ಪೌಲನು ಫಿಲೆಮೊನನಿಗೆ ಬರೆದ ದತ್ರಿಕೆ
ಫಿಲೆಮೊನಾಕ್ ಪಾವ್ಲುನ್ ಲಿವಲ್ಲಿ ಚಿಟಿ
ವಳಕ್
ಫಿಲೆಮೊನಾಕ್ ಲಿವಲ್ಲಿ ಹಿ ಚಿಟ್, ಬಾರಿಕ್ ಪುಸ್ತಕ್ ಅಪೊಸ್ತಲ್ ಪಾವ್ಲುನ್ ಲಿವ್ಲಾ 1—1 ಹಿ ಚಿಟ್ ಲಿವ್ತಾನಾ, ಪಾವ್ಲು ಬಂಧಿಖಾನ್ಯಾತ್ ಹೊತ್ತೊ, ಅಸೆ ಹೊವ್ನ್ ಲೈ ಕರುನ್ ತೆನಿ ಹಿ ಚಿಟ್ ರೊಮ್ ಮನ್ತಲ್ಯಾ ಶಾರಾತ್ನಾ ಲಿವ್ಕ್ ಫಿರೆ, ತೊ ರೊಮಾತ್ ಹೊತ್ತೊ ಹೊಲ್ಯಾರ್ ಹಿ ಚಿಟ್ ಕ್ರಿಸ್ತ್ ಉಪಾಜುನ್ ಸಾಟಾರ್ ಎಕ್ ವರಿಸ್ ಹೊಲ್ಲ್ಯಾ ಮಾನಾ ಲಿವಲ್ಲಿ ಹಾಯ್, ಅನಿ ಕೊಲೊಸ್ಸೆತ್ಲ್ಯಾಕ್ನಿ ಲಿವಲ್ಲಿ ಚಿಟ್ ತ್ಯಾಚ್ ಯೆಳಾರ್ ಲಿವ್ನ್ ಹೊಲ್ಲಿ ಹಾಯ್.
ಹಿ ಚಿಟ್ ತೆನಿ ಫಿಲೆಮೊನ್ ಮನ್ತಲ್ಯಾ ಎಕ್ ಮಾನ್ಸಾಕ್ ಲಿವಲ್ಲಿ ಹಾಯ್, ತೊ ಎಕ್ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಚೊ ಸದಸ್ಯ ಹೊವ್ನ್ ಹೊತ್ತೊ. ಪಾವ್ಲುನ್ ಫಿಲೆಮೊನಾಕ್ ಅಪ್ನಾಚ್ಯಾ ಗುಲಾಮ್ ಹೊವ್ನ್ ಹೊತ್ತ್ಯಾ ಓನಿಜಿಮಸ್ ಮನ್ತಲ್ಯಾಕ್ ಶಿಕ್ಷಾ ದಿವ್ಚೆ ನ್ಹಯ್ ಕಶ್ಯಾಕ್ ಮಟ್ಲ್ಯಾರ್ ಓನೆಜಿಮಸ್ ಮನ್ತಲೊ ಫಿಲೆಮೊನಾಕ್ನಾ ಚೊರುನ್ ಪಳುನ್ ಗೆಲ್ಲೊ ಹೊತ್ತೊ. ರೊಮಾಚ್ಯಾ ಖಾಯ್ದ್ಯಾಂಚ್ಯಾ ಸಾರ್ಕೆ ಫಿಲೆಮೊನಾನ್ ಓನೆಜಿಮಸ್ ಮನ್ತಲ್ಯಾಕ್ ಜಿವ್ ಕಾಡ್ತಲಿ ಶಿಕ್ಷಾ ದಿವ್ಕ್ ಹಕ್ಕ್ ಹೊತ್ತೊ, ಖರೆ ಪಾವ್ಲುನ್ ಫಿಲೆಮೊನಾಕ್ ಓನೆಜಿಮಸ್ ಮನ್ತಲ್ಯಾ ಎಕ್ ದೆವಾಕ್ ಮಾನುನ್ ಘೆವ್ನ್ ಚಲ್ತಲ್ಯಾ ಭಾವಾ ಸಾರ್ಕೆ ಸ್ವಿಕಾರ್ ಕರುನ್ ಘೆವ್ಚೆ, ಅನಿ ಅಪ್ನಾಚ್ಯಾ ತರ್ಪೆನ್ ಓನೆಜಿಮಸಾಕ್ ಎಕ್ ಮಜತ್ ಕರ್ತಲೊ ಸೆವಕ್ ಹೊವ್ನ್ ಸೆವಾ ಕರುಕ್ ಸೊಡುನ್ ದಿವ್ಚೆ ಮನುನ್ ಸುಚನಾ ದಿತಾ. 1:13-14.
ಭಾಗ್
1. ಪಾವ್ಲು ಫಿಲೆಮೊನಾಕ್ ನಮಸ್ಕಾರ್ ಸಾಂಗ್ತಾ.
2. ಮಾನಾ ಪಾವ್ಲು ಫಿಲೆಮೊನಾಕ್, ಅನಿ ಓನೆಜಿಮಸಾಕ್ ಎಕ್ಲೊ ದೆವಾಕ್ ಮಾನುನ್ ಘೆವ್ನ್ ಚಲ್ತಲ್ಯಾ ಭಾವಾಕ್ ಸಾರ್ಕೆ ಸ್ವಿಕಾರ್ ಕರುನ್ ಘೆವ್ಚೆ ಮನುನ್ ಮಾಗುನ್ ಘೆತಾ. 1:4-21
3. ಪಾವ್ಲು ಅಪ್ನಿ ಭೆಟ್ತಲೊ ಉದ್ದೆಶ್ ಸಾಂಗುನ್ಗೆತ್, ಅನಿ ನಮಸ್ಕಾರ್ ಕರುನ್ಗೆತ್ ಹಿ ಚಿಟ್ ಮುಗಸ್ತಾ 1:22-25
1
1 ಜೆಜು ಕ್ರಿಸ್ತಾಚ್ಯಾಸಾಟ್ನಿ ಬಂಧಿಖಾನ್ಯಾತ್ ಅಸಲ್ಲೊ ಪಾವ್ಲು ಅನಿ ಅಮ್ಚೊ ಭಾವ್ ತಿಮೊತಿನ್, ಅಮ್ಚ್ಯಾ ದೊಸ್ತಾ ಅನಿ ವಾಂಗ್ಡಿಯಾಕ್ ಫಿಲೆಮೊನಾಕ್,
2 ಅನಿ ತುಮ್ಚ್ಯಾ ಘರಾತ್ ಜಮ್ತಲ್ಯಾ ದೆವಾಚ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ಅನಿ ಅಪ್ಫಿಯಾ ಅಮ್ಚ್ಯಾ ಭೆನಿಕ್ ,ಅನಿ ಅಮ್ಚ್ಯಾ ವಾಂಗುಡ್ಚ್ಯಾ ಸೈನಿಕಾಕ್ ಅರ್ಕಿಪ್ಪಾಕ್ ಲಿವ್ತಲೆ.
3 ದೆವ್ ಬಾಬಾ ಅನಿ ಧನಿ ಕ್ರಿಸ್ತ್ ತುಮ್ಕಾ ಕುರ್ಪಾ ಅನಿ ಶಾಂತಿ ದಿಂವ್ದಿತ್.
ಫಿಲೆಮೊನಾಚೊ ಪ್ರೆಮ್ ಅನಿ ವಿಶ್ವಾಸ್
4 ಭಾವಾ ಫಿಲೆಮೊನಾ, ಹರಿಎಗ್ದಾ ಮಾಗ್ನಿ ಕರ್ತಾನಾ, ಮಿಯಾ ತುಜಿ ಯಾದ್ ಕರ್ತಾ ಅನಿ ದೆವಾಕ್ ಧನ್ಯವಾದ್ ದಿತಾ.
5 ಕಶ್ಯಾಕ್ ಮಟ್ಲ್ಯಾರ್, ದೆವಾಚ್ಯಾ ಲೊಕಾಂಚ್ಯಾ ವರ್ತಿ ತಿಯಾ ಥವಲ್ಲ್ಯಾ ಪ್ರೆಮಾಚ್ಯಾ ಅನಿ ಧನಿಯಾ ಜೆಜು ವರ್ತಿ ತಿಯಾ ಥವಲ್ಲ್ಯಾ ವಿಶ್ವಾಸಾಚ್ಯಾ ವಿಶಯಾತ್ ಮಿಯಾ ಆಯಿಕ್ಲಾ.
6 ಕ್ರಿಸ್ತಾಚ್ಯಾ ವೈನಾ ಅಮ್ಕಾ ಗಾವಲ್ಲ್ಯಾ ಆಶಿರ್ವಾದಾಚ್ಯಾ ವಿಶಯಾತ್ ತುಕಾ ಸಗ್ಳೆ ಗೊತ್ತ್ ರ್‍ಹಾವ್ನ್, ಕ್ರಿಸ್ತಾಚ್ಯಾ ವಿಶ್ವಾಸಾತ್ ತುಕಾ ಅಸಲ್ಲೊ ಎಕ್ವಟ್ಟ್. ಕ್ರಿಸ್ತಾಕ್ ಜಾಸ್ತಿಚಿ ಮಹಿಮಾ ಹೊಯ್ ಸಾರ್ಕೆ ಕರುಂದಿತ್ ಮನುನ್ ಮಿಯಾ ಮಾಗ್ತಾ.
7 ಪ್ರಿತಿಚ್ಯಾ ಭಾವಾ, ತುಜೊ ಪ್ರೆಮ್ ಮಾಕಾ ಲೈ ಕುಶಿ ಅನಿ ಉತ್ತೆಜನ್ ದಿತಾ; ತಿಯಾ ಸಗ್ಳ್ಯಾ ದೆವಾಚ್ಯಾ ಲೊಕಾಂಚಿ ಮನಾ ತಾಜಿ ಹೊಯ್ ಸಾರ್ಕೆ ಕರ್‍ಲೆ.
ಒನೆಜಿಮಸಾಕ್ ಪಾವ್ಲುಚಿ ವಿನಂತಿ
8 ಹ್ಯಾ ಕಾರನಾಕ್ ಲಾಗುನ್ ಕ್ರಿಸ್ತಾಚ್ಯಾ ವೈನಾ ಕರುಚೆ ಮನುನ್ ಹೊತ್ತೆ ಕಾಮ್ ಧೈರ್ಯಾನ್ ಸಾಂಗುಕ್ ಮಾಕಾ ಹಕ್ಕ್ ಹೊತ್ತೊ,
9 ಮಿಯಾ ಪಾವ್ಲು, ಕ್ರಿಸ್ತ್ ಜೆಜುಚೊ ಧುತ್, ಕ್ರಿಸ್ತಾಸಾಟ್ನಿ ಬಂಧಿಖಾನ್ಯಾತ್ ಹಾಂವ್, ಜಾಲ್ಯಾರ್ಬಿ ಮಿಯಾ ತುಜೊ ಪ್ರೆಮ್ ಕರ್ತಾ ತಸೆ ಮನುನ್ ತುಜೆಕ್ಡೆ ವಿನಂತಿ ಕರುಕ್ ಲಾಗ್ಲಾ.
10 ಮಿಯಾ ಬಂಧಿಖಾನ್ಯಾತ್ ಹೊತ್ತ್ಯಾ ತನ್ನಾ, ಜೊಡುನ್ ಘೆಟಲ್ಲ್ಯಾ ಮಾಜ್ಯಾ ಲೆಕಾ ಸಾರ್ಕ್ಯಾ ಓನೆಜಿಮಸಾಚ್ಯಾಸಾಟ್ನಿ ಮಿಯಾ ವಿನಂತಿ ಕರ್ತಾ.
11 ಎಕ್ ಎಳಾರ್ ತೊ ತುಜ್ಯಾ ಫಾಯ್ದ್ಯಾಕ್ ಪಡಿನಸಲ್ಲೊ ಹೊವ್ನ್ ಹೊತ್ತೊ, ಖರೆ ಅತ್ತಾ ತೊ ತುಕಾಬಿ ಮಾಕಾಬಿ ದೊಗ್ಯಾಕ್ನಿಬಿ ಫಾಯ್ದ್ಯಾಚೊ ಹೊವ್ನ್ ಹಾಯ್.
12 ತೆಕಾ ಮಿಯಾ ತುಜೆಕ್ಡೆ ಧಾಡುನ್ ದಿವ್ಕ್ ಲಾಗ್ಲಾ, ತಶೆ ಮಟ್ಲ್ಯಾರ್ ಮಾಜ್ಯಾ ಕಾಳ್ಜಾಚೊ ಎಕ್ ಇಸ್ಸೊಚ್ ತುಜೆಕ್ಡೆ ಧಾಡುನ್ ದಿವ್ಕ್ ಲಾಗ್ಲಾ ಮನುನ್ ಚಿಂತ್.
13 ಬರ್ಯಾ ಖಬರೆಸಾಟ್ನಿ ಮಿಯಾ ಬಂಧಿಖಾನ್ಯಾತ್ ರ್‍ಹಾತಾನಾ, ತುಜ್ಯಾ ಜಾಗ್ಯಾರ್ ತೆಕಾ ಮಾಜ್ಯಾ ವಾಂಗ್ಡಾ ಥವ್ನ್ ಘೆವ್ಚೆ ಮನುನ್ ಮಿಯಾ ಚಿಂತಲ್ಲೊ,
14 ಖರೆ ತುಜಿ ಪರವಾನ್ಗಿ ನಸ್ತಾನಾ ಮಾಕಾ ತಸೆ ಕರ್ತಲೆ ಬರೆ ದಿಸುಕ್ನಾ, ತಿಯಾ ಖುಶಿನ್ ಕರ್ತಲಿ ಮಜತ್ ಜಬರದಸ್ತಿನ್ ಕರುನ್ ಘೆವ್ಕ್ ಮಾಕಾ ನಕ್ಕೊ ಹೊತ್ತೆ.
15 ಎಕ್ ಎಳಾರ್ ತೊ ಚುಕುನ್ ಪಡ್ಲೊ, ಖರೆ ಹೆ ಸಗ್ಳೆ, ತೊ ಮಾಜ್ಯಾ ಅನಿ ತುಜ್ಯಾ ವಾಂಗ್ಡಾ ಅತ್ತಾ ಹಮೆಶಾ ರ್‍ಹಾವಸಾಟ್ನಿ ಮನುನ್ ತುಜ್ಯಾ ವಿರೊದ್ ಚುಕುನ್ ಪಡಲ್ಲೊ ಅಸಿಲ್.
16 ಅನಿ ಫಿಡೆ ತೊ ಗುಲಾಮ್ ನ್ಹಯ್, ಗುಲಾಮಾಚ್ಯಾನ್ ಮೊಟೊ. ತಸೆ ಮಟ್ಲ್ಯಾರ್ ತುಕಾ ಎಕ್ ಪ್ರೆಮಾಚೊ ಭಾವ್, ಮಾಕಾ ತರ್ ತೊ ಲೈ ಅಪುರ್ಬಾಯೆಚೊಚ್, ಖರೆ ಮಾಜ್ಯಾನ್ಕಿ ತುಕಾ ಲೈ ಅಪುರ್ಬಾಯೆಚೊ. ತುಜೆ ಸಾರ್ಕೊಚ್ ಎಕ್ ಮಾನುಸ್ ಹೊವ್ನ್ ಕ್ರಿಸ್ತಾತ್ ಎಕ್ ಭಾವ್ ತೊ ತುಕಾ ಹೊಲಾ, ಮನ್ತಾನಾ ತುಕಾ ಕವ್ಡೊ ಅಪುರ್ಬಾಯೆಚೊ ತೊ ಅಸಿಲ್?
17 ಎಕುಚ್ ಎಕ್ ವಿಶ್ವಾಸಾತ್ ಮಿಯಾ ತುಜೊ ವಾಂಗ್ಡಿ ಮನುನ್ ತಿಯಾ ಚಿಂತ್ತೆ, ತರ್ ಮಾಕಾ ಕಸೆ ತಿಯಾ ಸ್ವಾಗತ್ ಕರ್ತೆ, ತಸೆಚ್ ತೆಕಾಬಿ ಸ್ವಾಗತ್ ಕರ್.
18 ತೆನಿ ತುಕಾ ಕಾಯ್ಬಿ ದುಕ್ ದಿಲ್ಲೆ ರ್‍ಹಾಲ್ಯಾರ್ , ನಾ ಹೊಲ್ಯಾರ್ ಲುಕ್ಷಾನ್ ಕರಲ್ಲಿ ರ್‍ಹಾಲ್ಯಾರ್, ತಿ ಮಿಯಾ ಭರ್ತಿ ಕರುನ್ ದಿತಾ.
19 ಮಿಯಾ ಪಾವ್ಲು ಖುದ್ದ್ ಮಾಜ್ಯಾ ಹಾತಿನ್ ಲಿವ್ತಾ, ತುಜೆ ರಿನ್ ಮಿಯಾ ಫಾರಿಕ್ ಕರ್ತಾ, ತುಜ್ಯಾ ಜಿವಾಕುಚ್ ತಿಯಾ ಮಾಜೆಸಾಟ್ನಿ ಎಕ್ ಉಪ್ಕಾರಾತ್ ಥವಲ್ಲೆ ಹಾಯ್ ಮನುನ್ ಯಾದ್ ಕರುನ್ ದಿತಲೆ ನಕ್ಕೊ ಮನುನ್ ಮಾಕಾ ದಿಸ್ತಾ.
20 ಬಗ್ ಮಾಜ್ಯಾ ಭಾವಾ, ಧನಿಯಾಸಾಟ್ನಿ ತಿಯಾಚ್ ಮಾಜ್ಯಾ ಉಪ್ಕಾರಾಕ್ ಪಡಲ್ಲೊ ಹೊವ್ಚೆ ಮನ್ತಲಿ ಮಾಜಿ ಆಶಾ, ತಸೆ ಹೊವ್ನ್ ಕ್ರಿಸ್ತಾತ್ ಮಾಜೊ ಮನ್ ಸಮಾದಾನಾನ್ ಭರಿ ಸಾರ್ಕೊ ಕರ್.
21 ಇಚಾರಲ್ಲೆ ತಿಯಾ ತಿರಸ್ಕಾರ್ ಕರಿನೆ ಮನ್ತಲ್ಯಾ ಬರೊಸ್ಯಾನ್ ಎವ್ಡೆಚ್ ನ್ಹಯ್, ಮಿಯಾ ಸಾಂಗಲ್ಲ್ಯಾನ್ಕಿ ಜಾಸ್ತಿಚೆ ತಿಯಾ ಕರ್ತೆ ಮನ್ತಲ್ಯಾ ಖಾತ್ರಿನ್ ಮಿಯಾ ತುಕಾ ಲಿವ್ತಾ.
22 ತಸೆಚ್ ಅನಿಎಕ್ ಉಪ್ಕಾರ್ಬಿ ಮಿಯಾ ತುಜೆಕ್ಡೆ ಮಾಗ್ತಾ ಮಾಕಾ ರ್‍ಹಾವ್ನ್ ಎಕ್ ಜಾಗೊ ತಯಾರ್ ಕರುನ್ ಥವ್; ತುಜ್ಯಾ ಮಾಗ್ನಿ ವೈನಾ ದೆವ್ ಮಾಕಾ ಸುಟ್ಕಾ ದಿವ್ನ್ ತುಮ್ಚೆಕ್ಡೆ ಘೆವ್ನ್ ಯೆತಾ ಮನುನ್ ಮಿಯಾ ಬರೊಸೊ ಕರ್ತಾ.
ಆಕ್ರಿಚೆ ನಮಸ್ಕಾರ್
23 ಕ್ರಿಸ್ತಾ ಜೆಜುಸಾಟ್ನಿ ಮಾಜ್ಯಾ ವಾಂಗ್ಡಾ ಬಂಧಿಖಾನ್ಯಾತ್ ಅಸಲ್ಲೊ ಎಪಾಪ್ರಾಸ್ ತುಕಾ ನಮಸ್ತೆ ಮನುಕ್ ಲಾಗ್ಲಾ.
24 ತಸೆಚ್ ಮಾಜೆ ವಾಂಗ್ಡಿ ಮಾರ್ಕ್, ಅರಸ್ತಾರ್ಖ್, ದೆಮಸ್ ಅನಿ ಲುಕ್ ತುಕಾ ನಮಸ್ಕಾರ್ ಧಾಡ್ತಾತ್.
25 ಅಮ್ಚ್ಯಾ ಧನಿಯಾ ಜೆಜು ಕ್ರಿಸ್ತಾಚಿ ಕುರ್ಪಾ ಅನಿ ಶಾಂತಿ ತುಜ್ಯಾ ಆತ್ಮ್ಯಾಚ್ಯಾ ವಾಂಗ್ಡಾ ರ್‍ಹಾಂವ್ದಿತ್.