22
Makabila ga umwambu wa kudilawila zuwa gobwela ukae
1 Kipindi acho Yoshua kawakema iwanhu wa kabila da Lubeni na kabila da Gadi na nusu ya kabila da Manase,
2 kawalongela, “Mweye mugoga gose gayawalagize Musa imsang'hanaji wa Mndewa Imulungu na munitegeleza mzimbuli zose ziniwalagize.
3 Na hamuwalekile ndugu zenu mna ikipindi chose mbaka lelo, lakini mugagoga malagizo ga Mndewa Imulungu, Imulungu wenu.
4 Sambi Mndewa Imulungu, Imulungu wenu kawagwaa ndugu zenu tindiwalo kamba viyalongile. Avo bweleni kumwenu mwiisi ya uhazi wenu, iyawagwelele Musa imsang'hanaji wa Mndewa Imulungu, ako umwambu wa lwanda lwa Yolidani.
5 Ila molondigwa mugagoge malagizo na gaja gayawalagize Musa imsang'hanaji wa Mndewa Imulungu, mumnogele Mndewa Imulungu, Imulungu wenu, na mukweleleze nzila zake na mugoge malagizo gake na mumgoge heyo na mumsang'hanile kwa mizoyo yenu yose na kwa loho zenu zose.”
6 Avo Yoshua kawatambikila, na kawaleka wasegele na hewo wachola kumwao.
7 Avo inusu ya kabila da Manase, Musa kakala yawagwelele uhazi ako Bashani, lakini inusu iyagwe Yoshua kawagwelela uhazi behi na ndugu zao umwambu wa kudihongela zuwa wa Yolidani. Avo Yoshua viyawalekile wasegele wachole ukae kumwao na kuwatambikila,
8 kawalongela, “Bweleni ukae kumwenu na utajili wa fugo nyingi na shaba na zahabu na shaba ya kiguzi na zuma na viwalo vingi. Muigolele na ndugu zenu ivinhu vimusolile kwa iwanhu owehila.”
Upango wa nhosa behi na Yolidani
9 Iwanhu wa kabila da Lubeni na kabila da Gadi na nusu ya kabila da Manase wabwela ukae, wasegela kwa iwanhu wa Izilaeli wakalile ako Shilo mwiisi ya Kanaani, wachola mwiisi ya Gileadi isi yao wenyego iwaisolile kwa lagizo da Mndewa Imulungu kubitila Musa.
10 Viwavikile ako hana ulwanda lwa Yolidani mwiisi ayo ya Kanaani, iwanhu awo wa kabila da Lubeni na kabila da Gadi na nusu ya kabila da Manase wazenga upango wa nhosa mkulu ako behi ya Yolidani.
11 Avo, iwanhu wa Izilaeli waihulika mbuli ayo na walonga, “Loleni iwanhu wa kabila da Lubeni na kabila da Gadi na nusu ya kabila da Manase wazenga upango wa nhosa behi na lwanda lwa Yolidani mwiisi ya Kanaani, mwiisi yetu siye.”
12 Iwanhu wa Izilaeli viwahulike mbuli ayo, umting'hano wose wa iwanhu, waiting'hana ako Shilo ili wachole wakaitowe na hewo.
13 Abaho iwanhu wa Izilaeli wamtuma Finehasi mwanage Eleazali imulava nhosa ako Gileadi, kwa iwanhu wa kabila da Lubeni na kabila da Gadi na nusu ya kabila da Manase.
14 Finehasi kasegela hamoja na iwakulu longo, kila imoja kulawa mulukolo lwa makabila ga Izilaeli, kila imoja kakala kilongozi wa lukolo lwake.
15 Avo wavika ako Gileadi kwa iwanhu wa kabila da Lubeni na kabila da Gadi na nusu ya kabila da Manase, wawalongela,
16 “Umting'hano wose wa iwanhu wa Mndewa Imulungu owauza, ‘Uvizi gani uno umumtendele Imulungu wa Izilaeli? Habali mumulema Mndewa Imulungu kwa kuzenga upango uno wa nhosa?
17 Vino nzambi zitutendile ako Peoli hazitosha bule? Vino mweye hamukona bule kamba tung'hali hatunaisunha nzambi ayo, na kamba nzambi ayo ing'hali yougaza umting'hano wa Mndewa Imulungu?
18 Avo habali hamumkweleleze Mndewa Imulungu? Lelo mwahamulema Mndewa Imulungu, mayo kougevuzikila umting'hano wose wa iwanhu wa Izilaeli.
19 Kamba isi ayo yumusolile haing'alile bule, avo choleni kuna iisi ya Mndewa Imulungu ako kudili dihema da Mndewa Imulungu, na musole isi hamoja na siye. Ili sikumumuleme Mndewa Imulungu hebu kututenda siye wose tumuleme kwa kuzenga upango wenu wa nhosa, na kuleka uja uupango wa nhosa wa Mndewa Imulungu, Imulungu wetu.
20 Vino Akani mwanage Zela hatamaniligwe kwa ivinhu vilavigwe ili vibanangigwe, na ing'hasiliki iwezila umting'hano wose wa Izilaeli? Akani hafile heyo yaiyeka kwa nzambi yake.’ ”
21 Abaho iwanhu wa kabila da Lubeni na kabila da Gadi na nusu ya kabila da Manase wawedika awo ivilongozi wa iwanhu wa Izilaeli,
22 “Ayo imdaha gose, Imulungu, Mndewa Imulungu. Ayo imdaha gose, Imulungu, Mndewa Imulungu. Heyo kojuwa habali tutendile vivo, na iwanhu wose wa Izilaeli vivija ojuwa. Kamba mbuli ayo ya kumulema hebu ya kuleka kumtegeleza Mndewa Imulungu, avo mtukome lelo.
23 Kamba tumuleka Mndewa Imulungu na tuzenga upango wa nhosa wetu wenyego ili tulave nhosa za kusomigwa moto hebu nhosa za ndiya hebu nhosa za kugala kuilumba, avo Mndewa Imulungu yatubwezele gehile.
24 Aka siye tutenda vino kwa kudumba kamba ako kumwande wanenu owalongela wanetu, ‘Mweye muilumba vilihi na Mndewa Imulungu, Imulungu wa Izilaeli?
25 Kwavija Mndewa Imulungu kautenda lwanda lwa Yolidani uwe imbaka hagati yetu, mweye iwanhu wa kabila da Lubeni na kabila da Gadi. Avo mduhu fungu hagati ya Mndewa Imulungu.’ Avo wanenu owatenda wanetu waleke kumtambikila Mndewa Imulungu.
26 Avo siye tulonga, ‘Beteni tuzenge upango wa nhosa, siyo wa kulavila nhosa za kusoma moto hebu sadaka zozose,
27 ila uwe usindila hagati yetu, mweye na siye, na uwe usindila kwa iwanhu wa ulelo wetu kamba na siye tolondigwa kumsang'hanila Mndewa Imulungu kwa nhosa zetu za kusoma moto na sadaka na nhosa za kugala kuilumba, ili wanenu sikuwawalongele wanetu ako kumwande, “Mweye mduhu fungu hagati ya Mndewa Imulungu.” ’
28 Avo siye tugelegeza, kamba olonga vivo kumwetu hebu kwa iwanhu wa ulelo wetu ako kumwande, siye tolonga, ‘Loleni upango uigalile na uupango wa nhosa wa Mndewa Imulungu, uwazengile iwahenga zetu, siyo mbuli ya kulavila nhosa za kusoma moto hebu sadaka, lakini kamba usindila kumwetu, siye na mweye.’
29 Siye hatulondile kumulema Mndewa Imulungu kwa mbuli yoyose hebu tumuleme kwa kuzenga upango wa kulavila nhosa za kusoma moto hebu nhosa za ndiya hebu sadaka. Hatulonda kulava nhosa hanhu hohose hayagwe ila hana uupango wa nhosa wa Mndewa Imulungu, Imulungu wetu, uli ako kuna dihema da mting'hano.”
30 Avo, Finehasi imulava nhosa na iwakulu wa umting'hano, awo ivilongozi wa zing'holo za Waizilaeli wakalile hamoja na heyo, viwahulike zimbuli ziwalongile iwanhu wa kabila da Lubeni na kabila da Gadi na nusu ya kabila da Manase, wona mbuli ayo inoga.
31 Na heyo Finehasi mwanage Eleazali, imulava nhosa, kawalongela iwanhu wa kabila da Lubeni na kabila da Gadi na nusu ya kabila da Manase, “Lelo tojuwa kamba Mndewa Imulungu kahagati yetu, kwavija hamutendile mbuli kwa kumulema Mndewa Imulungu. Avo muwakombola iwanhu wa Izilaeli kulawa mmakono ga Mndewa Imulungu.”
32 Abaho Finehasi mwanage Eleazali, imulava nhosa hamoja na iwakulu, wasegele aho Gileadi kwa iwanhu wa kabila da Lubeni na kabila da Gadi, wabwela mwiisi ya Kanaani kwa iwanhu wa Izilaeli na wawalongela mbuli azo.
33 Mbuli azo ziwanogeza iwanhu wa Izilaeli. Na iwanhu wa Izilaeli wamtogola Imulungu na hawalongile kabili mbuli za kuitowa na hewo na kuinanga isi iwakalile iwanhu wa kabila da Lubeni na kabila da Gadi.
34 Avo iwanhu wa kabila da Lubeni na kabila da Gadi waukema upango awo, “Usindila,” Kwavija walonga, “Upango uno awo usindila wetu kamba, Mndewa Imulungu, ayo Imulungu.”