8
Kúrísítõ ri átálágú ãmbúgú ũndĩ úꞌdí rĩ vé rĩ
1 Tã ã pá ãmbúgú rĩ, ĩri ꞌdĩ, ꞌbávé átálágú ãmbúgú rĩ mụ úrí vũrã ị̃njị̃ị́ ị̃njị̃ rĩ gé ꞌbụ̃ gé ꞌdãá Múngú vé drị́ ẹ̃ndẹ́pị gé.
2 ꞌBãkí ĩri ẹ̃zị́ ngaá átálágú ãmbúgú rú Gãkũ Múngú vé rĩ agá. Gãkũ ꞌdĩri, ĩri Jó áda, Úpí Múngú sị nĩ, adri ꞌyozú kínĩ, ꞌbá áda sị nĩ kuyé.
3 Atala ambugu rĩ pi ãrẽvú céré, kộpivé ẹ̃zị́ rizú fẽfẽ ꞌdụzú sẽzú Múngú ní, ãzini rizú rọ̃bọ̃ŋọ̃ zãzú. Lẽ átálágú ãmbúgú Yẹ́sụ̃ ã sẽ kpá ngá ãzi Múngú ní rọ̃bọ̃ŋọ̃ rú ĩndĩ.
4 Yẹ́sụ̃ ã adri té dõ nyọ̃ọ́kụ́ drị̃gé nõgó anigé, ícó té adrií átálágú rú ku, ãꞌdiãtãsĩyã atala ụrụkọ ọ́tụ́ ị́nọ́gọ́sị́ anigé kộpi ri rọ̃bọ̃ŋọ̃ zã sụ̃ tãị́mbị́ Mósẽ vé rĩ ní ꞌyoó rĩ tị́nị.
5 ꞌBo gãkũ Múngú vé kộpi ní rizú ẹ̃zị́ ngazú ꞌa ni gé vũ drị̃gé nõgó rĩ, iꞌda índríkíndrĩ Jó Múngú vé ꞌbụ̃ gé ꞌdãá rĩ. Mósẽ kã íꞌdó Gãkũ Múngú vé rĩ sịị́, Múngú átá ĩri ní tã ni ũkpó ũkpó kĩnĩ, “Lẽ mî údé ngá rĩ pi ãrẽvú céré sụ̃ má ní iꞌdaá mí ní írã Sĩnáyĩ vé rĩ drị̃gé ꞌdãá rĩ tị́nị.”
6 ꞌBo Múngú ĩpẽ Yẹ́sụ̃ ri nĩ, ẹ̃zị́ ĩri ní ngaá rĩ ndẽ ẹ̃zị́ atala ụ̃kụ ꞌdãꞌbée ní ngaá rĩ rá, ãꞌdiãtãsĩyã ũndĩ ĩri ní rụụ́ ꞌbâ ãsámvú ícízú Múngú be rĩ, ĩri múké, ndẽ ũndĩ ọ́tụ́ ụ̃kụ ꞌdãri rá.
7 Ũndĩ Múngú ní rụụ́ drị̃drị̃ ꞌdãri ã adri té dõ múké, Múngú ícó té gõó ũndĩ ãzi rụụ́ dị̃ị́ ku.
8 ꞌBo Múngú ndre tã ꞌbá rĩ pi ní ꞌoó rĩ adri múké ku, ĩri ní ꞌyozú kĩnĩ,
“Sâ ãzi ri ímụ́ ꞌdĩíꞌdĩ,
ma ímụ́ ũndĩ úꞌdí rụ
ꞌbá Ĩsẽrélẽ vé rĩ pi be,
ãzini ꞌbá Yụ́dã vé rĩ pi be.
9 Ũndĩ má ní lẽé rụụ́ ꞌdĩri adri sụ̃ ũndĩ
má ní ọ́tụ́ rụụ́ kộpi ẹ́ꞌbị́pị́ị,
má ní kộpi ẽ drị́ rụụ́
kộpi íjị́ ĩfũú ãngũ Ẽjẽpétõ vé rĩ agásĩ rĩ tị́nị ku,
ãꞌdiãtãsĩyã kộpi ꞌdụkí ũndĩ má ní rụụ́ rĩ vé tã ngaá kuyé,
má adi kộpi má drị́gé sĩ gí,
ma Úpí ꞌi, á ꞌyo tã ꞌdĩri nĩ.
10 Ma Úpí ꞌi, á ꞌyo nĩ,
ũndĩ má ní lẽé rụụ́ ꞌbá Ĩsẽrélẽ vé rĩ pi be rĩ, ĩri ꞌdíni.
Lókí ꞌdãri ã vụ́drị̃ gé,
ma ímụ́ mávé tãị́mbị́ sẽ fi kộpi ã úmĩ gé,
ãzini ma ímụ́ mávé tãị́mbị́ sĩ kộpi ẽ ẹ́sị́ agá.
Ma ímụ́ adri Múngú kộpivé ni,
kộpi ímụ́ adri ꞌbá mávé ni.
11 ꞌBá ãzi gõ ꞌbá ꞌí gãrã gá rĩ ímbá ku,
dõku ꞌbá ãzi gõ ꞌí ẹ́drị́pị ri ímbá ꞌyozú kínĩ, ‘Mî nị̃ Úpí Múngú ri’ ꞌdíni ku,
ãꞌdiãtãsĩyã kộpi céré ímụ́ ma nị̃ rá,
íꞌdózú ꞌbá ĩ ní ndreé kuú ẹ̃zị́ ãkó rĩ pi vúgá cĩmgbá cazú ꞌbá ambugu rĩ pi vú.
12 Ma kộpi trũ ĩvé ũnjĩkãnyã agásĩ rá,
á gõ kộpivé ũnjĩkãnyã ã tã ꞌbãá áwí mâ ẹ́sị́ agá ku.”
13 Ũndĩ úꞌdí Múngú ní rií tã ni átá ꞌdĩri lũ ꞌyozú kínĩ, ũndĩ ọ́tụ́ ꞌí ní rụụ́ drị̃drị̃ ꞌdãri nga nóni ẹ̃zị́ ku, ẹ̃sị̃ mãdã, ĩri ímụ́ adri ꞌdãáyo.