25
Sadaka za hema ding'alile
(Kulawa 35:4-9)
1 Mndewa Imulungu kamulongela Musa,
2 “Walongele Waizilaeli wandavile sadaka. Na gweye ubokele kila kinhu chonda nilaviligwe na kila munhu yonilavila kwa moyo unogile.
3 Kolondigwa ubokele sadaka zino, zahabu na shaba na shaba ya kiguzi,
4 sufi ya buluu na sufi ya zambalau na sufi ndung'hu, viwalo vinogile va kitani na viwalo vitendigwe kwa mibahila ya mbuzi,
5 ng'hwembe za ng'hondolo mbigalo zigeligwe langi ndung'hu na ng'hwembe za mnyama wa mbahali na mibiki ya muhamvi na mkese,
6 mavuta ga taa na vinhu vilondigwa mbuli ya mavuta ga kubakala na mbuli ya ubani unung'hila goya.
7 Ubokele mabwe ga bei ng'hulu gokemigwa shohamu na mabwe gayagwe mbuli ya kukihamba kikoti cha mulava nhosa na kikoba cha mmhambaga.
8 Vivija wanhu olondigwa wanitendele hema ding'alile, ili ng'hale hamoja nao.
9 Utende hema dijo na vinhu vake kamba vonda nikulagusile.
Sanduku da lagano
(Kulawa 37:1-9)
10 “Nao wanhendele sanduku da lagano kwa mbao za mkese, utali wake uwe mkono umoja na nusu na ugazi wake uwe mkono umoja na utali wake kwa kuchola uchanha uwe mkono umoja.
11 Udibake sanduku dijo zahabu inogile kunze na mgati, na udizungulusile lugigo lwa zahabu.
12 Abaho koditendela sanduku dijo vipete vine va zahabu na uvigele mmagulu gake mane, kila mgulu kipete kimoja.
13 Usongole mango za muhamvi na uzibake zahabu.
14 Mango azo uzigele mna ivipete vili kila mwambu wa disanduku, ili mudipape.
15 Mango azo zisigale mumo mvipete va disanduku sikuzilavigwe.
16 Abaho mgati ya disanduku dijo wike vibao vibili va mabwe vandikigwe gamalagizo.
17 “Abaho usongole ngubiko aho hozigeligwa kumgongo nzambi, ngubiko ayo iwe ya zahabu inogile, utali wake uwe mkono umoja na nusu na ugazi wake uwe mkono umoja.
18 Abaho usongole viumbe vibili kwa zahabu, abaho uvike mumgwazo wa ingubiko,
19 imoja umwike mwambu uno na iyagwe mwambu uyagwe kuno na kuno. Uvike viumbe avo mumgwazo wa ingubiko, lakini viilumbe na ingubiko.
20 Viumbe awo wailole na mabawa gao gayanzanze uchanha ya ingubiko.
21 Mdisanduku dijo wike vibao vibili va mabwe na uchanha yake wike ayo ingubiko.
22 Na niye noiting'hana na gweye, hagati ya viumbe awo wabili weli uchanha ya disanduku da lagano, nolonga na gweye na nokugwelela malagizo gose mbuli ya Waizilaeli.
Meza ikiligwe magate galavigwe kwa Imulungu
(Kulawa 37:10-16)
23 “Tenda meza ya mbao za mkese iwe na utali wa mkono umoja na ugazi wa nusu mkono na utali kwa kuchola uchanha uwe behi na kuvika mkono umoja.
24 Uibake zahabu inogile na uizungulusile lugigo lwa zahabu.
25 Abaho koizungulusila lubao luli na ugazi wa ganza na lubakigwe zahabu.
26 Utende vipete vine va zahabu na uvigele mna gamagulu gake mane.
27 Vipete avo vikale behi na luja ulubao luzunguluswe mwiimeza na vokuwa vakupapila imeza.
28 Usongole mango za muhamvi, na uzibake zahabu, mango azo zokuwa za kupapila ayo imeza.
29 Utende sahani na vikasi, vivija utende bilika na vibakuli va kugidila nhosa ya ung'waji. Uvitende viya vose avo kwa zahabu inogile.
30 Uchanha ya imeza mogeka gaja gamagate gamundavile. Magate gago gosigala baho siku zose mgameso gangu.
Kingolobweda
(Kulawa 37:17-24)
31 “Utende kingolobweda cha zahabu inogile, dako jake na mgimbo wake uwe umoja, vikasi vake na vifundo vake na maluwa gake vose vitendigwe kwa kihande kimoja cha zahabu.
32 Matambi sita galawilile mumgimbo wa ikingolobweda, matambi madatu mwambu uno na madatu mwambu uyagwe.
33 Kila tambi diwe na vifundo vidatu kamba vigali maluwa ga mulozi kila dimoja na vifundo vake na luwa jake.
34 Na umgimbo wa ikingolobweda uhambigwe na vifundo vine viigale kamba viwili mulozi uwe na vifundo na maluwa.
35 Kila hanhu hogozukila gamatambi mabili ili kuvikiza matambi sita ga ikingolobweda, hasi yake hawe na kifundo kimoja.
36 Vifundo vivo na matambi gake vokuwa kinhu kimoja na ikingolobweda na vose vitendigwe kwa zahabu inogile.
37 Utende taa saba mbuli ya ikingolobweda uzike uchanha yake ili zimwemwese kuulongozi.
38 “Vivija utende viya va kugogela makala ga moto na viya va kuhalila moto kwa zahabu inogile.
39 Sola kilo malongo madatu na tano za zahabu inogile utendele acho ikingolobweda na viya vake vose.
40 Witeganye utende kamba viulagusiligwe kuja kulugongo.