40
Hema dokwinuligwa
1 Abaho Mndewa Imulungu kamulongela Musa,
2 “Mna isiku ya ichanduso ya mwezi wa ichanduso udinule dihema da mting'hano.
3 Mgati mdihema ajo wike dija disanduku da lagano dili na malagizo longo, abaho wike panziya kuulongozi wake.
4 Abaho wingize imeza na wike viya vake uchanha yake. Vivija wingize kija ikingolobweda na uzike zitaa uchanha yake.
5 Wike uupango wa zahabu wa kusomela ubani kuulongozi wa disanduku da lagano, abaho unanike dipanziya hana ulwivi lwa dihema da mting'hano.
6 Wike uupango wa kulavila nhosa kuulongozi wa ulwivi lwa dihema da mting'hano.
7 Wike dibakuli da shaba ya kiguzi hagati ya dihema da mting'hano na uupango wa kulavila nhosa na udimemeze mazi.
8 Abaho uzungulusile luwa na wike panziya hana ulwivi lwake.
9 “Abaho udilave kumwangu dihema hamoja na viya vake vose kwa kuvigidila gamavuta gang'alile, na hema na viya vake vong'ala.
10 Abaho uulave kumwangu uupango wa kulavila nhosa hamoja na viya vake vose kwa kuvigidila gamavuta gang'alile na vose vong'ala.
11 Vivija dibakuli da shaba ya kiguzi na mgimbo wake navo uvitendele kamba vivo.
12 “Abaho umgale Haluni na wanage hana ulwivi lwa idihema da mting'hano, na uwakoshe kwa mazi
13 Abaho umvaze Haluni iviwalo ving'alile, umgidile mavuta gang'alile na umulave kumwangu, ili yanisang'hanile kamba mulava nhosa.
14 Wagale wanage na uwavaze gaja gamakanzu.
15 Abaho uwagidile mavuta kamba viumgidile tatao, ili na hewo vivija wanisang'hanile kamba walava nhosa. Wahawagidila mavuta hewo na ulelo wao okuwa walava nhosa siku zose.”
16 Musa katenda kila kinhu kamba Mndewa Imulungu viyamulagize.
17 Avo mna isiku ya ichanduso ya mwezi wa ichanduso mna umwaka wa kabili toka walawe Misili, dihema da mting'hano dinuligwa.
18 Musa viyadinule dihema keka vikalilo vake, kazinula zimbao, na keka zimango na kazisimika mhanda zake.
19 Abaho katandika ingubiko ya dihema na keka ingubiko iyagwe uchanha yake, kamba Mndewa Imulungu viyamulagize.
20 Abaho kasola vija ivibao vibili va mabwe kavigela mdisanduku da lagano. Kazigela zimango za kudipapila mvipete vake na keka ingubiko uchanha yake.
21 Abaho kadika disanduku mgati ya dihema na kananika dipanziya. Kwa kutenda vivo kadigubika disanduku da lagano sikujoneke, kamba Mndewa Imulungu viyamulagize.
22 Abaho Musa keka imeza mgati ya dihema da mting'hano, mwambu wa kasikazini kuulongozi wa dipanziya,
23 uchanha ya imeza keka gamagate galavigwe kwa Mndewa, kamba Mndewa Imulungu viyamulagize.
24 Keka ikingolobweda mgati ya dihema da mting'hano mwambu wa kusini mwambu kwa mwambu na imeza.
25 Mumo mgati kuulongozi wa Mndewa Imulungu kazibwinha zitaa kamba Mndewa Imulungu viyamulagize.
26 Abaho Musa keka uja uupango wa zahabu wa kusomela ubani mgati ya dihema da mting'hano, kuulongozi wa dipanziya,
27 na kausoma ubani unung'hila goya uchanha yake kamba Mndewa Imulungu viyamulagize.
28 Kananika panziya hana ulwivi lwa dihema da mting'hano,
29 keka aho behi ya ulwivi lwa dihema da mting'hano upango wa kulavila nhosa, uchanha yake keka nhosa ya kusoma moto na nhosa ya ndiya kamba Mndewa Imulungu viyamulagize.
30 Abaho keka dibakuli da shaba ya kiguzi hagati ya dihema da mting'hano na uupango wa kulavila nhosa, na kadimemeza mazi.
31 Musa na Haluni na wanage wose wasunha makono gao na magulu gao kulawa mdibakuli dijo,
32 kila viwengile mgati ya dihema da mting'hano hebu viwaukwesele uja uupango wa kulavila nhosa, watenda vivo kamba Mndewa Imulungu viyamulagize Musa.
33 Kukimambukizo Musa keka uluwa kuzunguluka dihema da mting'hano na uupango wa kulavila nhosa, na kananika panziya hana ulwivi lwa uluwa. Avo Musa kaimambukiza sang'hano yose.
Wingu uchanha ya dihema da mting'hano
(Kupetigwa 9:15-23)
34 Abaho wingu digubika dihema da mting'hano na ukulu wa Mndewa Imulungu umema mdihema jose.
35 Musa hadahile kwingila mna dihema da mting'hano kwavija wingu dijo dikala dimile uchanha yake, na ukulu wa Mndewa Imulungu ukala umemile mdihema ajo.
36 Waizilaeli hawacholile mwanza wowose mbaka tanhu wingu dijo vidisegesigwe uchanha ya dihema.
37 Kamba wingu hadisegesigwe hawacholile kokose, wabeta mbaka wingu dijo vidisegesigwe.
38 Mna imiyanza yao yose Waizilaeli wajona diwingu da Mndewa Imulungu dikala uchanha ya dihema da mting'hano imisi, na ikilo wona moto okwaka mdiwingu uchanha ya dihema.