23
Yoshua kolonga na wanhu mbuli za kimambukizo
1 Kwa kipindi kitali, Mndewa Imulungu kawagwelela tindiwalo iwanhu wa Izilaeli mbuli ya awo iwanhu owehila wakalile wawazunguluke banzi zose, na Yoshua kakala mvele na kakala na miyaka mingi.
2 Avo Yoshua kawakema iwanhu wose wa Izilaeli na iwavele na ivilongozi na iwasemi na iwakulu, kawalongela, “Niye sambi namvele na nina miyaka mingi.
3 Na mweye mona gose Mndewa Imulungu, Imulungu wenu gayawatendele iwanhu wa isi azo mbuli yenu mweye, kwavija Mndewa Imulungu, Imulungu wenu ayo yawagombele.
4 Loleni, niwagwelela isi azo zisigale kamba uhazi wa makabila genu, na isi za iwanhu waniwakomile, kulawa Yolidani mbaka kuna ibahali ing'hulu umwambu wa kudihongela zuwa.
5 Mndewa Imulungu, Imulungu wenu kowasegesa kuulongozi wenu na kowawinga, na mweye moisola isi yao kamba Mndewa Imulungu, Imulungu wenu, viyawalongele.
6 Avo mugangamale na mugagoge gose gandikigwe mna ikitabu cha malagizo ga Musa, na sikumugaleke.
7 Sikumuilumbe na iwanhu wa isi azo zisigale hagati yenu, na sikumuitambule imilungu yao hebu kuiduwila kwa matwaga ga imilungu yao hebu kuisang'hanila hebu kuitambikila.
8 Lakini mumgoge Mndewa Imulungu, Imulungu wenu kamba vimutendile mbaka lelo.
9 Kwavija Mndewa Imulungu kawawinga kuulongozi wenu iwanhu wa isi zili na nguvu na wengi na kuduhu munhu yahadile kuwahuma mweye mbaka vino lelo.
10 Munhu imoja hagati yenu kodaha kuwawinga iwanhu elufu imoja, kwavija Mndewa Imulungu, Imulungu wenu ayo yowagombela kamba viyawalongele kotenda.
11 Avo, muiteganye, mumnogele Mndewa Imulungu, Imulungu wenu.
12 Kwavija, kamba mwahabwela kukisogo na kuwagoga iwanhu wa isi zisigale hagati yenu na moisolela watwanzi na moilumba nao,
13 avo mujuwe kamba Mndewa Imulungu, Imulungu wenu honda yawawinge kuulongozi wenu iwanhu wa isi azo, lakini okuwa ng'hwalo na mtego kumwenu. Okuwa kamba mibalati ya kuwazabulila na kamba miba ya kuwahoma mgameso genu, mbaka vonda mubanangigwe wose na kusegela mwiisi ino inogile iyawagwelele Mndewa Imulungu, Imulungu wenu.
14 “Sambi kipindi changu cha kufa cha mmabehi, na mweye mose mojuwa mmizoyo yenu na mziloho zenu kamba mna igose ganogile gayawalongele Mndewa Imulungu, Imulungu wenu, kuduhu hata dimoja diswelile kutendigwa. Gose gavikizwa kamba viyalongile.
15 Lakini kamba vija Mndewa Imulungu, Imulungu wenu, viyagavikize gose ganogile gayawalongele, vivija Mndewa Imulungu kowagalila gose gehile, mbaka vonda yawabanange wose musegele mwiisi ino inogile iyawagwelele Mndewa Imulungu, Imulungu wenu.
16 Kamba mwahadibena lagano da Mndewa Imulungu, diyawalagize mdigoge, na mochola kuisang'hanila imilungu iyagwe na moitambikila, avo ng'hasiliki ya Mndewa Imulungu yowakila, na mweye hamukawa kusegesigwa mwiisi ino inogile iyawagwelele.”