21
Mbuli ya ifa haijuwigwa
1 “Munhu yahakomigwa kuluwala mna iisi iyowagwaa Mndewa Imulungu, Imulungu wenu iwe yenu na mweye hamujuwa nani yamkomile,
2 iwavele na iwasemi wenu wachole kupima utali wa aho umtufi wa imunhu hauli mbaka wapate dibuga dili behi na mtufi awo.
3 Abaho iwavele wa buga dili behi na uja umtufi wasole bofu da ng'ombe ding'hali hadisang'haniligwa sang'hano yoyose hebu kugeligwa nila.
4 Na hewo wamuhumuluse ing'ombe kubonde kuna ulwanda haunyalaga, na kubonde hadilimagwa hebu kuhandigwa, kuko wambene isingo.
5 Vivija iwalava nhosa wa kabila da Lawi olondigwa wawe baho. Mndewa Imulungu, Imulungu wenu kawasagula wamsang'hanile na wawatambikile iwanhu kwa twaga jake. Vivija hewo wagweleligwa udahi kwa mbuli yoyose na migomvi.
6 Ayo ing'ombe yahabenigwa isingo, iwavele wose wa buga dijo dili behi na umtufi wa munhu ayo yakomigwe, wanawe makono gao kwa mazi uchanha mwa ayo ing'ombe,
7 na walonge, ‘Hatumkomile bule imunhu ino na hatumjuwile bule imunhu yamkomile.
8 Go Mndewa Imulungu, uditogole loholo dino da iwanhu wako wa Izilaeli, awo uwagombole, sikuugelegeze gehile ga iwanhu wako wa Izilaeli, kwa ifa ya munhu yelibule kitala, lakini ugele kumgongo.’
9 Avo, mwahatenda viyolonda Mndewa Imulungu mokuwa mduhu kitala cha ifa ya munhu ayo.
Watwanzi wafungwa kulawa kuna ing'hondo
10 “Mwahachola kuna ing'hondo kuitowa na iwanhu owehila, na Mndewa Imulungu, Imulungu wenu kawatenda muhume, na muwasola iwanhu awo kuno wang'hali wagima,
11 na kamba imoja wenu komona mtwanzi yanogile mna iwanhu awo wamuwasolile na kolonda kumsola yawe mwehe wake,
12 avo ayo imbigalo yamsole na yamgale ukae kumwake, na yambee dipala na yamwengule zing'hombe,
13 na yasaule iviwalo viyezile navo. Yakale kwa mwezi mgima yamulilile tatake na mamake. Abaho kodaha kumsola, kokuwa mwehe wako na gweye mbigalo wake.
14 Kamba ako kumwande humulonda bule, muleke yachole kuyolonda, sikuumuuze, na sikuumtende mtumwa kwavija kumnanga.
Mwana chaudele
15 “Kamba mbigalo imoja kana wehe wabili na komnogela imoja kubanza iyagwe. Na iwatwanzi awo wamulelela wana wa kimbigalo, na mwana chaudele kaleligwa na ayo imtwanzi hamnogela,
16 yahavika siku ya kuwagwaa awo iwana uhazi, ayo itata munhu halondigwa bule kumtenda ija imwana wa mwehe yomnogela kamba ayo imwana wa chaudele na kumuleka ija imwana wa imtwanzi hamnogela yeli imwana wa chaudele.
17 Kolondigwa yamtogole ija imwana wa chaudele, imwana wa ija imtwanzi hamnogela, na yamgwee kija kilondigwa, miyanza mibili ya vinhu vake vose.
Mwana mdulu
18 “Kamba munhu kana mwana mdulu na mtundu, hamtegeleza tatake hebu mamake hata kamba yahachapigwa,
19 avo, tata munhu na mama munhu wamgoge mwana ayo na wamgale kwa iwavele kumulango wa buga.
20 Tata na mama wa mwana ayo wawalongele iwavele wa dibuga, ‘Mwanetu mdulu na mtundu, halonda kututegeleza, mmelo na mlevi.’
21 Baho iwanhu wa buga dijo wamtowe mabwe mwana ayo mbaka yafe. Avo kwa nzila ayo mogasegesa gehile hagati yenu. Kila munhu mwiisi ya Izilaeli kuihulika mbuli ayo na kodumba.
Malagizo gayagwe
22 “Kamba munhu katenda kitala kilondigwa yakomigwe na kakomigwa na umtufi utumbikigwa mdibiki,
23 mtufi wake sikuulekigwe mdibiki kilo kigima, lakini muuzike siku didijo. Kwavija munhu yawambigwe mdibiki kaduwiligwa na Mndewa Imulungu na mweye hamulondigwa kuifitiza isi yonda yawagwelele Mndewa Imulungu, Imulungu wenu, iwe yenu.