29
Walava nhosa olavigwa kwa Mndewa
(Walawi 8:1-36)
1 “Na gweye uwatendele vino Haluni na wanage ili kuwatenda wanisang'hanile kamba walava nhosa. Sola bofu da ng'ombe mbigalo na ng'hondolo wabili wa kimbigalo watelele,
2 magate hagageligwe hamila, na maandazi hagageligwe hamila na gakandigwe kwa mavuta na vigate visisili vigeligwe mavuta. Vose vino uvitende kwa usage unogile wa ngano.
3 Abaho uvike mkigelo undavile nhosa hamoja na dija dibofu da ng'ombe na iwang'hondolo wabili wa kimbigalo.
4 “Abaho uwagale Haluni na wanage hana ulwivi lwa dihema da mting'hano, abaho uwakoshe kwa mazi.
5 Abaho usole iviwalo va ulava nhosa na umvaze Haluni, kanzu na kanzu igeligwe ulembo na kikoti na kikoba cha mmhambaga na umfunge uja umkwiji ulukigwe goya.
6 Umvaze kilemba mdipala na wike uja ulung'andi lung'alile mumgwazo wa ikilemba.
7 Abaho usole gaja gamavuta ga kubaka, umgidile Haluni mdipala jake avo komulava kumwangu.
8 “Abaho uwagale wanage Haluni na uwavaze gamakanzu.
9 Uwafunge mikwiji mvigudi vao na uwavaze vilemba vao. Vino vivo vonda uwatende Haluni na wanage wang'ale. Hewo na ulelo wao okuwa walava nhosa milele.
10 “Abaho udigale dija dibofu da kimbigalo da ng'ombe haulongozi wa dihema da mting'hano. Haluni na wanage weke makono gao kudipala da idibofu.
11 Dichinje bofu dijo mgameso gangu aho hana ulwivi lwa dihema da mting'hano.
12 Sola damu kidogo na uibake kwa kidole chako mzimhembe za upango wa kulavila nhosa, na damu yonda isigale ite hasi ya uupango.
13 Abaho ulave mavuta gose geli mna ivinhu va mgati, maini na figo mbili uvisome moto uchanha ya upango.
14 Lakini nyama yake na ing'hwembe na mavi gake uvisole ukavisome moto kunze ya ng'hambi yenu. Ino ayo nhosa ya kusegesa nzambi.
15 “Abaho sola ng'hondolo imoja mna iwang'hondolo wabili wa kimbigalo na umulongele Haluni na wanage weke makono gao kudipala jake.
16 Umchinje na usole idamu uimizile banzi zose za uupango wa kulavila nhosa.
17 Abaho mkanhe vihande vihande ayo ing'hondolo. Sunha ivinhu va mgati na migulu yake, uvike vose hamoja na dipala na nyama ziyagwe.
18 Abaho umsome ng'hondolo wose uchanha ya uupango, ili undavile niye nhosa ya kusoma moto. Mnung'ho wa nhosa ayo oninogeza niye Mndewa Imulungu.
19 “Umsole ija ing'hondolo iyagwe, Haluni na wanage weke makono gao kudipala jake.
20 Umchinje ng'hondolo ayo na usole damu kidogo na umbake Haluni na wanage mumgwazo wa magwiti gao ga mkono wa kudila na mna imidole ng'hulu ya makono gao ga kudila na mna imidole ng'hulu ya magulu gao ga mkono wa kudila. Damu yonda isigale uimizile banzi zose za uupango wa kulavila nhosa.
21 Sola damu kidogo ili muupango wa kulavila nhosa hamoja na gaja gamavuta ga kubakala ummizile Haluni na viwalo vake, vivija uwamizile wanage na viwalo vao, avo Haluni na wanage okuwa wang'ala na viwalo vao kumwangu niye.
22 “Abaho usole mavuta ga ng'hondolo ayo wa ikimbigalo, mavuta ga mkila wake na mavuta gagubike ivinhu va mgati na maini na figo zose mbili na mavuta gake na kihili cha ukudila.
23 Kulawa mna ikigelo cha magate hagageligwe hamila, kili kuulongozi wa Mndewa Imulungu, sola gate dimoja na andazi dimoja digeligwe mavuta na kigate kisisili kimoja.
24 Vinhu vose avo wagwelele Haluni na wanage na wao ovinula uchanha kamba kilaguso cha kundavila niye Mndewa Imulungu.
25 Abaho uvisole mmakono gao uvisome moto muupango wa kulavila nhosa hamoja na ija inhosa ya kusoma moto, ili vinung'hile goya na kuninogeza niye Mndewa Imulungu. Ino ayo nhosa ilavagwa kwa moto.
26 “Abaho usole kidali cha ing'hondolo wakumtenda Haluni yalavigwe kumwangu na ukinule uchanha kamba kilaguso cha kundavila niye Mndewa Imulungu. Kidali acho chokuwa chako.
27 “Mulava nhosa yahalavigwa kumwangu, kidali na kihili cha ng'hondolo mbigalo vilavigwe kumwangu, vose avo vokuwa va Haluni na wanage.
28 Avo milele wanhu wa Izilaeli wajuwe kamba zinhosa za kugala kuilumba ziwonilavila niye Mndewa Imulungu kidali na kihili mwenyego Haluni na ulelo wake. Ayo yokuwa nhosa yao kwa Mndewa Imulungu.
29 “Haluni yahafa, viwalo vake ving'ala wagweleligwe wanage wavivale siku donda wabakigwe mavuta na kwikiligwa makono.
30 Mwanage Haluni yonda yasole hanhu ha ulava nhosa wa tatake yavivale viwalo avo kwa siku saba mna dihema da mting'hano ili yasang'hane mna ihanhu hong'ala.
31 “Sola nyama ya ayo ing'hondolo yalavigwe kumwangu, na uitelekele hanhu hong'ala.
32 Abaho uwagwelele Haluni na wanage, na wao waidile hana ulwivi lwa dihema da mting'hano hamoja na magate gasigale mkigelo.
33 Wavije vinhu avo visang'hanilwe kuwalava kumwangu na kuwatenda wailumbe na niye, lakini munhu yoyose iyagwe sikuyaje kwavija vinhu avo ving'ala.
34 Kamba nyama yoyose hebu magate vosigala mbaka imitondo, uvisome moto. Sikuvidigwe kwavija ving'ala.
35 “Vino vivo vonda uwatendele Haluni na wanage kamba vinikulagize. Uwatende wang'ale kwa siku saba,
36 na kila siku uchinje ng'ombe mbigalo yawe nhosa ya kusegesa nzambi kwa kutenda vivo koutenda upango wa kulavila nhosa ung'ale, abaho uugidile mavuta ili uulave kumwangu.
37 Kwa siku saba uutende upango wa kulavila nhosa ung'ale na uulave kumwangu. Wahamambukiza upango awo okuwa ung'ala na kinhu chochose chonda kiukwase chong'ala.
Nhosa za kila siku
(Kupetigwa 28:1-8)
38 “Kila siku, kipindi chose kumwande ulave nhosa uchanha ya upango, mabofu mabili ga ng'hondolo geli na mwaka umoja.
39 Bofu dimoja da ng'hondolo udilave imitondo na diyagwe ichungulo.
40 Hamoja na dija dibofu da ng'hondolo diulava imitondo ulave na vibaba vibili va usage ulibule midundulu uhanganyigwe na nyhupa imoja ya mavuta ganogile ga mzeituni, na nyhupa imoja ya divai kamba nhosa ya king'waji.
41 Vivija na dija dibofu da ng'hondolo dilavagwa ichungulo udilave hamoja na nhosa ya ndiya na nhosa ya king'waji kamba dija da imitondo. Mnung'ho wa nhosa azo zilavigwa kumwangu oninogeza niye Mndewa Imulungu.
42 Nhosa ino ya kusoma moto ilavigwe siku zose, ulelo mbaka ulelo mgameso gangu niye Mndewa Imulungu, kuulongozi wa ulwivi lwa dihema da mting'hano, aho honda niiting'hane na mweye na kulonga na mweye.
43 Vivija aho honda niiting'hane na Waizilaeli na mng'alo wangu ohatenda hanhu aho hang'ale.
44 Avo dihema da mting'hano na uupango wa kulavila nhosa, novitenda ving'ale. Vivija Haluni na wanage nowatenda wang'ale ili wanisang'hanile kamba walava nhosa.
45 Avo, niye nokala na Waizilaeli, na nokuwa Imulungu wao.
46 Na hewo ojuwa kamba niye Mndewa Imulungu wao, niwalava mwiisi ya Misili ili ng'hale nao. Niye ayo Mndewa Imulungu wao.