15
Isi ya iwanhu wa kabila da Yuda
1 Isi iwagweleligwe iwanhu wa kabila da Yuda kamba viweli mzing'holo zao, ikala kulawa umwambu wa kusini mbaka kuna imbaka ya Edomu na mbaka ako kusini ya uluwala lwa Sini.
2 Imbaka yao kuna umwambu wa kusini ikala kulawa kumgwazo wa ibahali ya Mkele, kulawa kudiswila dilongoza kusini.
3 Igendelela umwambu kusini na ibita kumtelemuko wa Akilabimu abaho Sini, abaho ichola umwambu wa kusini wa Kadeshi Balinea na igendelela mbaka behi na Hesiloni na ivika Adali na kuhinduka kuchola Kalika.
4 Kulawa kuko ibita behi na Azimoni na kukweleleza ingema ya ikizanda cha Misili mbaka kuvikila kuna ibahali ya Meditelania. Ako kuko ibitile imbaka ya Yuda kwa umwambu wa kusini.
5 Imbaka yao kwa umwambu wa kudilawila zuwa ikala Ibahali ya Mkele, aho hawingilile ulwanda lwa Yolidani. Na imbaka yao kwa umwambu wa kasikazini ikala kulawa kumgwazo wa Bahali ya Mkele aho kudiswila da ulwanda lwa Yolidani,
6 imbaka ayo ibita ako Beti Hogila na umwambu wa kasikazini wa Beti Alaba mbaka kuna idibwe da Bohani mwanage Lubeni.
7 Imbaka ayo igendelela mbaka ako Debili kubonde da Akoli, na kugendelela umwambu wa kasikazini wa kuchola Giligali buga dikalile diilola na umtelemuko wa Adumimu ukalile mwambu wa kusini wa kubonde. Abaho ayo imbaka igendelela ako kuna inzasa ya Eni Shemeshi na kuhelela ako Eni Logeli.
8 Abaho ayo imbaka ibita kubonde da Hinomu, umwambu wa kusini wa ikigongo cha Wayebusi, vivija yojuwigwa kamba Yelusalemu, na ibita kuna inhembeti ya ulugongo ulo kuna umwambu wa kudihongela zuwa wa kubonde da Hinomu na ihelela ako kuna umwambu wa kasikazini wa kubonde da Lefaimu.
9 Kulawa ako imbaka ibitila kuna inhembeti ya ulugongo mbaka kuna zinzasa za Nefitoa na mbaka kuna gamabuga ga lugongo lwa Efuloni. Aho ayo imbaka ihinduka kuchola Baala vivija yojuwigwa kamba Kiliati Yealimu,
10 abaho imbaka izunguluka umwambu wa kudihongela zuwa ichola kulugongo lwa Seili, na ibitila kasikazini ya lugongo lwa Yelimu vivija yojuwigwa kamba Kesaloni, na ihumuluka mbaka Beti Shemeshi ako ibita behi na Timina.
11 Abaho igendelela umwambu wa kasikazini wa Ekiloni, izunguluka kuchola Shikeloni ako ibita behi na lugongo lwa Baala mbaka Yabineeli na ihelela kuna ibahali.
12 Imbaka kwa umwambu wa kudihongela zuwa ikala ibahali ing'hulu. Ayo ikala imbaka iwazunguluke iwanhu wa kabila da Yuda kamba viweli mzing'holo zao.
Kalebu kosola uhazi wake
(Wasemi 1:11-15)
13 Kamba Mndewa Imulungu viyamulagize Yoshua, kamgwelela Kalebu mwanage Yefune isi mna iwanhu wa kabila da Yuda, kamgwelela Kiliati Aliba vivija yojuwigwa kamba Hebuloni. Ayo Aliba kakala tatake Anaki.
14 Kalebu kawawinga wanhu wadatu wa ulelo wa Anaki hamoja na wanhu zao, wakalile Sheshai na Ahimani na Talimai.
15 Abaho kakwela kulawa kuko na kawacholela iwenekae wa buga da Debili, ditwaga da Debili ako umwaka dijuwigwa kamba Kiliati Sefeli.
16 Kalebu kalonga, “Mbigalo yoyose yonda yadivamile na kudisola buga da Kiliati Sefeli nomgwaa mndele wangu Akisa yawe mwehe wake.”
17 Avo, Osinieli mwanage Kenazi, ndugu yake Kalebu, kadisola buga dijo, avo Kalebu kamgwaa Osinieli mndele wake Akisa yawe mwehe wake.
18 Akisa viyacholile kwa imkasano wake, kamulongela imkasano wake yampule tatake mgunda. Ako kumwande Akisa kachola kwa tatake kahumuluka mkihongwe wake, Kalebu kamuuza, “Kolonda choni?”
19 Akisa kamwidika, “Nolonda unitende nimwede. Kwavija kunigwelela isi ya Negebu avo vivija unigwelele na zinzasa za gamazi.” Avo Kalebu kamgwaa inzasa ili kulugongo na inzasa ili kubonde.
Mabuga ga iwanhu wa kabila da Yuda
20 Uno awo uhazi wa iwanhu wa kabila da Yuda kamba viweli mzing'holo zao.
21 Mabuga ga iwanhu wa kabila da Yuda kwa umwambu wa kusini kuna imbaka ya Edomu gakala, Kabiseeli na Edeli na Yaguli,
22 na Kina na Dimona na Adada,
23 na Kedeshi na Hazoli na Itinani,
24 na Zifu na Telemu na Bealoti,
25 na Hazoli Hadata na Kelioti Haziloni vivija dojuwigwa kamba Hazoli,
26 na Amamu na Shema na Molada,
27 na Hasali Gada na Heshimoni na Beti Peleti,
28 na Hasali Shuali na Beelisheba na Biziotia,
29 na Baala na Iyimu na Esemu,
30 na Elitoladi na Kesili na Holima,
31 na Sikilagi na Madimana na Sanisana,
32 na Lebaoti na Shilihimu na Aini na Limoni. Gose kwa gose gakala mabuga malongo mabili na tisa hamoja na ivijiji vake.
33 Mabuga gakalile kubawe gakala, Eshitaoli na Sola na Ashina,
34 na Zanoa na Enganimu na Tapua na Enamu,
35 na Yalimuti na Adulamu na Soko na Azeka,
36 na Shaalaimu na Aditaimu na Gedela na Gedelotaimu, gakala mabuga longo na nne hamoja na ivijiji vake.
37 Vivija wagweleligwa mabuga ga Senani na Hadasha na Migidali Gadi,
38 na Dileani na Mizipe na Yokiteeli,
39 na Lakishi na Bozikati na Eguloni,
40 na Kaboni na Lahimamu na Kitilishi,
41 na Gedeloti na Beti Dagoni na Naama na Makeda. Mabuga gose kwa gose gakala longo na sita hamoja na ivijiji vake.
42 Vivija wagweleligwa mabuga ga Libina na Eteli na Ashani,
43 na Yifita na Ashina na Nezibu,
44 na Keila na Akizibu na Malesha. Gose kwa gose gakala mabuga tisa hamoja na ivijiji vake.
45 Vivija wagweleligwa Ekiloni hamoja na ivijiji vake na kae zake,
46 kulawa Ekiloni mbaka kuna ibahali, behi na Ashidodi hamoja na ivijiji vake.
47 Ashidodi hamoja na vijiji vake na kae zake, Gaza hamoja na vijiji vake na kae zake, mbaka kizanda cha Misili na kuna ibahali ing'hulu na imwhani yose.
48 Na gamabuga gakalile kuvigongo, Shamili na Yatili na Soko,
49 na Dana na Kiliati Sana twaga diyagwe dojuwigwa kamba Debili,
50 na Anabu na Eshitemoa na Animu,
51 na Gosheni na Holoni na Gilo. Gose kwa gose gakala mabuga longo na dimoja hamoja na ivijiji vake.
52 Vivija wagweleligwa mabuga ga Alabu na Duma na Eshani,
53 na Yanumu na Beti Tapua na Afeka,
54 na Humita na Kiliati Aliba twaga diyagwe dojuwigwa kamba Hebuloni na Sioli. Gose kwa gose gakala mabuga tisa hamoja na ivijiji vake.
55 Vivija wagweleligwa mabuga ga Maoni na Kalimeli na Zifu na Yuta,
56 na Yezileeli na Yokideamu na Zanoa,
57 na Kaini na Gibea na Timina. Gose kwa gose gakala mabuga longo hamoja na ivijiji vake.
58 Vivija wagweleligwa mabuga ga Halihuli na Beti Suli na Gedoli,
59 na Maalati na Beti Anoti na Elitekoni. Gose kwa gose gakala mabuga sita hamoja na ivijiji vake.
60 Vivija wagweleligwa mabuga ga Kiliati Baali twaga diyagwe dojuwigwa kamba Kiliati Yealimu na Laba. Gose kwa gose gakala mabuga mabili hamoja na ivijiji vake.
61 Mabuga gakalile kuluwala gakala, Beti Alaba na Midini na Sekaka,
62 na Nibishani na Buga da Mkele na Engedi. Gose kwa gose gakala mabuga sita hamoja na ivijiji vake.
63 Lakini iwanhu wa kabila da Yuda hawawawingile bule Wayebusi, awo iwenekae wa Yelusalemu, avo Wayebusi wakala hamoja na iwanhu wa Yuda ako Yelusalemu mbaka lelo.