8
Isi inogile ya kuisola
1 “Muiteganye mugoge malagizo gose goniwagwaa lelo, ili muwe wagima na mongezeke na mwingile na kuisola isi ayo iyaiduwile Mndewa Imulungu, Imulungu wenu kwa iwahenga zenu.
2 Kumbukeni Mndewa Imulungu, Imulungu wenu viyawalongoze mmwanza mtali kubitila kuluwala kwa miyaka malongo mane, ili yawasegesele kuitapa na kawageza yagajuwe gaja geli mmizoyo yenu, kamba mogoga hebu hamugoga malagizo gake.
3 Kawasegesela kuitapa kwa kuwatenda mukone nzala, abaho kawagwaa ndiya ya mana muje, ndiya ayo hamuijuwile na vivija iwahenga zenu hawaijuwile. Katenda avo ili yawafunze kamba munhu hadaha kuwa mgima kwa kuja kwiiyeka lakini kwa kila mbuli ilawa mmulomo wa Mndewa Imulungu.
4 Kipindi chose acho cha miyaka malongo mane, viwalo venu havilalile na magulu genu hagavimbile bule.
5 Avo muvijuwe kamba Mndewa Imulungu, Imulungu wenu, kowazuma mweye kamba tata viyomzuma mwanage.
6 Avo, gogeni malagizo ga Mndewa Imulungu, Imulungu wenu, ili mukweleleze nzila zake na mumdumbe heyo.
7 Mndewa Imulungu, Imulungu wenu kowagala mwiisi inogile isi ili na vizanda na nzasa na mbwibwi ikilima kulawa kuvigongo na kubonde,
8 isi ilelaga ngano na shaili na mizabibu na mitini na mikomamanga na mizeituni na uki.
9 Ako mopata ndiya nyingi na hamuswela kinhu. Mibwe yake ina chuma na kuvigongo vake modaha kuhimba shaba ya kiguzi.
10 Moja na mokwiguta, na momtogola Mndewa Imulungu, Imulungu wenu kwa isi inogile iyawagwelele.
Wanhu ozumigwa mbuli ya kumsemwa Mndewa Imulungu
11 “Muiteganye sikumumsemwe Mndewa Imulungu, Imulungu wenu, kwa kuleka kugoga malagizo gake na mafundizo gake na gaja golondigwa goniwalagiza lelo.
12 Mwahaja na kwiguta, mwahazenga ng'anda zinogile na kukala mumo,
13 na kamba ng'ombe na ng'hondolo wenu na shaba na zahabu yenu na kila kinhu kimulinacho chongezeka,
14 avo sikumuitape na kumsemwa Mndewa Imulungu, Imulungu wenu, yawalavile mwiisi ya Misili, ako kumukalile watumwa.
15 Heyo kawalongoza ako kuluwala lukulu ludumbiza, lumemile mizoka ili na sumu na inge, mwiisi ija inyalile ilibule mazi, kawalavila mazi kulawa mdibwe dala.
16 Heyo kawagwaa mana ako kuluwala, ndiya haijuwigwe na iwahenga zenu. Katenda vivo ili yawasegesele kuitapa na yawageze ili ako kumwande yawatendele ganogile.
17 Avo muiteganye sikumulonge mmizoyo yenu, ‘Siye tuwa matajili kwa nguvu zetu na udahi wetu wenyego.’
18 Kumbukeni kamba Mndewa Imulungu, Imulungu wenu ayo yowagwaa nguvu ya kuwa matajili. Kotenda vivo mbuli ya lagano jake diyaiduwile kwa iwahenga zenu mbaka lelo.
19 Kamba mwahamsemwa Mndewa Imulungu, Imulungu wenu na kuikweleleza imilungu iyagwe na kuisang'hanila na kuitambikila, lelo nowazuma kamba mokomigwa.
20 Kamba hamumtegeleza Mndewa Imulungu, Imulungu wenu mokomigwa kamba vonda yawakome iwanhu wa isi zili kuulongozi wenu.