2
Msenga wa Mndewa ako Bokimu
1 Msenga wa kuulanga wa Mndewa Imulungu kasegela Giligali, kachola Bokimu, kawalongela Waizilaeli, “Niwalava mweye mwiisi ya Misili na niwagala mwiisi iniiduwile nowagwaa wahenga zenu. Nilonga, ‘Sidibena bule lagano jangu na mweye,
2 na sikumutende lagano na wenekae wa isi ino, mubomole kila upango wao wa kulavila nhosa.’ Lakini hamnitegeleze, ila mutenda viyagwe!
3 Avo, nowalongela, siwawinga wenekae wa isi ino, lakini hewo na imilungu yao okuwa mtego wa kuwanamata.”
4 Bahaja imsenga ayo wa Mndewa Imulungu viyawalongele wanhu wose wa Izilaeli mbuli azo, iwanhu waguta na kulila.
5 Avo wahakema hanhu aho Bokimu. Wamulavila nhosa Mndewa Imulungu hanhu aho.
Ifa ya Yoshua
6 Yoshua viyawalagile Waizilaeli, kila munhu kachola aho kuwili uhazi wake, ili yakaisole isi yake.
7 Avo iwanhu wa Izilaeli wamsang'hanila Mndewa Imulungu siku zose za ugima wa Yoshua, na siku zose za ugima wa iwavele wagendelele kukala wagima viyafile Yoshua, awo wagonile gose gayatendile Mndewa Imulungu kwa iwanhu wa Izilaeli.
8 Yoshua mwanage Nuni, imsang'hanaji wa Mndewa Imulungu, kafa kuno kana miyaka gana dimoja na longo.
9 Wamzika Yoshua mwiisi ya uhazi wake ako Timinati Helesi, isi ili kuvigongo va Efulaimu, mwambu wa kasikazini wa lugongo lwa Gaashi.
10 Abaho wanhu wose wa ulelo wa Yoshua wafa, avo walawila wanhu wa ulelo uyagwe awo hawamjuwile Mndewa Imulungu hebu kujuwa gaja gayawatendele iwanhu wa Izilaeli.
Waizilaeli oleka kumtambikila Mndewa Imulungu
11 Avo iwanhu wa Izilaeli watenda gehile mgameso ga Mndewa Imulungu na wavitambikila vinyago va Baali.
12 Wamuleka Mndewa Imulungu, Imulungu wa iwahenga zao, ayo yawalavile mwiisi ya Misili, wasonga kuitambikila milungu iyagwe, imilungu ya iwanhu wa isi ziwazunguluke na waitambikila. Avo wamgevuza Mndewa Imulungu.
13 Wamuleka Mndewa Imulungu na wamsang'hanila Baali na mhanda za Ashitoleti.
14 Avo Mndewa Imulungu kawagevuzikila Waizilaeli, na kawaleka wabavi wawebile vinhu vao. Kawagela mmakono ga iwanhu owehila, awo iwanhu wa isi ziwazunguluke, na hawadahile kuwatowa.
15 Kila kuwacholile kuitowa Mndewa Imulungu kawagela mmakono ga iwanhu owehila, kamba viyakalile yawazumile na kuiduwila. Avo wakala mmagazo makulu.
16 Abaho Mndewa Imulungu kawagwaa wasemi wawakombole kulawa mmakono ga iwanhu awo wawabokile vinhu vao.
17 Lakini hawawategeleze bule iwasemi wao, kwavija waikweleleza imilungu iyagwe na waitambikila. Hawakawile kuileka inzila iwaikweleleze iwahenga zao, awo wagagogile malagizo ga Mndewa Imulungu, na hawatendile kamba hewo.
18 Mndewa Imulungu yahawagalilaga wanhu imsemi, heyo mwenyego kakala hamoja na msemi ayo, kawahonya na wanhu owehila siku zose za ugima wa ayo imsemi. Mndewa Imulungu kawonelaga bazi kwavija wamulilila mbuli ya magazo gao na kudununzwa.
19 Lakini msemi ayo yahafa, obwelela mbuli zao za umwaka, otenda gehile kubanza iwahenga zao, oikweleleza imilungu iyagwe na oisang'hanila na kuitambikila, na hawaleka mbuli zao zihile hebu udala wa mizoyo yao.
20 Avo Mndewa Imulungu kawagevuzikila iwanhu wa Izilaeli na kalonga, “Kwavija wanhu wano wabena lagano jangu diniwalagize iwahenga zao, na walema kunitegeleza,
21 siwawinga ng'o iwanhu wa isi zisigale, isi ziyazilekile Yoshua kipindi viyafile,
22 ili kubitila isi azo niwageze iwanhu wa Izilaeli, kamba odaha kuikweleleza nzila ya Mndewa Imulungu kamba viwatendile iwahenga zao hebu hawadaha bule.”
23 Avo, Mndewa Imulungu kazileka isi azo, hazisegese himahima, na hazigelile mmakono ga Yoshua.