19
Isi ya iwanhu wa kabila da Simeoni
1 Simbi ya kabili iwagwila iwanhu wa kabila da Simeoni kamba viweli mzing'holo zao, na wagweleligwa uhazi wa isi ikalile izungulukigwe na isi ya iwanhu wa kabila da Yuda.
2 Kabila da Simeoni wagweleligwa mabuga ga Beelisheba na Sheba na Molada,
3 na Hasali Shuali na Bala na Esemu,
4 na Elitoladi na Besuli na Holima,
5 na Sikilagi na Beti Malikaboti na Hasali Susa,
6 na Beti Lebaoti na Shaluheni. Gose kwa gose gakala mabuga longo na madatu hamoja na ivijiji vake.
7 Vivija kukala na mabuga ga Aini na Limoni na Eteli na Ashani. Gose kwa gose gakala mabuga mane,
8 hamoja na ivijiji vose vizunguluke mabuga gago mbaka Baalati Beeli hebu Lama ili ako Negebu. Uno awo uhazi wa iwanhu wa kabila da Simeoni kamba viweli mzing'holo zao.
9 Uhazi wa iwanhu wa kabila za Simeoni ukala mna iisi ya iwanhu wa kabila da Yuda, kwavija isi ya iwanhu wa kabila da Yuda ikala ng'hulu ng'hani. Avo iwanhu wa kabila da Simeoni wagweleligwa isi hagati ya hewo.
Isi ya iwanhu wa kabila da Zabuloni
10 Simbi ya kadatu iwagwila iwanhu wa kabila da Zabuloni kamba viweli mzing'holo zao. Isi yao ivika mbaka ako Salidi.
11 Abaho imbaka yao ichola umwambu wa kudihongela zuwa mbaka ako Maleali na ibita mumgwazo wa Dabesheti na ichola ako kuna ikizanda kili umwambu wa kudilawila zuwa wa Yokineamu.
12 Kulawa Salidi imbaka igendelela umwambu wa kudilawila zuwa kuna imbaka ya Kisiloti Taboli, kulawa kuko ichola Dabelati mbaka Yafia.
13 Kulawa kuko igendelela kuchola umwambu wa kudilawila zuwa mbaka ako Gati Hefeli na mbaka Eti Kasini, abaho igendelela ako Limoni na ihindukila kuchola ako Nea,
14 abaho umwambu wa kasikazini imbaka ihindukila kuchola Hanatoni, na ihelela ako kubonde da Ifitaheli,
15 na mabuga ga Katati na Nahalali na Shimuloni na Idala na Beselehemu. Gose kwa gose gakala mabuga longo na mabili hamoja na ivijiji vake.
16 Mabuga gago na ivijiji, ukala uhazi wa iwanhu wa kabila da Zabuloni kamba viweli mzing'holo zao.
Isi ya iwanhu wa kabila da Isakali
17 Simbi ya ikane iwagwila iwanhu wa kabila da Isakali kamba viweli mzing'holo zao.
18 Isi yao ikala na mabuga ga Yezileeli na Kesuloti na Shunemu,
19 na Hafalaimu na Shioni na Anahalati,
20 na Labiti na Kishioni na Ebezi,
21 na Lemeti na Enganimu na Eni Hada na Beti Pasesi.
22 Vivija imbaka yao ivika kuna gamabuga ga Taboli na Shahasuma na Beti Shemeshi ihelela kuna ulwanda lwa Yolidani. Gose kwa gose gakala mabuga longo na sita hamoja na ivijiji vake.
23 Mabuga gago na ivijiji ukala uhazi wa iwanhu wa kabila da Isakali kamba viweli mzing'holo zao.
Isi ya iwanhu wa kabila da Asheli
24 Simbi ya itano iwagwila iwanhu wa kabila da Asheli kamba viweli mzing'holo zao.
25 Isi yao ikala na mabuga ga Helikati na Hali na Beteni na Akishafu,
26 na Alameleki na Amadi na Mishali. Umwambu wa kudihongela zuwa isi yao ivikila kuna gamabuga ga Kalimeli na Shiholi Libinati,
27 abaho ihindukila umwambu wa kudilawila zuwa na ichola mbaka Beti Dagoni behi na isi ya Zabuloni na bonde da Ifitaheli na ihindukila umwambu wa kasikazini mbaka ako Beti Emeki na Neyeli, abaho igendelela umwambu wa kasikazini mbaka ako Kabuli,
28 na Ebuloni na Lehobu na Hamoni na Kana mbaka ako Sidoni Ing'hulu.
29 Abaho ayo imbaka ihinduka ichola Lama na ivika kudibuga da Tilo dikalile dizunguluswe senyenge ya mibwe. Abaho imbaka ihinduka ichola Hosa, na ihelela kuna ibahali. Mabuga gayagwe gakalile mumo gakala Mahalabu na Akizibu,
30 na Uma na Afeka na Lehobu. Gose kwa gose gakala mabuga malongo mabili na mbili hamoja na ivijiji vake.
31 Mabuga gago na ivijiji vake ukala uhazi wa iwanhu wa kabila da Asheli kamba viweli mzing'holo zao.
Isi ya iwanhu wa kabila da Nafutali
32 Simbi ya isita iwagwila iwanhu wa kabila da Nafutali kamba viweli mzing'holo zao.
33 Imbaka yao isongela ako Helefu, kuna dibiki da mwaloni dikalile ako Zaananimu, na ibitila Adami Nekebu na Yabineeli mbaka ako Lakumu na ihelela ako kuna ulwanda lwa Yolidani.
34 Abaho ayo imbaka ihinduka ichola umwambu wa kudihongela zuwa mbaka ako Azinoti Taboli, kulawa kuko igendelela mbaka ako Hukoki na ivika kuna iisi ya Zabuloni umwambu wa kusini, na kuna iisi ya Asheli umwambu wa kudihongela zuwa na hana ulwanda lwa Yolidani umwambu wa kudilawila zuwa.
35 Mabuga gao gakalile gazunguluswe senyenge ya mibwe gakala, Sidimu na Seli na Hamati na Lakati na Kineleti,
36 na Adama na Lama na Hazoli,
37 na Kedeshi na Edilei na Eni Hazoli,
38 na Yiloni na Migidali Eli na Holemu na Beti Anati na Beti Shemeshi. Gose kwa gose gakala mabuga longo na tisa hamoja na ivijiji vake.
39 Mabuga gago na ivijiji vake ukala uhazi wa iwanhu wa kabila da Nafutali kamba viweli mzing'holo zao.
Isi ya iwanhu wa kabila da Dani
40 Simbi ya isaba iwagwila iwanhu wa kabila da Dani kamba viweli mzing'holo zao.
41 Isi yao ikala na mabuga ga Sola na Eshitaoli na Ilishemeshi,
42 na Shaalabini na Aiyaloni na Itila,
43 na Eloni na Timina na Ekiloni,
44 na Eliteke na Gibetoni na Baalati,
45 na Yehudi na Bene Belaki na Gati Limoni,
46 na Meyalikoni na Lakoni hamoja na isi ikalile behi na Yafa.
47 Iwanhu wa kabila da Dani viwayagize isi yao, avo wachola kuing'hondo ili wadisole buga da Leshemu, na viwawakomile iwenekae kwa misime wadisola buga dijo na wakala mumo, wadikema buga dijo da Leshemu twaga da Dani, ditwaga da imuhenga wao.
48 Mabuga gago na ivijiji vake ukala uhazi wa iwanhu wa kabila da Dani kamba viweli mzing'holo zao.
Isi ya Yoshua
49 Viwamambukize kuigola isi ayo kamba uhazi wao, iwanhu wa Izilaeli wamgwelela Yoshua mwanage Nuni uhazi wa isi hagati yao.
50 Kamba Mndewa Imulungu viyalagize, wamgwaa Yoshua dibuga diyasagule mwenyego, buga da Timinati Sela, dikalile kuna iisi ya kuvigongo va Efulaimu. Yoshua kadizenga kabili buga dijo na kakala mumo.
51 Avo imulava nhosa Eleazali na Yoshua mwanage Nuni na ivilongozi wa zing'holo za makabila ga iwanhu wa Izilaeli, waigola isi ayo kwa kubwanha simbi ako Shilo kuulongozi wa Mndewa Imulungu hana ulwivi lwa dihema da mting'hano. Avo wamambukiza kuigola isi ayo.