16
Nyimwilinyimwili ya Pasaka
(Kulawa 12:1-20)
1 “Muugoge mwezi wa Abibu na mudeng'helele Pasaka ya Mndewa Imulungu, Imulungu wenu. Kwavija muumwezi awo wa Abibu, Mndewa Imulungu, Imulungu wenu, kawalava mwiisi ya Misili ikilo.
2 Mmulavile Mndewa Imulungu, Imulungu wenu nhosa ya Pasaka kulawa mzifugo zenu za ng'hondolo hebu ng'ombe, hanhu aho honda yahasagule Mndewa Imulungu kwika twaga jake.
3 Sikumuje nhosa ayo hamoja na magate gageligwe hamila. Kwa kipindi cha siku saba dieni magate hagageligwe hamila, magate gago kolagusa kugaya, kwavija musegela mwiisi ya Misili himahima, avo kipindi chose chonda mukale moikumbuka siku ayo yumusegele mwiisi ya Misili.
4 Kwa kipindi acho cha siku saba munhu yoyose mwiisi yenu sikuyeke hamila mng'anda yake, na inyama ya mnyama yachinjigwe ichungulo ya siku ya ichanduso sikuisigale mbaka imitondo.
5 “Sikumulave nhosa ya Pasaka kudibuga jojose dimulonda mweye mna gamabuga gonda yawagwee Mndewa Imulungu, Imulungu wenu,
6 lakini muilavile hanhu aho Mndewa Imulungu, Imulungu wenu honda yahasagule kwika twaga jake, aho mulave nhosa ya Pasaka ichungulo, saa iija yumusegele mwiisi ya Misili.
7 Nyama ayo muiteleke na muidile hanhu aho Mndewa Imulungu, Imulungu wenu honda yahasagule, na imitondo mubwele mna ivibanda venu.
8 Kwa siku sita muje magate hagageligwe hamila, na kudisiku da saba mutende mting'hano mkulu wa kumtambikila Mndewa Imulungu, Imulungu wenu, na sikumsang'hane sang'hano yoyose kudisiku dijo.
Nyimwilinyimwili ya mawiki
(Kulawa 34:22; Walawi 23:15-21)
9 “Peteni mawiki saba, tangu vimusonga kusenga indiya.
10 Abaho mutende nyimwilinyimwili ya Mawiki mbuli ya Mndewa Imulungu, Imulungu wenu, kwa kulava nhosa yumulonda, na mulave kamba Mndewa Imulungu, Imulungu wenu, viyawatendile mumwede.
11 Mudeng'helele kuulongozi wa Mndewa Imulungu, Imulungu wenu, mweye hamoja na wanenu wa kimbigalo na wa ikitwanzi, wasang'hanaji zenu wa ikimbigalo na wa ikitwanzi, Walawi na iwanhu baki na iwana wakiwa na wagane iwokala hamoja na mweye. Tendeni gago hanhu aho Mndewa Imulungu, Imulungu wenu honda yahasagule kwika twaga jake.
12 Kumbukeni kamba mukala watumwa ako Misili, avo iteganyeni mugagoge mafundizo gano.
Nyimwilinyimwili ya Vibanda
(Walawi 23:33-43; Kupetigwa 29:12-39)
13 “Mwahamambukiza kubiga ndiya yenu na kukama zabibu zenu, tendeni nyimwilinyimwili ya Vibanda kwa kipindi cha siku saba.
14 Muideng'helele nyimwilinyimwili ayo, mweye na wanenu wa ikimbigalo na wa ikitwanzi, wasang'hanaji zenu wa ikimbigalo na wa ikitwanzi na Walawi na iwanhu baki na iwana wakiwa na wagane iwokala hamoja na mweye mna gamabuga genu.
15 Kwa siku saba mumtendele nyimwilinyimwili Mndewa Imulungu, Imulungu wenu, hanhu aho honda yahasagule, kwavija Mndewa Imulungu, Imulungu wenu kowatendela ganogile mna indiya yenu yose na mna zisang'hano zenu zose, na mweye modeng'helela.
16 “Wambigalo wose wa isi yenu waiting'hane kuulongozi wa Mndewa Imulungu, Imulungu wenu, miyanza midatu kila mwaka, hanhu aho honda yahasagule. Waiting'hane kipindi cha nyimwilinyimwili ya magate hagageligwe hamila, na nyimwilinyimwili ya mawiki na nyimwilinyimwili ya vibanda. Sikuwachole kuulongozi wa Mndewa Imulungu makono gaiyeka.
17 Kila munhu yalave kamba viyodaha kamba Mndewa Imulungu, Imulungu wenu viyamtendile yamwede.
Haki za iwanhu
18 “Musagule wasemi na vilongozi kulawa mna gamakabila genu mna gamabuga gonda yawagwee Mndewa Imulungu, Imulungu wenu, na hewo wawataguse iwanhu kamba viilondigwa.
19 Sikumuihinduse haki, sikumubagule na sikumutogole kubokela hongo kwavija hongo dotula meso ga wanhu weli na nzewele na kuhindusa kitala cha munhu yanogile.
20 Mutende haki na muikweleleze, ili mudahe kukala na kuisola isi iyowagwaa Mndewa Imulungu, Imulungu wenu.
21 “Sikumusimike imhanda ya kutambikila imilungu Ashela behi na upango wa nhosa onda mumzengele Mndewa Imulungu, Imulungu wenu.
22 Na sikumusimike mibwe ya kutambikila. Kinhu acho chomgevuza Mndewa Imulungu, Imulungu wenu.