32
1 “Tegeleza gweye ulanga, gano gonilonga,
tegeleza gweye isi, mbuli za mulomo wangu.
2 Mafundizo gangu godwendweka kamba mvula,
mbuli zangu zolagala kamba kungugu,
kamba mawaga mna iminoga mideke,
kamba mvula mna gamajani mabisi.
3 Nodisimulila twaga da Mndewa Imulungu,
na mweye mulonge, ‘Imulungu wetu Mkulu!’
4 Mndewa Imulungu ayo Dibwe kulu da kuifisila,
nzila zake za haki.
Imulungu yotamaniligwa na yelibule kitala chochose,
heyo kotenda kwa haki na katelela.
5 Lakini mweye mswela kutamaniligwa kumwake,
mweye siyo wanage mbuli ya nzambi zenu,
mweye mwa ulelo wihile na upotele.
6 Vino habali momuliha Mndewa Imulungu kamba avo,
mweye wanhu wabozi na mulibule nzewele?
Vino heyo siyo tataenu yawalumbile,
kawatenda na kuwasimika?
7 Kumbukeni siku za umwaka,
gelegezeni miyaka mingi ibitile,
wauzeni iwahenga zenu, owalagusila,
wauzeni iwavele wenu, owalongela mbuli za umwaka.
8 Ayo yeli Uchanha Ng'hani viyawagwelele wanhu wa isi uhazi wao,
viyawagolile iwanhu wose,
kila wanhu na isi yao na kawekila imbaka yao,
kamba viweli iwana wa Izilaeli.
9 Lakini Mndewa Imulungu kaweka wanhu wa Yakobo wawe wake,
awo kawasagula wawe uhazi wake.
10 Kawona Waizilaeli owegela kuluwala,
ako kuna dibeho.
Kawakaliza na kawalola goya,
kawalela kamba munhu viyokaliza imwana wa siso jake.
11 Kamba mhungu yokaliza kisanza chake,
na kozumha zumha uchanha ya makinda gake,
na koganzanza mabawa gake ili yawagoge,
na kowapapa mna gamabawa gake.
12 Mndewa Imulungu mwenyego kawalongoza,
na kuduhu imulungu iyagwe yawatazile.
13 Kawabitiza kuvigongo,
na waja ndiya yotile mmigunda.
Kawagwaa uki kulawa mzimhango za mibwe waje,
na mizeituni yotile kulawa mdibwe dala.
14 Kawagwaa mtindi na maziwa ga ng'ombe na mbuzi,
mavuta ga ng'hondolo,
ng'hondolo mbigalo na mbuzi wa Bashani.
Kawagwaa ngano inogile,
na divai ya sambi wang'we.
15 Wanhu wa Izilaeli waneneha na wavitowa mateke,
waneneha na wakala na vitambi na wagilimbala,
abaho wamuleka Imulungu yawalumbile,
wambeza Dibwe kulu imkombola wao.
16 Wamtenda yakone migongo kwa imilungu yao
na kwa vinhu vigevuza wamtenda yagevuzike.
17 Wavilavila nhosa vinyamkela weli siyo Imulungu,
waicholela imilungu hawaijuwile,
imilungu izile sambi sambi,
ayo haitegelezigwe na iwahenga zao.
18 Mmuleka Dibwe yawagwelele ugima,
mumsemwa Imulungu yeli chanduso cha ugima wenu.
19 Mndewa Imulungu kayona mbuli ayo na kawaleka,
kagevuzigwa na wanage wa ikimbigalo na wa ikitwanzi.
20 Kalonga, ‘Nokifisa kihanga changu,
ndole kimambukizo chao chokuwaze,’
kwavija awo ulelo wihile,
na wana hawatamaniligwa.
21 Wanitenda nyone migongo kwa kinhu hakili imulungu,
wanigevuza kwa vinyago vao.
Avo nowatenda wone migongo mbuli ya iwanhu okoneka siyo wanhu goya,
na nowagevuza kubitila wanhu wa isi ya wabozi.
22 Ng'hasiliki yangu yokwaka moto,
yosoma mbaka hasi kowochola wanhu wafile,
yosakaza isi yose na vose vili mumo,
yolukuza migimbo ya vigongo.
23 ‘Nowagalila magayo hogomala,
nomambukiza misale yangu kumwao.
24 Osoka kwa nzala,
na wofa kwa mitamu na mikubulo.
Nowagalila ming'onyo mikali iwalumize,
na mizoka itambala ili na sumu.
25 Ng'hondo yogala ifa kudibuga,
na mzing'anda wanhu okuwa na bwembwe ng'hani,
wabwanga na wandele okomigwa,
hata ving'hele na wavele weli na uhenga.
26 Nahawabanange wose,
na kutenda sikuwakumbukigwe kabili na munhu yoyose,
27 ila nidumba kuitapa kwa awo owehila,
ili awo owehila sikuwagese kamba wawabananga,
na niye Mndewa Imulungu sitendile kinhu!’
28 Wanhu wa isi ya Izilaeli awo wanhu welibule nzewele,
na iwanhu hawagelegeza goya.
29 Maza wakalile na nzewele wahajuwile habali wahumwa,
na wahajuwile kimambukizo chao chokuwa vilihi.
30 Munhu imoja kodaha vilihi kuwahuma wanhu elufu imoja
hebu wanhu wabili odaha vilihi kuwahuma wanhu elufu kumi?
Yodahika kamba Dibwe jao kulu kawaleka,
na Mndewa Imulungu wao mkulu kawadonha.
31 Hata iwanhu otwihila ojuwa kamba,
Dibwe jao siyo kamba Dibwe jetu.
32 Kwavija mizabibu yao yolawa Sodoma,
ilawa mmigunda ya Gomola,
zabibu zake zina sumu,
vimvaba vake va usungu.
33 Divai yao kamba sumu ya nyoka,
ina sumu kali kamba ya muyombo.
34 Vino, gano sigekile goya kumwangu,
na kugeka mkihenge changu?
35 Niye ayo yonda nilihe gehile,
niye nowaliha gehile mna ikipindi vonda walemelwe,
kwavija siku da kubanangigwa kwao divika,
na kimambukizo chao cha mmabehi.
36 Mndewa Imulungu kowagombela wanhu zake,
na kowonela bazi iwasang'hanaji zake,
yahakona nguvu zao zimala,
na kuduhu yasigale, mfungwa hebu yalekesigwe.
37 Abaho Mndewa Imulungu kowauza wanhu zake,
‘Yakwahi ayo imilungu yenu,
dibwe dimucholile kuifisa kumwake?’
38 Yakwahi ayo imilungu idile sadaka zenu,
na kung'wa divai na nhosa zenu za kung'wa?
Avo lekeni inuke iwataze,
lekeni iwahonye!
39 ‘Loleni kamba niye ayo Imulungu,
na kuduhu iyagwe ila niye.
Niye nokoma na nokwika ugima,
nolumiza na kuhonya,
kuduhu yodaha kumuhonya yoyose mmakono gangu.
40 Nogolosa mkono wangu kuulanga,
na noiduwila kamba vinili mgima milele,
41 mwahajona sime jangu dimelemeta,
na nogolosa mkono kutagusa,
nowaliha gehile awo onilema,
na nowakoboza awo onihila.
42 Misale yangu yokoligwa damu,
sime jangu dokwiguta nyama,
sime jangu dododa kwa damu ya vilonda va wafungwa,
na awo onihila weli na mvili nhali.’
43 Mweye wanhu wa isi ziyagwe, wadeng'heleleni wanhu zake,
kwavija heyo koliha kwa damu ya wasang'hanaji zake,
kowaliha awo omulema,
na koisunha isi ya wanhu zake.”
44 Musa na Yoshua, mwanage Nuni, weza kuulongozi wa iwanhu, Musa kazibwelela mbuli za lwila uno, avo Waizilaeli wose wauhulike.
45 Musa viyamambukize kuwalongela wanhu wa Izilaeli mbuli zino zose,
46 kawalongela, “Zikeni mmizoyo yenu mbuli zose ziniwagwelele lelo. Molondigwa muwalongele wanenu ili wazigoge kwa kutamaniligwa mbuli zose za malagizo gano.
47 Kwavija malagizo gano siyo mbuli ziiyeka ila ago ugima wenu, kubitila malagizo gano mokala siku nyingi mwiisi yumuchola kuisola, mwambu wa lwanda lwa Yolidani.”
Ifa ya Musa yolongigwa
48 Siku didijo Mndewa Imulungu kamulongela Musa,
49 “Kwela kulugongo luno lwa Abalimu, lugongo lwa Nebo mwiisi ya Moabu, mwambu kwa mwambu na buga da Yeliko, uilole isi ya Kanaani iniwagwelela Waizilaeli iwe yao.
50 Abaho kuko kulugongo kofa na koiting'hana na wahenga zako wafile mwaka kamba viyafile mkulu wako Haluni kulugongo lwa Holi na kaiting'hana na wahenga zake,
51 kwavija mweye wabili mubena lagizo jangu mgameso ga Waizilaeli. Vimukalile ako kugamazi ga Meliba behi na buga da Kadeshi kuna uluwala lwa Sini, hamungwelele ukulu mgameso ga iwanhu.
52 Avo koyona isi kwa kutali, lakini honda wingile bule mna iisi iniwagwelela wanhu wa Izilaeli.”