2
Wanhu okwanga kuluwala
1 “Abaho tuhinduka tufunga mwanza wa kuchola kuluwala kubitila nzila ya bahali ya Shamu, kamba Mndewa Imulungu viyanongele. Kwa siku nyingi tung'hali tuzunguluka mnzila kuvigongo va isi ya Seili.
2 “Abaho Mndewa Imulungu kanongela,
3 ‘Mwanga hano kuvigongo kwa siku nyingi, avo sambi hindukeni umwambu wa kasikazini.
4 Walagize iwanhu, “Sambi mobitila mwiisi ya kuvigongo va Seili, isi ya ndugu zenu wanhu wa ulelo wa Esau. Hewo owadumba mweye, lakini muiteganye,
5 sikumuitowe na hewo kwavija siwagwaa bule hanhu hohose ha isi yao. Siwagwaa hata hanhu hadodo hakukanyaga lwayo. Isi ayo ya kuvigongo va Seili niwagwaa wanhu wa ulelo wa Esau iwe yao.
6 Mugule ndiya yonda muje na mazi gonda mung'we.” ’
7 “Mndewa Imulungu, Imulungu wenu kawatenda mumwede mna zisang'hano zenu zose za makono genu. Kawalola goya mmwanza wenu wose wa kukiwala kino kikulu. Miyaka yose ayo malongo mane Mndewa Imulungu, Imulungu wenu, kakala hamoja na mweye na hamuswelile kinhu chochose.
8 “Avo tugendelela na mwanza wetu tuwabita ndugu zetu, awo iwanhu wa ulelo wa Esau wakalile ako Seili, tuileka nzila ya kubitila Alaba, ilawa Elati na Esioni Gebeli na tubitila nzila ya kuluwala lwa Moabu.
9 Abaho Mndewa Imulungu kanongela, ‘Sikumuwagaze wanhu wa Moabu hebu kuwadovula ili muitowe, kwavija siwagwaa bule isi ayo. Niye niwagwaa isi ayo ya Ali iwanhu wa ulelo wa Lutu kamba uhazi wao.’ ”
10 Umwaka isi ayo ya Ali wakala wanhu wengi ng'hani wakalile na nguvu wakemigwe Waemi na wakala watali kamba Waanaki.
11 Kamba viweli Waanaki, wanhu awo wakemigwa Walefai, lakini wanhu wa Moabu wawakema Waemi.
12 Vivija ako umwaka Waholi wakala okala ako Seili, lakini wanhu wa ulelo wa Esau wawawinga na wawakoma, abaho hewo wakala mwiisi ayo kamba vija wanhu wa Izilaeli viwatendile ako kuna iisi iyawagwelele Mndewa Imulungu.
13 “Mndewa Imulungu katulongela, ‘Segeleni muloke bonde da Zeledi.’ Avo tuloka bonde da Zeledi.
14 Ibita miyaka malongo madatu na nane tangu vitusegele Kadeshi Balinea mbaka vitulokile bonde da Zeledi. Kipindi acho iwanhu wose wadahile kuitowa kuna ing'hondo wafa, kamba Mndewa Imulungu viyaiduwile wofa.
15 Mndewa Imulungu mwenyego kagendelela kuwakoboza ako kuna ing'hambi mbaka wose wafa.
16 “Avo viwafile wanhu awo wadahile kuchola kuitowa kuna ing'hondo,
17 Mndewa Imulungu kanongela,
18 ‘Lelo moiloka imbaka ya isi ya Moabu kubitila buga da Ali.
19 Mwahavika mwiisi ya Waamoni sikumuwagaze hebu kuwadovula ili kuitowa na hewo kwavija niye siwagwaa bule mweye isi ayo ya Waamoni. Niye niwagwaa isi ayo wanhu wa ulelo wa Lutu.’ ”
20 Vivija isi ayo yojuwigwa kamba isi ya Walefai, ako umwaka Walefai wakala mwiisi ayo. Lakini Waamoni wawagwaa twaga da Wazamuzumi.
21 Wanhu awo wakala wengi na wakala na nguvu na watali kamba Waanaki. Lakini Mndewa Imulungu kawakoboza aho viwezile Waamoni awo waisola isi yao na wakala mumo.
22 Mndewa Imulungu katenda kamba viyawatendele wanhu wa ulelo wa Esau, Waedomu, awo wakalile ako Seili. Kawakoma Waholi wose kipindi viwavikile Waedomu, waisola isi yao na wakala mumo mbaka lelo.
23 Waavi wakala ako aho ichanduso mna ivijiji avo mbaka Gaza. Wakafutoli kulawa kisiwa cha Kilete wawakoma wose, na hewo wakala mwiisi ayo hanhu hao.
24 “Abaho Mndewa Imulungu katulongela, ‘Avo, songeni umwanza. Lokeni kubonde da Alinoni. Niye nimgela mmakono genu Sihoni mndewa wa Waamoli wa Heshiboni na isi yake. Mtoweni abaho muisole isi yake.
25 Lelo nosonga kuwatenda wanhu wose mwiisi wengile bwembwe na kuwadumba mweye, ohulika mbuli zenu na ogwaya na kunyawanyawa.’
Mndewa Sihoni kohumwa na Waizilaeli
(Kupetigwa 21:21-30)
26 “Avo, nituma wanhu kulawa kuluwala lwa Kedemoti wachole kwa mndewa Sihoni wa ako Heshiboni na usenga uno wa tindiwalo.
27 ‘Tuleke tubitile mwiisi yako, tobita mnzila tochola bila kuhinduka ukumoso hebu ukudila.
28 Tuuzile ndiya na mazi ga kung'wa kwa vihande va shaba. Siye tolonda utuleke tubite mwiisi yako,
29 kamba viwatutendele iwanhu wa ulelo wa Esau okala ako Seili na wanhu wa Moabu okala ako Ali, mbaka tuloke lwanda lwa Yolidani tuvike mwiisi iyotugwaa Mndewa Imulungu, Imulungu wetu.’
30 “Lakini Sihoni mndewa wa Heshiboni katulemela sikutubite mwiisi yake. Mndewa Imulungu, Imulungu wenu kaditenda zoyo jake diwe dala na yawe msede ili yamgele mmakono genu na muisole isi yake kamba viili lelo.
31 “Abaho Mndewa Imulungu kanongela, ‘Sambi nimgela mmakono genu mndewa Sihoni na isi yake, songeni kuisola isi yake iwe yenu.’ ”
32 Abaho mndewa Sihoni kalawa na wakalizi wake wose weza kuitowa na siye behi ya buga da Yahasa.
33 Mndewa Imulungu, Imulungu wetu kamgela mmakono getu na siye tumkoma, hamoja na wanage wa kimbigalo na iwakalizi wake wose.
34 Kipindi acho tugananga mabuga gao gose na tuwakoma wose, wambigalo na watwanzi na iwana. Hatumulekile munhu yoyose mgima.
35 Vinhu vose vikalile kuko vikala vetu, fugo yose na ivinhu vose va kudibuga dijo.
36 Kusongela Aloeli buga dili kumgwazo wa kubonde da Alinoni na buga dili kumgwazo wa bonde da Gileadi, kuduhu buga dikalile digangamale mbaka siye tulemelwe kudisola. Mndewa Imulungu, Imulungu wetu, kagagela mmakono getu mabuga gose.
37 Lakini hatuikwesele isi ya Waamoni hebu mwiingema ya lwanda lwa Yaboki hebu mwiisi ya kuvigongo hebu hanhu hohose hayatugomese Mndewa Imulungu, Imulungu wetu.