24
Nyasa na kusola kabili
1 “Kamba mbigalo yahasola mtwanzi na abaho ako kumwande komwihila kwavija kona kinhu hakimnogela kumwake, avo mbigalo ayo yahamgwaa kibua cha nyasa, na komuwinga yasegele ukae kumwake,
2 na mtwanzi ayo yahasoligwa na mbigalo iyagwe,
3 na mbigalo ayo wa kabili vivija komwihila na komgwaa kibua cha nyasa mtwanzi ayo na komuwinga yasegele ukae kumwake hebu mbigalo ayo yamsolile yahafa,
4 avo ayo mbigalo wa ichanduso halondigwa yamsole kabili mtwanzi ayo kwavija kafitizigwa. Avo sikumugale gehile mwiisi iyowagwaa Mndewa Imulungu, Imulungu wenu iwe yenu.
Malagizo gayagwe
5 “Mbigalo yahasola mwehe sambi sambi sikuyachole kuna ing'hondo na sikuyagweleligwe sang'hano yoyose, yalekigwe yabwihile mwaka mgima, ili yakale ukae kumwake na yadeng'helele na mwehe wake.
6 “Munhu yoyose sikuyabokele dibwe da uchanha hebu da hasi da kudugila kamba lahani, wahatenda vivo kamba kosola ugima wa munhu ayo.
7 “Munhu yoyose yahamwiba Mwiizilaeli miyage na kumtenda mtumwa wake hebu komchuuza muutumwa, munhu ayo kolondigwa yakomigwe. Kwa nzila ayo mogasegesa gehile hagati yenu.
8 “Kamba munhu yahawa na utamu wa dikulu molondigwa mugagoge goya malagizo ga Iwalawi. Kamba viniwalagize hewo vivo vonda mukweleleze goya.
9 Kumbukeni Mndewa Imulungu, Imulungu wenu viyamtendele Miliamu vimukalile mmwanza kulawa Misili.
10 “Wahamkopesha kinhu miyago, sikuwingile mng'anda yake kusola lahani.
11 Wime kunze na umuleke imunhu yuumdai yakugalile mwenyego ayo ilehani.
12 Kamba munhu ayo mkiwa na lahani yake mgolole, sikuukale nao kilo kigima.
13 Umbwezele mgolole wake kila siku ichungulo ili yaigubike. Na heyo kokupulila umwede, na Mndewa Imulungu, Imulungu wako kokona kunoga mgameso gake.
14 “Sikuumbunze kibaluwa wako yeli mkiwa na ngaengae, yawe Mwiizilaeli miyago hebu munhu baki iyokala kuna gamabuga genu.
15 Kila siku, zuwa hadinakwingila umlihe fungu jake da sang'hano ya siku ayo, kwavija heyo mkiwa na kobeta kinhu acho, buleavo komulilila Mndewa Imulungu na gweye kokuwa na nzambi.
16 “Tata na mama sikuwakomigwe kwa gehile ga wanao, vivija wana sikuwakomigwe kwa gehile ga tata zao na mama zao. Kila munhu yakomigwe kwa gehile gake mwenyego.
17 “Sikumuihinduse haki ya iwanhu baki na iwana iwakiwa. Sikumusole kiwalo cha mgane na kukika lahani.
18 Kumbukeni kamba mweye mukala watumwa mwiisi ya Misili, na Mndewa Imulungu, Imulungu wenu kawagombola kulawa kuko, lekaavo nowagwaa lagizo dijo.
19 “Mwahasenga mmigunda yenu na kuisemwa viyagwe sikumubwele kukisogo kusalata vija visigale, lakini muwalekele iwanhu baki na iwana iwakiwa na wagane, ili Mndewa Imulungu, Imulungu wenu yawatendele ganogile mzisang'hano zenu zose.
20 Mwahatigisa mizeituni yenu kipindi cha kubawa, sikumubwelele kutigisa kabili ila muwalekele iwanhu baki na iwana iwakiwa na wagane.
21 Mwahabawa zabibu, sikumubwele kukisogo kubawa zabibu zisigale ila muwalekele iwanhu baki na iwana iwakiwa na wagane.
22 Kumbukeni kamba mweye mukala watumwa mwiisi ya Misili. Lekaavo nowagwaa lagizo dino.