17
Mazi golawa mdibwe
(Kupetigwa 20:1-13)
1 Waizilaeli wose wasegela kuluwala lwa Sini, watembela kulawa hanhu mbaka hanhu kamba Mndewa Imulungu viyawalagize. Weka ng'hambi ako Lefidimu, lakini hanhu aho kukala kuduhu mazi ga kung'wa.
2 Wasonga kumuyalalila Musa, “Tugwelele mazi ga kung'wa.”
Musa kawedika, “Habali moniyalalila? Habali momgeza Mndewa Imulungu?”
3 Lakini kwavija wanhu wakala na ng'hilu, wagendelela kumuyalalila Musa wamulongela, “Habali kutulava Misili na kutugala hano tufe kwa ng'hilu, siye na wanetu na fugo zetu?”
4 Avo Musa kampula ng'hani Mndewa Imulungu kalonga, “Niwatendele choni wanhu wano? Olonda kunhowa mabwe.”
5 Mndewa Imulungu kamulongela Musa, “Genda kuulongozi wa wanhu, wagale wavele wa Izilaeli hamoja na gweye, na sola fimbo ija yuutowile lwanda lwa Naili.
6 Niye nokwima kuulongozi wako uchanha ya dibwe dili kulugongo lwa Holebu. Gweye ditowe dibwe dijo na mazi golawa wanhu wang'we.” Avo Musa katenda vivo mgameso ga wavele wa Izilaeli.
7 Kahakema hanhu aho Masa na Meliba, kwavija Waizilaeli waiyalala na wamgeza Mndewa Imulungu, viwalongile, “Vino kweli Mndewa Imulungu kahamoja na siye?”
Waizilaeli owatowa Waamaleki
8 Waamaleki weza wawavamila Waizilaeli ako Lefidimu.
9 Musa kamulongela Yoshua, “Sagula wambigalo, uchole kuitowa na Waamaleki. Mayo nokwima kuinhembeti ya lugongo, kuno nigoga fimbo ya Imulungu.”
10 Avo Yoshua katenda kamba viyalagizwe na Musa, kachola kuitowa na Waamaleki, Musa na Haluni na Huli wakwela kuinhembeti ya lugongo.
11 Ikala, Musa viyenule makono gake Waizilaeli wahuma lakini viyagahumuluse hasi, Waamaleki wahuma.
12 Makono ga Musa vigadonhile Haluni na Huli wasola dibwe ili Musa yakale. Abaho wagagoga makono gake wagenula uchanha, imoja kenula mkono wa kudila na iyagwe kenula mkono wa kumoso. Avo makono ga Musa gakala na nguvu kuno genuligwa, mbaka zuwa vidihongile.
13 Avo Yoshua kawahuma Waamaleki mna ing'hondo.
14 Abaho Mndewa Imulungu kamulongela Musa, “Uyandike mbuli ino mkitabu ili ikumbukigwe. Abaho mulongele Yoshua kwavija nowafagila Waamaleki mwiisi yose.”
15 Avo Musa kazenga upango wa kulavila nhosa kaukema, “Mndewa Imulungu ayo yanhendile nihume.”
16 Kalonga, “Kwavija makono gangu genuligwa kuna ikigoda cha Mndewa Imulungu. Mndewa Imulungu kogendelela kuwatowa Waamaleki ulelo mbaka ulelo!”