16
Isi ya iwanhu wa ulelo wa Yusufu
1 Isi iwagweleligwe iwanhu wa ulelo wa Yusufu ikala kulawa lwanda lwa Yolidani, umwambu wa kudilawila zuwa wa zinzasa za Yeliko mbaka kuluwala na kuchola kuvigongo mbaka Beseli.
2 Kulawa Beseli mbaka Luzu, na ibitila Ataloti kuna iisi ya Waaliki.
3 Abaho ihumulukila umwambu wa kudihongela zuwa kuna iisi ya Wayafileti mbaka kuna iisi ya Beti Holoni ya Hasi abaho Gezeli na ihelela kuna ibahali.
4 Wanhu wa ulelo wa Yusufu, iwanhu wa kabila da Manase na iwanhu wa kabila da Efulaimu, wagweleligwa uhazi wao.
Isi ya iwanhu wa kabila da Efulaimu
5 Isi ya iwanhu wa kabila da Efulaimu kamba viweli mzing'holo zao ikala, imbaka ya isi yao kwa mwambu wa kudilawila zuwa ikala kulawa Ataloti Adali mbaka isi ya Beti Holoni ya Uchanha,
6 na igendelela mbaka kuna ibahali. Imbaka yao kwa umwambu wa kasikazini ibitila Mikimetati umwambu wa kudilawila zuwa ibitila Taanati Shilo na ibitila umwambu wa kudilawila zuwa wa Yanoa,
7 kulawa Yanoa ichola mbaka Ataloti na Naala na ibitila kumgwazo wa Yeliko na ihelela Yolidani.
8 Kulawa Tapua imbaka igendelela umwambu wa kudihongela zuwa mbaka kuna ikizanda cha Kana na ihelela kuna ibahali. Isi ayo wagweleligwa iwanhu wa kabila da Efulaimu kamba viweli mzing'holo zao,
9 hamoja na gaja gamabuga gabaguligwe mbuli ya iwanhu wa Efulaimu mna uuhazi wa iwanhu wa kabila da Manase, mabuga gose na ivijiji vake.
10 Lakini iwanhu wa kabila da Efulaimu hawawawingile bule Wakanaani wakalile ako Gezeli, avo Wakanaani wakala hagati ya iwanhu wa kabila da Efulaimu mbaka lelo, lakini wagweleligwa zisang'hano kwa kunanahizwa.