16
Mana na Ng'hwale
1 Waizilaeli wose wasegela kulawa Elimu wavika kuluwala lwa Sini hagati ya Elimu na Sinai. Ino ikala siku ya longo na tano ya mwezi wa kabili toka viwasegele mwiisi ya Misili.
2 Ako kuluwala Waizilaeli wakala owayalalila Musa na Haluni.
3 Waizilaeli wawalongela, “Vinoga ng'hani kamba Mndewa Imulungu yahatukomile vitukalile mwiisi ya Misili, kuko tuja nyama na tuja ndiya itulondile, lakini mweye mutugala kuno kuluwala ili tufe kwa nzala.”
4 Abaho Mndewa Imulungu kamulongela Musa, “Nowagalila magate kulawa kuulanga. Kila siku odondola chakuja cha kuwafaya siku dijo. Kwa nzila ino nowageza nilole kamba odaha kugagoga malagizo gangu.
5 Mna isiku ya sita, wadondole chakuja miyanza mibili ya vija viwadondolaga kila siku.”
6 Avo Musa na Haluni wawalongela Waizilaeli wose, “Ichungulo mojuwa kamba Mndewa Imulungu ayo yawalavile mwiisi ya Misili.
7 Imitondo mowona ukulu wa Mndewa Imulungu, kwavija kawahulika vimmuyalalile. Siye kina nani mbaka mutuyalalile?”
8 Vivija Musa kawalongela, “Ichungulo Mndewa Imulungu kowagwaa nyama muje na imitondo kowagwaa magate muje mushibe, kwavija heyo kahulika kuiyalala kwenu. Siye twa kina nani mbaka mutuyalalile? Sikumutuyalalile siye, lakini muyalalileni Mndewa Imulungu.”
9 Musa kamulongela Haluni, “Walongele Waizilaeli wose weme kuulongozi wa Mndewa Imulungu, kwavija kahulika kuiyalala kwao.”
10 Haluni viyakalile kolonga na Waizilaeli, wanhu wose walola kuluwala, bahaja ukulu wa Mndewa Imulungu oneka mmawingu.
11 Mndewa Imulungu kamulongela Musa,
12 “Niwahulika Waizilaeli viwoniyalalila. Avo walongele vino, ‘Ichungulo woja nyama na imitondo woja magate. Abaho mojuwa kamba niye ayo Mndewa Imulungu, Imulungu wenu.’ ”
13 Ichungulo ng'hwale weza waigubika ng'hambi yao, imitondo tungwe dikala jenele banzi zose za ng'hambi yao.
14 Tungwe vidinyalile, kukala na kinhu kidodo cha ubulunge kikala kibewe.
15 Waizilaeli viwachone kinhu acho, waiuza, “Akino choni?” Kwavija hawakijuwile kikala kinhu gani.
Musa kawalongela, “Dino dijo gate diyowagwaa Mndewa Imulungu muje.
16 Mndewa Imulungu kalagiza mutende vino, ‘Kila munhu yadondole kamba viyodaha kuja. Yadondole mhishi imoja kamba wanhu wa mng'anda mmwake viweli.’ ”
17 Avo Waizilaeli watenda vivo, wanhu wayagwe wadondola vingi na wayagwe wadondola kidogo.
18 Lakini viwapimile vija viwadondole mna ikibaba, wajuwa kamba imunhu yadondole vingi hakalile na kinhu kisigale na ija yadondole kidogo hahungukilwe. Kila munhu kakala yadondole kamba vija viyodaha kuja.
19 Musa kawalongela, “Munhu yoyose sikuyasigase ndiya ino mbaka imitondo.”
20 Lakini wanhu hawamtegeleze Musa. Wayagwe wasigasa mbaka imitondo, lakini imitondo ndiya ayo ikala yolile na imema ming'onyo. Avo Musa kawagevuzikila ng'hani wanhu awo.
21 Kila imitondo, kila munhu kadondola kamba viyodaha kuja, na zuwa vijalike, kija kisigale mwiisi kilumbuka.
22 Mna isiku ya sita, Waizilaeli wadondola vingi kila munhu mhishi mbili, wavele wose wa Izilaeli wamcholela Musa wamulongela Musa mbuli ayo.
23 Musa kawalongela, “Dino dijo lagizo da Mndewa Imulungu, mayo yokuwa siku ya kubwihila ya Mndewa Imulungu. Avo gendeni mkateleke hebu kukimusa ndiya imulonda. Ndiya yonda isigale ilekeni mbaka mayo.”
24 Avo watenda vivo na wasigasa ndiya iyagwe mbaka mayo kamba vija Musa viyalongile, imitondo yake kikala hacholile hebu kuwa na ming'onyo.
25 Musa kawalongela, “Diyeni ndiya ino isigale, kwavija lelo siku ya kubwihila ya Mndewa Imulungu. Lelo honda muchone ako mwiisi.
26 Kwa siku sita modondola ndiya ino, lakini siku ya saba yokuwa siku ya kubwihila avo honda kiwe kuko bule.”
27 Mna isiku ya saba wanhu wayagwe wachola kudondola lakini hawachonile.
28 Abaho Mndewa Imulungu kamulongela Musa, “Vino mbaka lini molema kugagoga malagizo gangu na mafundizo gangu?
29 Mukumbuke kamba, niye Mndewa Imulungu niwagwaa siku ya kubwihila, lekaavo niwagwaa ndiya ya siku mbili mna isiku ya sita. Ili kila munhu yabwihile ukae kumwake na sikuyachole kokose mna isiku ya saba.”
30 Avo wanhu wahumula mna isiku ya saba.
31 Waizilaeli waikema ndiya ayo, “Mana.” Ikala kamba mbeyu ya uhemba mzelu na uhaulanza ukala kamba gate digeligwe uki.
32 Musa kawalongela, “Vino avo viyalagize Mndewa Imulungu, soleni mhishi imoja ya Mana ikigwe mbuli ya wazukulu zenu, ili na hewo wayone ndiya iniwagwelele muje ako kuluwala viniwalavile mwiisi ya Misili.”
33 Musa kamulongela Haluni, “Sola mhishi imoja ya Mana na uike kuulongozi wa Mndewa Imulungu, ikalizigwe mbuli ya wazukulu zenu.”
34 Kamba Mndewa viyamulagize Musa, Haluni keka Mana na ivibao va mabwe vandikigwe malagizo ili ikalizigwe na Mndewa Imulungu.
35 Waizilaeli waja Mana kwa miyaka malongo mane mbaka viwavikile mwiisi ifa ya kukala, isi ikalile mzimbaka za Kanaani.
36 Vibaba vibili va Mana, vikala hanhu ha longo ha kipimo kikemigwa Efa.