1 “Tenda hema da mting'hano kwa mapanziya longo ga kitani inogile galukigwe na nzabi za buluu na zambalau na udung'hu na ugagele ulembo wa viumbe weli na mabawa watendigwe na mafundi wanogile. 2 Kila panziya diwe na utali wa makono longo na mabili na ugazi wa makono mabili. 3 Mapanziya matano ugasonele hamoja dilawile panziya dimoja na matano gayagwe ugasonele hamoja dilawile panziya dimoja. 4 Wike vitanzi va buluu mna imhindo ya panziya da ikimambukizo na utende vivo kwa mhindo ya panziya diyagwe. 5 Wike vitanzi malongo matano mna idipanziya dimoja na vitanzi malongo matano mdipanziya diyagwe, vitanzi vose viilole. 6 Abaho utende vifungilo va zahabu malongo matano, ili ulumbilize vihande avo vibili va panziya, avo dihema diwe dimoja.

7 “Vivija utende ngubiko ya dihema kwa mapanziya longo na dimoja ga mibahila ya mbuzi. 8 Kila panziya diwe na utali wa makono longo na ndatu na ugazi wa makono mabili. Mapanziya gose gaigale. 9 Mapanziya matano galumbilize hamoja na mapanziya sita galumbilize hamoja. Panziya dilumbilizigwe kwa mapanziya sita udibande kuulongozi wa dihema. 10 Abaho wike vitanzi malongo matano mna idipanziya dimoja na vitanzi malongo matano mdipanziya diyagwe. 11 Utende vifungilo va shaba ya kiguzi malongo matano na uvigele mvitanzi ili ugalumbilize gago gamapanziya na kutenda ngubiko imoja ya dihema. 12 Ija inusu isigale ya dipanziya uigubike mwambu wa kukisogo wa dihema. 13 Nusu mkono isigale ya idipanziya kila mwambu uigubike kila mwambu mzimbavu za dihema.

14 “Utende ngubiko iyagwe ya dihema kwa ng'hwembe za ng'hondolo mbigalo zigeligwe langi ndung'hu na ng'hwembe za mnyama wa mbahali.

15 “Utende mbao za mkese za kwimila dihema. 16 Kila lubao luwe na utali wa makono mane, na ugazi wa behi kuvikila mkono umoja, 17 kila lubao luwe na vilimi vibili va kulumbilizila. Mbao zose za dihema uzitende vivo. 18 Utende mbao malongo mabili za mwambu wa kusini wa dihema, 19 na vikalilo malongo mane va shaba, kila lubao vikalilo vibili ili kugogeleza vija ivilimi vibili. 20 Utende mbao malongo mabili za mwambu wa kasikazini wa dihema, 21 na vikalilo malongo mane va shaba, kila lubao vikalilo vibili. 22 Kwa mwambu kwa kukisogo wa dihema, mwambu wa kudihongela zuwa utende mbao sita, 23 na utende mbao mbili kuvingolobweda va mwambu wa kukisogo wa dihema. 24 Mbao azo mbili za kutenda avo ivingolobweda vibili zilumbilizigwe kulawa hasi mbaka uchanha kuna ipete ya ichanduso. Mbao azo mbili za ivingolobweda avo vibili uzitende kamba vivo. 25 Avo hokuwa na mbao nane na vikalilo longo na sita va shaba, kila lubao vikalilo vibili.

26 “Utende mango za muhamvi, mango tano mbuli ya mwambu umoja wa dihema, 27 na mango tano mbuli ya mwambu uyagwe na mango tano mbuli ya mwambu wa kudihongela zuwa, kukisogo mwa dihema. 28 Mango ili hagati ya mbao za dihema ibalazigwe kulawa mwambu uno mbaka uyagwe wa dihema. 29 Mbao zose uzibake zahabu, na utende vipete va zahabu kugogeleza zimango. Vivija mango zose uzibake zahabu. 30 Utende dihema kamba vinikulagusile kuja kulugongo.

31 “Tenda panziya da kitani inogile dilukigwe na sufi ya langi ya buluu na ya zambalau na udung'hu na udigele ulembo wa viumbe weli na mabawa watendigwe na mafundi wanogile. 32 Udinanike mzimhanda nne za muhamvi zibakigwe zahabu, na zili na vifungilo va zahabu na zikale mvikalilo vine va shaba. 33 Dike dipanziya hasi ya vifungilo uchanha ya dihema, abaho udigale disanduku da lagano mumo mdihema kukisogo ya dipanziya. Panziya dijo digole hanhu hong'ala na hanhu hong'ala ng'hani. 34 Wike ingubiko uchanha ya disanduku da lagano mgati ya hanhu hong'ala ng'hani. 35 Ija imeza ikigwe gamagate uike mwambu wa kasikazini kunze ya dipanziya na kija ikingolobweda kike mwambu wa kusini wa dihema.

36 “Hana ulwingililo lwa dihema utende panziya da kitani inogile dizamile dilukigwe na sufi ya langi ya buluu na ya zambalau na udung'hu na udihambe kwa ulembo. 37 Abaho utende mhanda tano za muhamvi za dipanziya na uzibake zahabu na wike vifungilo va zahabu na utende vikalilo vitano va shaba ya kiguzi mbuli ya mhanda zizo.”