28
Viwalo va walava nhosa
(Kulawa 39:1-7)
1 “Mgale ndugu yako Haluni na wanage wa kimbigalo, Nadabu na Abihu na Eleazali na Itamali. Uwasagule hagati ya wanhu wa Izilaeli ili wanisang'hanile kamba walava nhosa.
2 Umsonele ndugu yako Haluni viwalo va kulavila nhosa ili yoneke kanoga na yagweleligwe ukulu mgameso ga wanhu.
3 Walagize mafundi waniwagwelele nzewele wamtendele Haluni viwalo, ili yekigwe kwa sang'hano ya kunilavila nhosa.
4 Walongele wamtendele vinhu vino, kikoba cha mmhambaga na kikoti na kanzu igeligwe ulembo na kanzu na kilemba na mkwiji. Ndugu yako Haluni na wanage wavale viwalo vivo ili wanisang'hanile kamba walava nhosa.
5 Mafundi awo wasone viwalo vivo kwa sufi ya buluu na zambalau na udung'hu na nzabi za zahabu na kitani inogile ilukigwe.
Kikoti cha mulava nhosa
6 “Wakitende kikoti cha mulava nhosa kwa sufi ya buluu na zambalau na udung'hu na nzabi za zahabu na kitani inogile ilukigwe na kuhambigwa goya.
7 Kiwe na nzabi mbili zisonigwe mzikona mbili ili zinzabi zifungigwe mmaega.
8 Mkwiji wa kufungila utendigwe kwa vinhu vivija va nzabi za zahabu na sufi ya buluu na ya zambalau na udung'hu na kitani inogile ilukigwe na kutenda kiwe kinhu kimoja na ikikoti.
9 “Abaho usole mabwe mabili ga shohamu, ugandike matwaga ga wana longo na wabili wa Izilaeli,
10 kamba viwaleleke, matwaga sita mdibwe dimoja na matwaga sita mdibwe diyagwe.
11 Ugandike gamatwaga ga wana wa Izilaeli mgamabwe gago kamba munhu viyosongola muhuli abaho ugakande mna ivigigo va zahabu.
12 Mabwe gago mabili gekigwe mzinzabi za ikikoti kulagusa makabila longo na mabili ga wana wa Izilaeli. Avo Haluni yavale matwaga gago mmaega gake mgameso gangu niye Mndewa Imulungu, kamba kinhu cha kukumbuka.
13 Utende vigigo vibili va zahabu,
14 na mikufu mibili ya zahabu inogile ilukigwe kamba nzabi. Uifunge ayo imikufu mvigigo vivo.
Kikoba cha mmhambaga
(Kulawa 39:8-21)
15 “Utende kikoba cha mmhambaga, mbuli ya kujuwa viyolonda Imulungu. Kitendigwe kwa vinhu vivija kamba ikikoti. Ukitende kwa nzabi za zahabu na sufi ya buluu na ya zambalau na udung'hu na kitani inogile ilukigwe goya.
16 Kikoba acho kibandigwe na kiigale kila mwambu, utali wake uwe lwayo lumoja na ugazi wake uwe lwayo lumoja.
17 Kihambigwe kwa misafa mine ya mabwe ga bei ng'hulu, msafa wa ichanduso uhambigwe kwa mabwe ga akiki na topazi na alimasi ndung'hu,
18 msafa wa kabili uhambigwe kwa mabwe ga zumalidi na johali ya langi ya samawati na alimasi,
19 msafa wa kadatu uhambigwe kwa mabwe ga yasinto na akiki ndung'hu na ametisito,
20 na msafa wa ikane uhambigwe kwa mabwe ga zabalajadi na shohamu na yasipi. Mabwe gago gose gakandigwe mvigigo va zahabu.
21 Avo hokuwa na mabwe longo na mabili, kila dibwe jandikigwe twaga da wana wa Izilaeli, kila dibwe dokuwa kamba muhuli, kulagusa makabila longo na mabili.
22 “Mbuli ya kikoba cha mmhambaga, utende mikufu ya zahabu inogile na ilukigwe kamba nzabi.
23 Abaho utende pete mbili za zahabu na uzifunge mzikona mbili za ikikoba,
24 na imikufu mibili ya zahabu uifunge mzipete zizo.
25 Mwambu umoja na mwambu uyagwe wa imikufu uzifunge mvigigo vibili va kija ikikoba ili vigogeleze ikikoti mmaega mwambu wa kuulongozi.
26 Abaho utende pete mbili za zahabu na uzifunge kwa hasi mna zikona mbili za hasi ya ikikoba behi na kikoti.
27 Abaho utende pete mbili ziyagwe za zahabu uzike mumgwazo wa ikikoti mwambu wa hasi, hanhu aho ikikoti hokiilumba na umkwiji ulukigwe goya.
28 Kikoba cha mmhambaga kifungigwe mkikoti kwa nzabi ya buluu, ili acho ikikoba cha mmhambaga kigoge goya na kikale mumkwiji ulukigwe goya.
29 “Haluni yahengila hanhu hong'ala yakivale mmhambaga kikoba acho cha kujuwa golondigwa acho chandikigwe matwaga gamakabila longo na mabili ga wana wa Izilaeli, ili niye Mndewa Imulungu sikuniwasemwe mweye.
30 Mkikoba acho ugele mabwe ga kujuwa golondigwa na gawe mwiimhambaga ya Haluni kila viyokwingila kuulongozi wangu. Abaho Haluni kogajuwa gaja gonilonda kwa Waizilaeli.
Viwalo viyagwe va mulava nhosa
(Kulawa 39:22-31)
31 “Utende kanzu da kuvalila kikoti acho kwa sufi ya buluu.
32 Kanzu ajo diwe na zonzo da kwingila pala. Zonzo ajo dizunguluswe lugigo lulukigwe goya ili sikudidegeke.
33 Mwiimhindo ya hasi uluke kinhu kamba tonga kwa sufi ya buluu na zambalau na udung'hu. Hagati ya kila tonga wike nyangili ya zahabu.
34 Wike tonga abaho nyangili, tonga abaho nyangili kuzunguluka kanzu jose.
35 Haluni yavale kanzu dijo viyosang'hana sang'hano ya kulava nhosa na sauti ya nyangili yohulikigwa viyokwingila hanhu hong'ala mgameso gangu na viyolawa kunze, ili sikuyafe.
36 “Abaho utende lung'andi lwa zahabu inogile na wandike mbuli zino, ‘Kalavigwa kwa Mndewa Imulungu.’
37 Abaho ulufunge lung'andi awo kuulongozi wa kilemba kwa luzabi lwa buluu.
38 Haluni yaluvale lung'andi awo mkihanga chake. Kwa kutenda vivo kopapa gehile ga wanhu wa Waizilaeli gawatendile viondavila nhosa zao, avo nozitogola nhosa zao.
39 “Umtendele Haluni kanzu digeligwe ulembo na dilukigwe kwa kitani inogile na umvaze kilemba cha kitani inogile na mkwiji uhambigwe goya.
40 “Uwatendele wanage Haluni makanzu na mikwiji na vilemba ili oneke wanoga na wagweleligwe ukulu.
41 Umvaze ndugu yako Haluni na wanage viwalo vivo, abaho uwagidile mavuta na uwekile makono na uwalave kumwangu niye ili wanisang'hanile kamba walava nhosa.
42 Vivija wasonele kaputula za kitani ziwagubike toka mvigudi mbaka mgamahaza ili sikuwakale mwazi.
43 Haluni na wanage wavale kaputula zizo wahengila mdihema da mting'hano, hebu waheza muupango wa kulavila nhosa, kusang'hana kamba walava nhosa hanhu hong'ala ili sikuwoneke wa mwazi na wakomigwe. Lagizo dino digogigwe milele na Haluni na ulelo wake.