20
Mbuli ya ng'hondo
1 “Mwahachola kuna ing'hondo kuitowa na iwanhu owehila, na mokona falasi na mituka, na wakalizi wengi kubanza mweye, sikumuwadumbe, kwavija Mndewa Imulungu, Imulungu wenu, yawalavile mwiisi ya Misili kokuwa hamoja na mweye.
2 Mung'hali hamnasonga kuitowa, imulava nhosa yalongole kuulongozi na yawalongele iwanhu,
3 ‘Tegelezeni mweye wanhu wa Izilaeli! Sambi mosonga kuitowa na iwanhu owehila. Sikumuwadumbe hebu kunyawanyawa hebu kugwaya kwa bwembwe,
4 kwavija Mndewa Imulungu, Imulungu wenu ayo yochola hamoja na mweye kuitowa na iwanhu owehila mbuli yenu ili yawatende muhume.’
5 “Abaho ivilongozi wawalongele iwanhu, ‘Vino kuna munhu yoyose hano yazengile ng'anda ya sambi lakini yang'hali hana ilimbula? Yabwele ukae, sikuyafe kuna ing'hondo na munhu iyagwe yailimbule ing'anda ayo.
6 Vino kuna munhu yoyose hano yahandile mizabibu na yang'hali hanagalimbula gamatunda? Yabwele ukae, sikuyafe kuna ing'hondo na munhu iyagwe yagalimbule.
7 Vino kuna mbigalo yoyose hano yamfungile zengele mtwanzi ili yawe mwehe wake? Yabwele ukae sikuyafe kuna ing'hondo na mbigalo iyagwe yamsole imtwanzi.’
8 Vilongozi wagendelele kuwalongela iwanhu, ‘Vino kuna munhu yoyose hano konyawanyawa? Yabwele ukae sikuyawatende wayage wanyawenyawe kamba heyo.’
9 Vilongozi wahamambukiza kulonga na iwanhu, wawasagule ivilongozi wa iwakalizi wawalongoze iwanhu.
10 “Mwahalonda kudivamila buga, tanhu wagweleleni iwanhu nyafasi kamba odaha kulonga walemelwa.
11 Wenekae wa buga dijo wahalonda tindiwalo na kuilava kumwenu, aho wanhu wose wali mumo owasang'hanila na osang'hana kwa kunanahizigwa.
12 Lakini wahalema kutenda tindiwalo na mweye ila oitowa ng'hondo na mweye, baho mudivamile buga jao.
13 Mndewa Imulungu, Imulungu wenu kodigela mmakono genu na muwakome iwambigalo wose wali mumo,
14 lakini iwatwanzi na iwana na zifugo na vinhu vose vili kudibuga dijo, muvisole. Modaha kudeng'helela vinhu vija vimusolile va iwanhu owehila viyawagwelele Mndewa Imulungu, Imulungu wenu.
15 Vino vivo vonda mutende kwa mabuga gose geli kutali na mweye, siyo mabuga ga isi imugweleligwa kuisola.
16 “Lakini mna gamabuga ga isi ayo iyowagwaa Mndewa Imulungu, Imulungu wenu, sikumuleke kinhu chochose king'hali kigima.
17 Muwakome iwanhu wose, Wahiti na Waamoli na Wakanaani na Wapelizi na Wahivi na Wayebusi kamba Mndewa Imulungu, Imulungu wenu viyawalagize,
18 buleavo, owafunza kukweleleza mila zao zigevuza ziwatendaga kwa imilungu yao, avo na mweye motenda nzambi kwa Mndewa Imulungu, Imulungu wenu.
19 “Mwahadizunguluka buga kwa siku nyingi, na mwahadisola dibuga, sikumuinange imibiki ya matunda kwa kuikanha na shoka. Vino imibiki awo wanhu mbaka muibanange? Modaha kugaja matunda ga imibiki ayo lakini sikumuikanhe.
20 Modaha kukanha mibiki ija iiyeka yumujuwa hailelaga matunda ili muzengele vilingo kipindi acho vimudizunguluka dibuga ili mudisole.