27
Upango wa kulavila nhosa
(Kulawa 38:1-7)
1 Imulungu kamulongela Musa, “Utende upango wa kulavila nhosa kwa mbao za mkese. Upango awo uigale kila mwambu, utali wake uwe makono mabili na nusu na ugazi wake uwe makono mabili na nusu na utali wake wa kuchola uchanha uwe mkono umoja na nusu.
2 Utende mhembe nne mna zikona nne, na mhembe azo zokuwa kinhu kimoja na upango awo na uubake shaba ya kiguzi.
3 Viya vose va kulavila nhosa uvitende kwa shaba ya kiguzi, zae da kwikila mitozi na lwiko lwa kuzolela mitozi na bakuli na lwiko lwa kuhindulila inhosa na viya va kuhalila moto.
4 Abaho utende lwavu lwa shaba ya kiguzi na wike vipete vine va shaba ya kiguzi mna zikona nne.
5 Ulwike lwavu awo mumgwazo hasi ya upango wa kulavila nhosa, ili uvike nusu ya upango wa kulavila nhosa.
6 Usongole mango za muhamvi za kupapila awo uupango wa kulavila nhosa na uzibake shaba ya kiguzi.
7 Mango azo uzigele mvipete kila mwambu wa upango wa kulavila nhosa ili upapigwe.
8 Utende upango awo kwa mbao na uwe na uvungu kamba vinikulagusile kuja kulugongo.
Luwa lwa mting'hano
(Kulawa 38:9-20)
9 “Utende luwa lwa mting'hano. Mwambu wa kusini kuwe na mapanziya gatendigwe kwa kitani inogile ilukigwe, mapanziya gago gawe na utali wa makono malongo mane na nne kwa mwambu umoja.
10 Mapanziya gago gagogelezwe kwa mhanda za shaba ya kiguzi malongo mabili zili na vikalilo va shaba ya kiguzi. Ivifungilo va zimhanda na nzabi zake viwe va shaba.
11 Vivija mwambu wa kasikazini, utali wa dipanziya uwe makono malongo mane na nne kwa mwambu umoja na mhanda malongo mabili za shaba ya kiguzi, lakini vifungilo va zimhanda na nzabi zake viwe va shaba.
12 Mwambu wa kudihongela zuwa dipanziya diwe na utali wa makono malongo mabili na mbili kwa mwambu umoja na mhanda longo na vikalilo longo.
13 Mwambu wa kudilawila zuwa, mwambu wa kwingilila, luwa luwe na ugazi wa malongo mabili na mbili.
14 Panziya da mwambu umoja wa umulango diwe na ugazi wa makono sita na nusu hamoja na mhanda ndatu na vikalilo vidatu.
15 Vivija mwambu uyagwe wa umulango dipanziya diwe na ugazi wa makono sita na nusu hamoja na mhanda ndatu na vikalilo vidatu.
16 Hana umulango wa uluwa wike panziya dizamile dili na ugazi wa makono tisa, ditendigwe kwa nzabi za buluu na zambalau na udung'hu na kitani inogile ilukigwe na dihambigwe vinogile. Panziya dijo digogigwe na mhanda nne zili na vikalilo vine.
17 Mhanda zose kuzunguluka uluwa zigogigwe na mango za shaba, vifungilo vake viwe va shaba na vikalilo vake viwe va shaba ya kiguzi.
18 Luwa luwe na utali wa makono malongo mane na nne na ugazi wa makono malongo mabili na mbili na utali wa kuchola uchanha wa makono mabili na nusu. Mapanziya gake gawe ga kitani inogile na vikalilo va shaba ya kiguzi.
19 Vinhu vose viyagwe vizengiligwe na va kutumia mdihema na uluwa, vose viwe va shaba ya kiguzi hata vifungilo va nzabi viwe va shaba ya kiguzi.
Mavuta ga itaa
(Walawi 24:1-4)
20 “Walagize wanhu wa Izilaeli wakugalile mavuta ganogile ga mizeituni mbuli ya taa, ili taa zikwake kila siku ichungulo.
21 Haluni na wanage weke taa mdihema da mting'hano, kunze ya panziya dili kuulongozi wa sanduku da lagano. Mgameso gangu taa azo zikwake toka ichungulo mbaka imitondo. Lagizo dino digogigwe milele na Waizilaeli na ulelo wao.