18
Isi ya makabila gasigale
1 Abaho umting'hano wose wa iwanhu wa Izilaeli waiting'hana ako Shilo na wadisimika dihema da mting'hano kuko. Isi ikala mmakono gao.
2 Avo kukala na makabila saba mna iwanhu wa Izilaeli awo wakala wang'hali hawanagweleligwa isi kamba uhazi wao.
3 Yoshua kawauza iwanhu wa Izilaeli, “Avo mweye mokawa mbaka lini, kuchola kuisola isi ayo iyawagwelele Mndewa Imulungu, Imulungu wa wahenga zenu?
4 Saguleni wanhu wadatu kulawa kila kabila, na niye nowatuma wachole mwiisi ayo, na hewo wandike isi ayo viikoneka kamba uhazi wao viwili, abaho wabwele kumwangu.
5 Waigole isi ayo mna gamafungu saba. Iwanhu wa kabila da Yuda osigala na isi yao ako umwambu wa kusini, iwanhu wa ulelo wa Yusufu osigala na isi yao ako umwambu wa kasikazini.
6 Mweye mugasimulile kwa kugandika vigeli mafungu ago saba ga isi ayo, na mungalile ago gamwandike. Niye nowabwanhila simbi baha kuulongozi wa Mndewa Imulungu, Imulungu wetu.
7 Walawi wabule fungu jojose da isi hagati yenu, kwavija awo uulava nhosa wa Mndewa Imulungu ajo fungu jao. Kabila da Gadi na Lubeni na nusu ya kabila da Manase wagweleligwa uhazi wao ako umwambu wa kudilawila zuwa wa lwanda lwa Yolidani. Musa imsang'hanaji wa Mndewa Imulungu kawagwelela.”
8 Avo iwanhu awo wenuka wachola, na Yoshua kawalagiza kawalongela, “Choleni mwiisi ayo na mwandike kamba viili abaho mubwele kumwangu, na niye nowabwanhila simbi baha Shilo kuulongozi wa Mndewa Imulungu.”
9 Avo iwanhu awo wachola, wabita hagati ya isi ayo wandika mbuli za isi ayo mkitabu buga mbaka buga, na waigola isi ayo mafungu saba abaho wabwela kuna ing'hambi kwa Yoshua ako Shilo.
10 Abaho Yoshua kawabwanhila simbi ako Shilo kuulongozi wa Mndewa Imulungu. Avo ako Yoshua kawagwelela isi ayo iwanhu wa Izilaeli, kila kabila isi yake.
Isi ya iwanhu wa kabila da Benjamini
11 Simbi iwagwila iwanhu wa kabila da Benjamini kamba viweli mzing'holo zao na wagweleligwa isi ikalile hagati ya isi ya iwanhu wa kabila da Yuda na isi ya iwanhu wa ulelo wa Yusufu.
12 Imbaka yao kwa umwambu wa kasikazini isongela lwanda lwa Yolidani, na ibitila kasikazini ya Yeliko na isi ya kuvigongo va umwambu wa kudihongela zuwa na ihelela kuluwala lwa Beti Aveni.
13 Abaho imbaka ayo igendelela kulawa baho na ivika kuna umwambu wa kusini wa buga da Luzu, twaga diyagwe dojuwigwa kamba Beseli, abaho igendelela mbaka Ataloti Adali behi na lugongo lukalile mwambu wa kusini wa Beti Holoni ya Hasi.
14 Abaho ayo imbaka ilozela mwambu uyagwe, ihindukila mwambu wa kudihongela zuwa kulawa aho hana ulugongo uilola na Beti Holoni na ichola kusini, na ihelela ako Kiliati Baali, twaga diyagwe dojuwigwa kamba Kiliati Yealimu, dibuga da iwanhu wa Yuda. Ayo iyo imbaka yao kwa umwambu wa kudihongela zuwa.
15 Imbaka yao kwa umwambu wa kusini isongela kudibuga da Kiliati Yealimu, na igendelela mbaka Efuloni na mbaka kuna zinzasa za gamazi ako Nefitoa.
16 Abaho imbaka ibitila hasi ya ulugongo lukalile behi na bonde da mwanage Hinomu, dikalile umwambu wa kasikazini kumgwazo wa bonde da Walefai. Abaho imbaka igendelela hasi kubonde da Hinomu, kusini ya umtelemuko wa Wayebusi na ihumuluka hasi mbaka Eni Logeli.
17 Abaho imbaka ihinduka na ibitila umwambu wa kasikazini kuchola ako Eni Shemeshi, na igendelela mbaka Geliloti buga dikalile doilola na kumtelemuko wa Adumimu. Abaho ayo imbaka ibitila hasi ya dibwe da Bohani mwanage Lubeni,
18 na kugendelela umwambu wa kasikazini kumgwazo wa Beti Alaba na ihumuluka mbaka hasi ako Alaba.
19 Abaho ayo imbaka ibitila umwambu wa kasikazini wa Beti Hogila na ihelela umwambu wa kasikazini wa Ibahali ya Mkele, aho hawingilile ulwanda lwa Yolidani. Ayo iyo imbaka yao kwa umwambu wa kusini.
20 Ulwanda lwa Yolidani awo ukalile imbaka yao kwa umwambu wa kudilawila zuwa. Isi ayo awo uhazi wa iwanhu wa kabila da Benjamini kamba viweli mzing'holo zao, zimbaka zao ziwazunguluka.
21 Avo gamabuga ga iwanhu wa kabila da Benjamini kamba viweli mzing'holo zao gakala, Yeliko na Beti Hogila na Emeki Kesisi,
22 na Beti Alaba na Semalaimu na Beseli,
23 na Avimu na Pala na Ofula,
24 na Kefali Amoni na Ofini na Geba. Gose kwa gose gakala mabuga longo na mabili hamoja na ivijiji vake.
25 Mabuga gayagwe gakala, Gibeoni na Lama na Beeloti,
26 na Mizipa na Kefila na Moza,
27 na Lekemu na Ilipeeli na Talala,
28 na Zela na Haelefu na Yebusi, twaga diyagwe dojuwigwa kamba Yelusalemu, na Gibea na Kiliati Yealimu. Gose kwa gose gakala mabuga longo na nne hamoja na ivijiji vake. Uno awo uhazi wa iwanhu wa kabila da Benjamini kamba viweli mzing'holo zao.