20
Mabuga ga kukimbilila
(Kupetigwa 35:9-34)
1 Abaho Mndewa Imulungu kamulongela Yoshua,
2 “Walongele iwanhu wa Izilaeli, ‘Saguleni mabuga ga kukimbilila ganiwalongele kubitila Musa,
3 ili munhu yoyose yonda yamkome miyage bila kulonda hebu bila kujuwa yakimbilile kuko, kwa kumdumba imunhu yolonda kumbwezela kwa mbuli ayo yaitendile.
4 Munhu ayo yakimbilile kudibuga dimoja mna gamabuga gago na yeme hana ulwivi lwa dibuga na yawasimulile iwavele wa dibuga mbuli yake viili. Awo iwavele wamwingize mdibuga na wamgwee hanhu ha kukala na yakale kuko hamoja na hewo.
5 Kamba ayo imunhu yolonda kumbwezela komkweleleza, sikuwamulave imunhu ayo na kumgwaa, kwavija heyo kamkoma miyage bila kulonda na kakala hamwihile bule.
6 Munhu ayo yasigale kuko kudibuga mbaka vonda yeme kuulongozi wa umting'hano ili wajuwe va kutenda, na mbaka vonda yafe imkulu wa iwalava nhosa kipindi acho. Abaho ayo imunhu kodaha kubwela kudibuga jake na ukae kumwake, ako kuyasegele.’ ”
7 Avo wagasagula mabuga ga Kedeshi dikalile Galilaya kuna iisi ya kuvigongo va Nafutali na buga da Shekemu dikalile kuna iisi ya kuvigongo va Efulaimu na buga da Kiliati Aliba, twaga diyagwe dojuwigwa kamba Hebuloni, dikalile kuna iisi ya kuvigongo va Yuda.
8 Umwambu wa Yolidani, umwambu wa kudilawila zuwa wa buga da Yeliko, wadisagula buga da Bezeli dikalile kuluwala ako kudibawe kulawa kwa iwanhu wa kabila da Lubeni, na buga da Lamoti dikalile ako Gileadi kulawa kwa iwanhu wa kabila da Gadi, na buga da Golani dikalile ako Bashani kulawa kwa iwanhu wa kabila da Manase.
9 Mabuga gago gabaguligwa mbuli ya iwanhu wose wa Izilaeli na iwanhu baki iwokala hagati yao. Munhu yoyose yonda yamkome miyage bila kulonda kodaha kukimbilila kuko, ili sikuyakomigwe na imunhu yolonda kumbwezela, yang'hali hana kwima kuulongozi wa umting'hano ili wajuwe cha kumtenda.