15
Mwaka wa saba
(Walawi 25:1-7)
1 “Kuuhelo wa kila mwaka wa saba molondigwa muleke kuwadai iwanhu madeni gao.
2 Vino vivo vonda mutende, kila munhu yamkopeshe miyage, yafute deni dijo, na sikuyageze kumdai kwavija Mndewa Imulungu mwenyego kalonga deni dijo difutigwe.
3 Modaha kuwadai iwanhu baki, lakini madeni gose ga ndugu zenu mugafute.
4 “Mndewa Imulungu, Imulungu wenu kowatendela ganogile mwiisi iyowagwaa iwe yenu na kokuwa kuduhu hata munhu imoja hagati yenu yonda yawe mkiwa,
5 kamba mwahamtegeleza goya Mndewa Imulungu, Imulungu wenu na kukweleleza malagizo gano goniwalagiza lelo.
6 Mndewa Imulungu, Imulungu wenu, kowatenda mumwede kamba viyawalongele kotenda. Na mweye mowakopesha wanhu wa isi nyingi, lakini mweye hamukopa bule. Na vivija mowatawala wanhu wa isi nyingi, lakini iwanhu wa isi azo honda wawatawale mweye.
7 “Kamba hagati yenu mweye hana ndugu yenu mkiwa, mna idibuga da isi ayo Mndewa Imulungu, Imulungu wenu iyowagwaa, sikumuwe wagila na sikumuleme kumtaza.
8 Lakini laveni na mumkopeshe kinhu chochose kilondigwa kwa heyo.
9 Muiteganye, sikumugelegeze vihile mmizoyo na kulonga, ‘Mwaka wa saba, umwaka wa kufuta madeni wammabehi,’ avo momgelegeza vihile ndugu yenu yeli mkiwa na hamumgwaa kinhu chochose, na heyo kodaha kumulilila Mndewa Imulungu mbuli yenu na mweye mokuwa na nzambi.
10 Mgweeni ndugu yenu mkiwa kuno mizoyo yenu kwatu, na sikumuwe na lusikisiki, kwavija kwa mbuli ayo, Mndewa Imulungu, Imulungu wenu kowatendela ganogile mzisang'hano zenu zose na kwa kila kinhu kimtenda.
11 Kwavija wanhu wakiwa na waja welibule kinhu hawaswela bule mwiisi, avo nowalagiza muwe na moyo unogile kwa ndugu zenu welibule kinhu na waja weli wakiwa mwiisi yenu.
Viilondigwa kuwatendela watumwa
(Kulawa 2:1-11)
12 “Kamba ndugu yako Muebulania, mbigalo hebu mtwanzi, yahauzigwa kumwako, yakusang'hanile kwa miyaka sita, lakini muumwaka wa saba umuleke yasegele.
13 Na vonda umuleke yasegele, sikuumuleke yasegele makono gaiyeka.
14 Umgwee kwa moyo unogile kwa gaja Mndewa Imulungu, Imulungu wako gayakutendele umwede, ng'hondolo na ndiya na divai.
15 Kumbukeni kamba mweye mukala watumwa ako mwiisi ya Misili na Mndewa Imulungu, Imulungu wenu, kawagombola, lekaavo lelo nowalagiza vivo.
16 “Lakini yahakulongela, ‘Sisegela kumwako,’ kwavija kokunogela gweye na iwanhu wa mng'anda yako na kolonda kukala na gweye,
17 avo sola sanziya na utobole gwiti jake mbaka ayo isanziya ihome umulango na heyo kokuwa mtumwa wako siku zose. Vivija utende vivo kwa mtumwa wako wa kitwanzi.
18 Vivija sikuukone vidala kumulekesa mtumwa wako, kwavija kakusang'hanila kwa kipindi cha miyaka sita na kalihigwa nusu ya sente iyolihigwa kibaluwa. Tenda vivo na Mndewa Imulungu, Imulungu wako kokutendela ganogile kwa kila kinhu kiutenda.
Wana wa chaudele wa ng'ombe na ng'hondolo
19 “Mulavile Mndewa Imulungu, Imulungu wako wana chaudele wose wa kimbigalo wa fugo yako ya ng'ombe na ng'hondolo. Sikuuwasang'hanile ng'ombe awo na sikuuikanhe imibahila ya ng'hondolo awo.
20 Kila mwaka, gweye na wanhu wa mng'anda mmwako moja nyama ya wanyama awo kuulongozi wa Mndewa Imulungu, Imulungu wenu, hanhu aho honda yahasagule Mndewa Imulungu.
21 Lakini kamba mnyama ayo kana kilema chochose, kamba msuwameso hebu magulu gake galemala hebu kana kinhu chochose mulukuli, sikuumulave nhosa kwa Mndewa Imulungu, Imulungu wako.
22 Mnyama kamba ayo modaha kumuja kuko kudibuga jako, vivija wanhu wose ong'ala na wafitile odaha kumuja kamba viwajaga mhala hebu swala,
23 lakini sikumuje damu yake, ila muite hasi kamba mazi.