9
Siyo mbuli ya ukunoga kwa iwanhu wa Izilaeli
(Kulawa 32:1-35)
1 “Mutegeleze mweye wanhu wa Izilaeli, sambi moloka lwanda lwa Yolidani na mochola kuisola isi ya wanhu wa isi ng'hulu na weli na nguvu kubanza mweye. Mabuga gao makulu na gazunguluswa senyenge ivikile mbaka kuna gamawingu.
2 Wanhu wenyego watali na wana nguvu, awo Waanaki na kamba vimujuwa na kamba vimuhulika iwanhu viwalongaga, ‘Nani yodaha kuitowa na Waanaki?’
3 Lakini lelo muvijuwe kamba Mndewa Imulungu, Imulungu wenu, ayo yowalongolela kamba moto usakaza. Heyo kowakoma na kowahuma mgameso genu, avo mowawinga na kuwakoma himahima, kamba Mndewa Imulungu viyawalongele kotenda.
4 “Mndewa Imulungu, Imulungu wenu vonda yamambukize kuwawinga iwanhu awo mgameso genu sikumugelegeze mmizoyo yenu, ‘Kwavija siye tunoga lekaavo Mndewa Imulungu katugala tuisole isi ino.’ Mndewa Imulungu kawawinga iwanhu wano mgameso genu kwavija hewo otenda gehile.
5 Mweye moisola isi ya hewo siyo kwavija mweye munoga hebu mizoyo yenu inoga ila Mndewa Imulungu, Imulungu wenu, kowawinga iwanhu awo mgameso genu kwavija watenda gehile na kolonda kudivikiza dija dilagano diyaiduwile kwa iwahenga zenu, Abulahamu na Isaka na Yakobo.
6 Avo, muvijuwe siyo mbuli ya ganogile genu Mndewa Imulungu, Imulungu wenu, kowagwaa isi ino inogile iwe yenu, kwavija mweye mwa wanhu wadala.
7 “Kumbukeni na sikumuisemwe vimumgevuze Mndewa Imulungu, Imulungu wenu kuja kuluwala. Tangu siku dija dimusegele mwiisi ya Misili mbaka vimuvikile hanhu hano, mweye momulema Mndewa Imulungu.
8 Akuja kulugongo lwa Holebu mumgevuza Mndewa Imulungu na heyo kagevuzika ng'hani na kalonda kuwakoma wose.
9 Vinikwelile kulugongo kusola ivibao vibili va mabwe, vandikigwe lagano diyatendile Mndewa Imulungu na mweye, ng'hala kuko kulugongo kwa siku malongo mane imisi na ikilo sidile gate hebu kung'wa mazi.
10 Abaho Mndewa Imulungu kanigwaa avo ivibao vibili va mabwe vandikigwe kwa kidole chake Imulungu. Vikala vandikigwe mbuli zose ziyawalongele Mndewa Imulungu kulugongo, kulawa muumoto siku ayo vimuiting'hane.
11 Ona, vizishile siku azo malongo mane imisi na ikilo, Mndewa Imulungu kanigwaa avo ivibao vibili va mabwe, vandikigwe dilagano.
12 “Avo, Mndewa Imulungu kanongela, ‘Segela, hima uhumuluke hasi ya ulugongo, kwavija wanhu zako wauwalavile Misili wanangika. Sambi sambi waileka nzila, iniwalagize waikweleleze, watenda kinyago cha zuma.’
13 “Vivija Mndewa Imulungu kanongela, ‘Niwona wanhu wano wadala ng'hani,
14 nileke niwakome, nisegese twaga jao mwiisi yose, abaho nokutenda gweye isi ili na nguvu na ng'hulu kubanza hewo.’
15 “Avo, nihinduka na nihumuluka kulawa kulugongo, lukalile lokwaka moto, kuno nipapa ivibao vibili va mabwe.
16 Vindolile nyona mumtenda nzambi Mndewa Imulungu, Imulungu wenu, muitendela kinyago cha ng'ombe cha zahabu, kwa kipindi kidodo muileka nzila iyawalagize Mndewa Imulungu.
17 Avo, nivigoga vija ivibao vibili nivipigisa hasi, nivibena mgameso genu.
18 Abaho nigwa kingubanguba kuulongozi wa Mndewa Imulungu kwa siku malongo mane imisi na ikilo, kamba vinhendile ichanduso, sidile gate hebu sing'wile mazi, mbuli ya nzambi zenu zimutendile, kwa kutenda gehile mgameso ga Mndewa Imulungu na mumtenda yagevuzike.
19 Nidumba ng'hasiliki ya Mndewa Imulungu, yahawakomile, lakini Mndewa Imulungu kanhegeleza kabili.
20 Vivija Mndewa Imulungu kamgevuzikila ng'hani Haluni na kalonda kumkoma, avo vivija nimpulila Haluni kipindi acho.
21 Akija ikinhu cha nzambi kimutendile, acho ikinyago cha ng'ombe, nikisola nikilumbula muumoto, abaho nikihonda honda na nipata timbwisi na nidipigisa timbwisi ajo mna ikizanda cha mazi gokilima hasi ya ulugongo.
22 “Vivija mumgevuza Mndewa Imulungu, Imulungu wenu ako Tabela na Masa na Kibiloti Hataava.
23 Na Mndewa Imulungu viyawatumile kulawa Kadeshi Balinea kalonga, ‘Gendeni mukaisole isi iniwagwelele,’ mweye mmulema Mndewa Imulungu, Imulungu wenu na hamumtogole na hamugagogile gaja gayawalongele.
24 Mweye mmulema Mndewa Imulungu tangu siku viniwajuwile.
25 “Avo nigwa kingubanguba kuulongozi wa Mndewa Imulungu kwa siku azo malongo mane, imisi na kilo, kwavija Mndewa Imulungu kakala yalongile kowakoma wose.
26 Nimpula Mndewa Imulungu, nilonga, ‘Go, Mkulu Mndewa Imulungu sikuuwabanange wanhu wako, wanhu wano kuwakombola kulawa mwiisi ya Misili kwa udahi wako na nguvu ng'hulu.
27 Wakumbuke wasang'hanaji zako, Abulahamu na Isaka na Yakobo, na sikuugelegeze udala wa wanhu wano na gehile gao na nzambi zao.
28 Buleavo iwanhu wa kuja kuutulavile olonga kamba Mndewa Imulungu kawalava ili yawakome kuluwala kwavija kalemelwa kuwagala mwiisi iyalongile kowagwaa, na kwavija kawehila.
29 Lakini wano wanhu wako, wanhu wauwalavile kulawa Misili kwa nguvu na udahi wako mkulu.’