31
Yoshua kosola hanhu ha Musa
(Kupetigwa 27:12-23)
1 Avo, Musa kagendelela kulonga na Waizilaeli wose,
2 kawalongela, “Niye sambi nina miyaka gana na malongo mabili, na sidaha bule kuwalongoza. Na Mndewa Imulungu kanongela kamba siloka umwambu wa lwanda lwa Yolidani.
3 Mndewa Imulungu, Imulungu wenu, kowalongolela na kowakoma iwanhu wa isi zili kuko, ili muisole isi yao, na Yoshua kokuwa kilongozi wenu kamba viyalongile Mndewa Imulungu.
4 Mndewa Imulungu kowabananga iwanhu wa isi azo kamba viyawabanage Sihoni na Ogu, iwandewa wa Waamoli na isi yao.
5 Mndewa Imulungu kowatenda muwahume na mweye muwatendele kamba viniwalagize.
6 Mugangamale na muwe magalu, sikumuwadumbe hebu kunyawanyawa, kwavija Mndewa Imulungu, Imulungu wenu kochola hamoja na mweye. Heyo hawaleka bule hebu kuwasemwa.”
7 Abaho Musa kamkema Yoshua, kamulongela mgameso ga iwanhu wose wa Izilaeli, “Ugangamale na uwe galu, kwavija gweye kowalongoza iwanhu mwiisi iyaiduwile Mndewa Imulungu kwa iwahenga wao kuwagwaa hewo, na gweye uwatende waisole.
8 Mndewa Imulungu ayo yowalongoza, heyo kokuwa hamoja na mweye, heyo hawaleka bule hebu kuwasemwa. Avo sikumudumbe hebu kunyawanyawa.”
Kusomigwa kwa malagizo kila mwaka wa saba
9 Avo, Musa kandika malagizo gago, kawagwelela iwalava nhosa wa ulelo wa Lawi, awo wakalile odipapa disanduku da lagano da Mndewa Imulungu, na iwavele wose wa Izilaeli.
10 Abaho Musa kawalagiza kalonga, “Kila mwaka wa saba okuwa mwaka wa kulekeswa. Mna inyimwilinyimwili ya vibanda ya mwaka awo,
11 Waizilaeli wose wahaiting'hane kuulongozi wa Mndewa Imulungu, Imulungu wenu, hanhu aho honda yahasagule, muwasomele malagizo gano iwanhu wose.
12 Wating'hanizeni iwanhu wose, iwambigalo na iwatwanzi na iwana na iwanhu baki iwokala mna gamabuga genu, ili kila munhu yategeleze na yaifunze kumdumba Mndewa Imulungu, Imulungu wenu, na yagagoge goya malagizo gano gose.
13 Na awo iwanenu hawagajuwile, wagahulike na waifunze kumdumba Mndewa Imulungu, Imulungu wenu, kipindi chose vonda mukale mwiisi imuchola kuisola ako umwambu wa Yolidani.”
Malagizo ga Imulungu kwa Musa na Yoshua
14 Avo, Mndewa Imulungu kamulongela Musa, “Siku yako ya kufa yammabehi kuvika. Mkeme Yoshua mwize wose mna dihema da mting'hano ili nimgwelele malagizo yang'hali hanakuwa kilongozi wenu.” Avo, Musa na Yoshua wengila mna dihema da mting'hano,
15 na Mndewa Imulungu kawalawila mumo mna imhanda ya wingu imile hana ulwivi lwa dihema.
16 Mndewa Imulungu kamulongela Musa, “Gweye sambi kofa, kochola kwa iwahenga zako. Abaho iwanhu wano osegela na kuikweleleza imilungu iyagwe ya isi iwochola kuisola na ondeka na kubena lagano dinitendile na hewo.
17 Aho ng'hasiliki yangu yowakila na niye nowaleka na kufisa kihanga changu, ili wabanangigwe. Gehile na magazo gowapata na olonga, ‘Gehile gano gatupata kwavija Imulungu wetu heli hagati yetu.’
18 Ona, nofisa kihanga changu mbuli ya gehile gawatendile na kwavija waihindukila imilungu iyagwe.
19 “Avo, wandike lwila luno, na uwafunze wanhu wa Izilaeli ili uwe usindila wangu kumwao.
20 Vonda niwagale mwiisi imemile maziwa na uki, kamba viniiduwile kwa iwahenga zao, na woja na kwiguta na kuneneha, abaho ohindukila imilungu iyagwe na kuisang'hanila. Onibeza na kubena lagano jangu.
21 Wahapata magazo mengi na mikubulo, lwila luno lokuwa kamba usindila kwavija honda usemwigwe na ulelo wao. Vino sambi ning'hali sinawagala mwiisi ayo iniiduwile kuwagwaa, nojuwa gaja gowogesa kusang'hana.”
22 Avo, Musa kandika lwila ulo siku didija, na kawafunza Waizilaeli wose.
23 Abaho Mndewa Imulungu kamulagiza Yoshua, mwanage Nuni, kamulongela, “Ugangamale na uwe galu, kwavija kowagala Waizilaeli mwiisi iniiduwile kuwagwaa, na niye nokuwa hamoja na gweye.”
24 Musa viyamambukize kwandika mbuli za malagizo gago kulawa mwanduso mbaka kuuhelelo,
25 kawalagiza Iwalawi wakalile odipapa disanduku da lagano da Mndewa Imulungu,
26 “Soleni kitabu kino cha malagizo, mukike kumgwazo wa disanduku da lagano da Mndewa Imulungu, Imulungu wenu, kikale baho kamba usindila kumwenu.
27 Kwavija nojuwa mweye vimwili wadulu na hamutogolaga kutegeleza. Kamba mmulema Mndewa Imulungu vivino vinili mgima avo mobanza ng'hani kumulema vonda nife!
28 Wating'hanize kuulongozi wangu iwavele wose wa makabila genu na ivilongozi wenu ili nilonge mbuli zino kuno otegeleza, na noukema ulanga na isi viwalole ili viwe usindila kumwao.
29 Kwavija nojuwa vonda nife motenda gehile na kuileka nzila iniwalagize muikweleleze. Avo, mzisiku azo mopata mikubulo kwavija motenda gehile mgameso ga Mndewa Imulungu na momgevuza kwa ago gomsang'hana.”
Lwila lwa Musa
30 Abaho Musa kazibwelela mbuli zose za lwila ulo mna gamagwiti ga Waizilaeli wose waiting'hane.