23
Wanhu wagomesigwe kwingila mumting'hano wa Imulungu
1 “Mbigalo yoyose yahondigwe zimhumbu hebu yakanhigwe kimbigalo sikuyengile mumting'hano wa wanhu wa Mndewa Imulungu.
2 “Mwana halamu yoyose hebu ulelo wake mbaka ulelo wa longo sikuyengile mumting'hano wa wanhu wa Mndewa Imulungu.
3 “Muamoni hebu Mmoabu yoyose na ulelo wao mbaka ulelo wa longo sikuwengile mumting'hano wa wanhu wa Mndewa Imulungu,
4 kwavija walema kuwagwelela ndiya na mazi vimukalile mnzila molawa Misili, na wamgwaa kibaluwa Balaamu mwanage Beoli kulawa Petoli ako Mesopotamia yeze yawaduwile mweye.
5 Lakini Mndewa Imulungu, Imulungu wenu hamtegeleze bule Balaamu ila kagimbula gamakungu gawa kinhu kinogile, kwavija Mndewa Imulungu, Imulungu wenu kawanogela.
6 Avo, sikumuilumbe na hewo hebu kuwatenda wamwede siku zose zonda mukale.
7 “Sikumuwehile Waedomu kwavija hewo ndugu zenu, na sikumuwehile Wamisili kwavija mukala mwiisi yao kamba wanhu baki.
8 Ulelo wao kusongela wa kadatu odaha kwingila mumting'hano wa wanhu wa Mndewa Imulungu.
Malagizo mbuli ya kufita mna ing'hambi
9 “Mwahachola kuna ing'hondo na kukala mwiing'hambi, kila munhu yaiteganye na kinhu chochose kifitile.
10 Kamba hagati yenu hana munhu yoyose kafita kwavija ikilo chelesi kimulawa, munhu ayo yalawe kunze ya ing'hambi. Sikuyengile kabili,
11 lakini yahavika ichungulo yakoge, na zuwa dahengila kodaha kubwela kuna ing'hambi.
12 “Muwe na hanhu kunze ya ing'hambi honda mucholege kucholo.
13 Mna ivinhu venu molondigwa muwe na magembe, mwahachola kucholo, muhimbe simo na mufukile mavi genu.
14 Ng'hambi yenu yolondigwa ing'ale, kwavija Mndewa Imulungu, Imulungu wenu kokwiza hagati yenu ili yawakombole na yawagele mmakono genu iwanhu owehila. Avo sikumutende yachone kinhu kifitile hagati yenu, buleavo kowaleka.
Malagizo gayagwe
15 “Sikuumbweze kwa mkulu wake mtumwa yamkimbile mkulu wake na kwiza kumwako.
16 Muleke yakale hamoja na gweye hanhu aho honda yahasagule, na gweye sikuumonele.
17 “Mwiizilaeli yoyose mbigalo hebu mtwanzi sikuyatende ugoni mzing'anda za imilungu iyagwe.
18 Vivija sente yoyose munhu yaipatile kwa ugoni sikuyaigale kwa Mndewa Imulungu, Imulungu wenu kwa kulonda kuliha kija kiyaiduwile, kwavija mbigalo hebu mtwanzi yotenda ugoni kamba awo, komgevuza Mndewa Imulungu.
19 “Sikuumkopeshe Mwiizilaeli miyago kinhu na ulonde yakubwezele na nyongeza, iwe sente hebu ndiya hebu kinhu chochose kikopeshigwa na kubwezigwa na nyongeza.
20 Kodaha kumkopesha munhu baki na kokubwezela na nyongeza, lakini Mwiizilaeli miyago sikuulonde yakubwezele na nyongeza, na Mndewa Imulungu, Imulungu wako kokutenda umwede mzisang'hano zako zose zonda usang'hane mwiisi imuchola kuisola.
21 “Wahaiduwila kinhu kwa Mndewa Imulungu, Imulungu wako, sikuukawe kukivikiza, kwavija Mndewa Imulungu, Imulungu wako kokilonda kulawa kumwako, na gweye kokuwa na nzambi.
22 Lakini wahaleka kuiduwila, hutenda nzambi bule.
23 Uiteganye kolondigwa ugavikize gaja gose gauiduwile kwa mulomo wako, kwavija kumulongela Mndewa Imulungu, Imulungu wako kwa kulonda mwenyego.
24 “Wahabita mumgunda wa mizabibu wa miyago, kodaha kubawa zabibu na kuzija vija viudaha, lakini sikuubawe na kwika mkigelo chako.
25 Wahabita mumgunda wa ngano wa miyago kodaha kuhulula na kufigisa na kuja, lakini sikuusole isengo na kusenga ingano.