27
Malagizo ga Imulungu gandikigwe mna imibwe
1 Abaho Musa na iwavele wa Izilaeli kawalongela iwanhu, “Mugagoge malagizo gose goniwalagiza lelo.
2 Siku dijo mwahaloka lwanda lwa Yolidani na kwingila mwiisi iyalongile Mndewa Imulungu, Imulungu wenu kowagwaa, musimike mibwe mikulu na muikuluge kwa ulongo mzelu.
3 Mgandike malagizo gano gose mgamabwe gago, mwahengila mwiisi iyowagwaa Mndewa Imulungu, Imulungu wenu, isi imemile maziwa na uki kamba Mndewa Imulungu, Imulungu wenu viyawalongele iwahenga zenu.
4 Mwahaloka umwambu wa lwanda lwa Yolidani isimikeni mibwe ayo kulugongo lwa Ebali kamba viniwalagiza lelo na muikuluge kwa ulongo mzelu.
5 Mumzengele Mndewa Imulungu, Imulungu wenu upango wa nhosa kwa mabwe hagasongoligwe.
6 Ona, upango wowose onda mumzengele Mndewa Imulungu, Imulungu wenu uzengigwe kwa mabwe hagasongoligwe. Uchanha ya upango awo mmulavile Mndewa Imulungu, Imulungu wenu nhosa za kusoma moto.
7 Mmulavile nhosa za kugala kuilumba, na mudile aho na kudeng'helela kuulongozi wa Mndewa Imulungu, Imulungu wenu.
8 Mugandike goya uchanha ya mibwe ayo malagizo gano gose.”
9 Avo Musa na Iwalawi, iwalava nhosa kawalongela iwanhu wose wa Izilaeli, “Nyamaleni mnitegeleze mweye wanhu wa Izilaeli. Lelo didino mweye muwa wanhu wa Mndewa Imulungu, Imulungu wenu.
10 Avo, mumtegeleze Mndewa Imulungu, Imulungu wenu, na mugagoge malagizo gake na mafundizo gake goniwalagiza lelo.”
Makungu ga kuleka kutegeleza
11 Siku ayo Musa kawalagiza iwanhu kalonga,
12 “Mwahaloka ulwanda lwa Yolidani makabila gano geme kulugongo lwa Gelizimu kipindi mbuli za kutambika vizilongigwa, Simeoni na Lawi na Yuda na Isakali na Yusufu na Benjamini.
13 Na makabila gano geme kulugongo lwa Ebali kipindi makungu vigolongigwa. Lubeni na Gadi na Asheli na Zabuloni na Dani na Nafutali.
14 Na Iwalawi walonge kwa sauti ng'hulu kwa iwanhu wose wa Izilaeli,
15 “ ‘Yaduwiligwe munhu yoyose yosongola kinyago hebu yolumbula zuma kwa moto na kutenda kinyago, kinhu kitendigwe kwa makono ga fundi na kukitambikila kinyelegezi kinhu kimgevuza Mndewa Imulungu, Imulungu wenu.’ Na wanhu wose wedike, ‘Ona!’
16 “ ‘Yaduwiligwe munhu yoyose yolema kumtegeleza tatake na mamake.’ Na wanhu wose wedike, ‘Ona!’
17 “ ‘Yaduwiligwe munhu yoyose yokwesa kumgwazo dibwe dilagusa imbaka na miyage.’ Na wanhu wose wedike, ‘Ona!’
18 “ ‘Yaduwiligwe munhu yomulongoza msuwameso mnzila imwagiza.’ Na wanhu wose wedike, ‘Ona!’
19 “ ‘Yaduwiligwe munhu yoyose yohindula ihaki kwa kumonela munhu baki hebu mwana mkiwa hebu mgane.’ Na wanhu wose wedike, ‘Ona!’
20 “ ‘Yaduwiligwe mbigalo yoyose yomuwasa mtwanzi wa tatake, kwavija komgela kinyala tatake.’ Na wanhu wose wedike, ‘Ona!’
21 “ ‘Yaduwiligwe munhu yoyose yomuwasa mnyama yoyose.’ Na wanhu wose wedike, ‘Ona!’
22 “ ‘Yaduwiligwe munhu yoyose yomuwasa lumbu jake yawe mndele wa tatake hebu mndele wa mamake.’ Na wanhu wose wedike, ‘Ona!’
23 “ ‘Yaduwiligwe munhu yoyose yomuwasa mama mkwe yake.’ Na wanhu wose wedike, ‘Ona!’
24 “ ‘Yaduwiligwe munhu yoyose yomkoma munhu kinyelegezi.’ Na wanhu wose wedike, ‘Ona!’
25 “ ‘Yaduwiligwe munhu yoyose yobokela hongo ili yamkome munhu hatendile dihile.’ Na wanhu wose wedike, ‘Ona!’
26 “ ‘Yaduwiligwe munhu yoyose yolema kugagoga malagizo gano.’ Na wanhu wose wedike, ‘Ona!’