ವಾಸಿ ದೆವ್ ಕಶೆ ಬೊಲ್ತಾ ತಸೆಚ್ ಮಿಯಾ ಸಾಂಗ್ತಾ, ಅಮಿ ತುಮ್ಕಾ ದಿಲ್ಲಿ ಬಾತ್ಮಿ ಎಗ್ದಾ “ಹೊಯ್” ಅನಿ ತನ್ನಾಚ್ “ನ್ಹಯ್” ಮನ್ತಲಿ ನ್ಹಯ್?
19 ಅಮಿ ಮಟ್ಲ್ಯಾರ್ ಸಿಲ್ವಾನಾನ್, ತಿಮೊತಿನ್, ಅನಿ ಮಿಯಾ ದೆವಾಚೊ ಲೆಕ್ ಮನುನ್ ಪರ್ಗಟ್ ಕರಲ್ಲೊ ಜೆಜು ಕ್ರಿಸ್ತ್ ತುಮ್ಚ್ಯಾ ಮದ್ದಿ “ಹೊಯ್” ಅನಿ ತನ್ನಾಚ್ “ನ್ಹಯ್” ಹೊವುಕ್ನಾ; ತೊ ಕನ್ನಾಬಿ ಹೊಯ್ಚ್.
20 ದೆವಾನ್ ದಿಲ್ಲ್ಯಾ ಸಗ್ಳ್ಯಾ ಗೊಸ್ಟಿಯಾಬಿ ತೆಚೆ ವೈನಾ ಹೊಯ್ ಹೊಲ್ಯಾತ್. .ತಸೆ ಮನುನುಚ್ ದೆವಾಚಿ ಸುತ್ತಿ ಕರ್‍ತಾನಾ ತೆಚೆ ವೈನಾ ಅಮಿ “ತಸೆಚ್ ಹೊಂವ್ದಿ” ಮನ್ತಾಂವ್.
21 ದೆವುಚ್ ತುಮ್ಕಾ ಅನಿ ಅಮ್ಕಾ ಅಭಿಶೆಕ್ ಕರುನ್ ಕ್ರಿಸ್ತಾಚ್ಯಾ ಎಕ್ವಟ್ಟಾನ್ ಘಟ್ ರ್‍ಹಾಯ್ ಸಾರ್ಕೆ ಕರ್ತಾ, ತೆ ದೆವಾನುಚ್ ಅಮ್ಕಾ ಎಗ್ಳುನ್ ಕಾಡಲ್ಲೆ,
22 ಅನಿ ತೆನಿಚ್ ಅಮ್ಕಾ ಅಮ್ಚ್ಯಾ ವೈರ್ ಛಪ್ಪೊ ಮಾರುನ್ ಅಮಿ ಅಪ್ನಾಚೆ ಕರುನ್ ಘೆಟ್ಲಾ ಅನಿ ಅಮ್ಚ್ಯಾ ಗಾವ್ನಾರ್ ಹೊತ್ತ್ಯಾ ಆಯಾರಾಂಚೊ ಖಾತ್ರಿ ಸಾರ್ಕೊ ಪವಿತ್ರ್ ಆತ್ಮೊ ಅಮ್ಚ್ಯಾ ಮನಾತ್ನಿ ಘಾಟ್ಲಾ.
23 ಮಾಜ್ಯಾ ಜಿವಾಚ್ಯಾನ್ ಮಿಯಾ ಸಾಂಗ್ತಾ ಅನಿ ದೆವುಚ್ ಹೆಕಾ ಸಾಕ್ಷಿ, ತುಮ್ಚ್ಯಾ ಮದ್ದಿ ಯೆವ್ನ್ ಕಠೊರ್‌ಪಾನ್ ದಾಕ್ವುಚೆ ಮನುನ್ ನ್ಹಯ್ ಮನುನ್ ಚಿಂತುನ್ ಕೊರಿಂಥಾಕ್ ಮಿಯಾ ಯೆವ್ಕ್ ನಾ.
24 ತುಮ್ಚ್ಯಾ ವಿಶ್ವಾಸಾಚ್ಯಾ ವೈರ್ ಅಧಿಕಾರ್ ಚಾಲ್ವುಚೆ ಮನ್ತಲಿ ಅಮ್ಚಿ ಆಶಾ ನ್ಹಯ್, ಕಶ್ಯಾಕ್ ಮಟ್ಲ್ಯಾರ್, ತುಮ್ಚ್ಯಾ ವಿಶ್ವಾಸಾತ್ ತುಮಿ ಘಟ್ ಹಾಸಿ, ತುಮ್ಚಿ ಕುಶಿ ಜಾಸ್ತಿ ಕರುಸಾಟ್ನಿ ತುಮ್ಚ್ಯಾ ವಾಂಗ್ಡಾ ಕಾಮ್ ಕರುಕ್ ಅಮ್ಕಾ ಲೈ ಮನ್ ಹಾಯ್.