18
Yetulo komtembelela Musa
1 Yetulo tata mkwe yake Musa mulava nhosa wa Midiani, kagahulika gose Mndewa Imulungu gayamtendele Musa na viyawalavile Waizilaeli mwiisi ya Misili.
2 Avo Yetulo kamsola Sipola mwehe wa Musa yakalile yabwezigwe kwa tatake, kamcholela Musa,
3 hamoja na wanage wabili, mwana imkulu kakemigwa Gelishomu, Musa kamgwaa twaga dijo kwavija kalonga, “Nikimbilila mwiisi ya ugeni,”
4 na wa kabili Eliezeli, kwavija Musa kalonga, “Imulungu wa tata zangu ayo yanitazile, sikunikomigwe na Falao.”
5 Yetulo tata mkwe yake Musa, hamoja na wanage Musa na mwehe wake kamcholela Musa kuluwala kuko kuwakalile wekile ng'hambi, kulugongo lwa Imulungu.
6 Yetulo kamtumila usenga Musa kalonga, “Niye mkwe yako Yetulo nokwiza hamoja na mwehe wako na wanago wabili.”
7 Avo Musa kachola kuiting'hana na mkwe yake na viyamone kamfugamila na kamnonela, wailamusa abaho wengila mkibanda.
8 Musa kamsimulila tata mkwe yake gose Mndewa Imulungu gayamtendele Falao na Wamisili mbuli ya Waizilaeli na gehile gose gawalawile mnzila na vija Mndewa Imulungu viyawakombole.
9 Yetulo kadeng'helela ng'hani kwavija Mndewa Imulungu kawatendela ganogile Waizilaeli, kwa kuwalava Waizilaeli mmakono gawa Misili.
10 Yetulo kalonga, “Mndewa Imulungu yatogoligwe kwavija kawakombola mulawe mmakono gawa Misili na mmakono ga Falao.
11 Sambi nojuwa kamba Mndewa Imulungu iyo mkulu kubanza milungu yose, kwavija kawakombola Waizilaeli kulawa mmakono gawa Misili wakalile owabezeli.”
12 Abaho Yetulo, tata mkwe yake Musa, kamulavila Imulungu nhosa za kusoma moto na nhosa ziyagwe. Nayo Haluni keza hamoja na wavele wa Izilaeli waje ndiya hamoja na tata mkwe yake Musa kuulongozi wa Mndewa Imulungu.
Wasemi osaguligwa
(Kumbukumbu 1:9-18)
13 Imitondo yake Musa kakala mna ikigoda kulamula kamba msemi wa wanhu, na wanhu wakala wamzunguluke toka imitondo mbaka ichungulo.
14 Yetulo tata mkwe yake Musa, viyagonile gose Musa gayawatendele Waizilaeli, kamuuza, “Habali kowatendela iwanhu vinhu vino? Habali kokala gweye wiiyeka kamba msemi, na wanhu wose wano okuzunguluka toka imitondo mbaka ichungulo?”
15 Musa kamwidika, “Notenda vino kwavija wanhu onizila kuniuza viyolonda Imulungu.
16 Kamba wanhu wabili ogomba okwiza kumwangu, na niye nowalamula na kuwalongela vija vigalonda malagizo ga Imulungu.”
17 Abaho Yetulo tata mkwe yake Musa kamulongela, “Kiutenda hakinogile bule.
18 Gweye hamoja na wanhu wano modonha, kwavija sang'hano ino munhu imoja hadaha kuitenda.
19 Avo tegeleza nokugwaa magesa, na Imulungu yawe hamoja na gweye. Gweye kokwima kuulongozi wa Imulungu mbuli ya wanhu na komgalila Imulungu mbuli ya kugomba kwao.
20 Wafunze wanhu malagizo ga Imulungu, walongele vija viwolondigwa kukala na sang'hano ziwolondigwa kusang'hanwa.
21 Vivija usagule iwanhu odaha mna iwanhu, wanhu otamaniligwa na omdumba Imulungu na hawatogola kuhongigwa, ili wawe vilongozi wa wanhu mna ivibumbila va wanhu elufu na wanhu gana na wanhu malongo matano na wanhu longo.
22 Waleke wawe kamba wasemi wa wanhu siku zose. Gaja gamadala wakugalile gweye lakini gaja gamadodo wagalamule. Kamba wahatenda vivo kodaha kutenda sang'hano yako ibuhe kwavija kosang'hana na hewo wose.
23 Wahatenda vivo na kamba viyolonda Imulungu kodaha kufunga umoyo na wanhu wano odaha kubwela ukae kumwao kwa tindiwalo.”
24 Musa kakweleleza magesa ga tata mkwe yake Yetulo.
25 Avo kawasagula wanhu weli na udahi mna Waizilaeli, na kawatenda wawe vilongozi wa wanhu mna ivibumbila va wanhu elufu na wanhu gana na wanhu malongo matano na wanhu longo.
26 Nao wakala wasemi wa wanhu kila siku, gaja gamadala wamgalila Musa na gaja gamadodo wagalamula wenyego.
27 Abaho Musa na tata mkwe yake Yetulo wailaga, abaho Yetulo kabwela mwiisi yake.