13
Malagizo mbuli ya utamu wa dikulu
1 Mndewa Imulungu kamulongela Musa na Haluni,
2 “Kamba munhu kavimba hebu kana pute hebu punye na yahakoneka kamba utamu wa dikulu, yagaligwe kwa Haluni imulava nhosa hebu kwa imoja wa wanage yeli mulava nhosa.
3 Mulava nhosa yakikagule goya ikilonda kili mulukuli na kamba mvili zili mkilonda ziwa nzelu na kilonda kihimbika ng'hani kubanza ing'hwembe, awo okuwa utamu wa dikulu. Mulava nhosa yahamambukiza kumkagula, yawalongele wanhu kamba munhu ayo kafita.
4 Kamba dipunye dili mwiing'hwembe yake zelu, lakini hadihimbike ng'hani kubanza ing'hwembe na zimvili hazili nzelu, mulava nhosa yamwike munhu ayo kutali na iwanhu kwa siku saba.
5 Siku da saba mulava nhosa yamkagule, na kamba yahakona idipunye hadigaluke na hadihimbike ng'hani mna ing'hwembe yagendelele kumuleka munhu ayo hanhu aho kwa siku saba ziyagwe.
6 Siku da saba mulava nhosa yamkagule kabili na kamba dipunye disonga kuhona na hajenele mwiing'hwembe, munhu ayo yafuwe viwalo vake na mulava nhosa yawalongele wanhu kamba munhu ayo kang'ala na kamba dikala punye na siyo utamu wa dikulu.
7 Lakini kamba dipunye ajo disonga kwenela mulukuli, kulawa siku dija mulava nhosa viyamambukize kumkagula na kawalongela wanhu kamba kang'ala, avo munhu ayo yachole kabili kwa mulava nhosa.
8 Mulava nhosa yamkagule na kamba dipunye jenela mulukuli, yawalongele wanhu kamba munhu ayo kafita, na kamba awo utamu wa dikulu.
9 “Munhu yoyose yahawa na utamu wa dikulu yagaligwe kwa mulava nhosa.
10 Mulava nhosa yamkagule na kamba kana kilonda kibisi kizelu kitendile mvili zake ziwe nzelu na kina udusi,
11 awo okuwa utamu wa dikulu wa siku nyingi. Mulava nhosa yawalongele wanhu kamba munhu ayo kafita, na sikuyamgale kutali na iwanhu, kwavija kajuwa goya kamba kafita.
12 Kamba utamu wenela mulukuli lose, kulawa kudipala mbaka muulwayo kamba voyokona imulava nhosa,
13 yamkagule kabili. Yahakona utamu awo wenela mulukuli lose, avo yawalongele wanhu kamba munhu ayo kang'ala. Kwavija lukuli lose luzelu avo munhu ayo kang'ala.
14 Lakini mulukuli lwa munhu ayo mwahawa na kilonda kibisi, avo munhu ayo kokuwa kafita.
15 Mulava nhosa yakikagule acho ikilonda kibisi, na kuwalongela wanhu kamba munhu ayo kafita kwavija awo utamu wa dikulu.
16 Lakini acho ikilonda kibisi chahagaluka kabili kuwa kizelu munhu ayo yabwele kwa mulava nhosa.
17 Mulava nhosa yamkagule na kamba ikilonda acho kigaluka kizelu, baho mulava nhosa yawalongele wanhu kamba munhu ayo kang'ala.
18 “Kamba munhu kana pute abaho dihona,
19 na baho kudikalile dipute hagaluka punye hebu hadung'hu na hana udusi, munhu ayo yamulagusile imulava nhosa.
20 Mulava nhosa yamkagule na kamba dipunye dihimbika ng'hani na zimvili zigaluka nzelu, mulava nhosa yawalongele wanhu kamba munhu ayo kafita, awo okuwa utamu wa dikulu ulawilile mbuli ya idipute.
21 Lakini kamba mulava nhosa yahamkagula na kuduhu mvili nzelu na hadihimbike ng'hani na dosonga kuhona, baho mulava nhosa yamwike kutali na iwanhu kwa siku saba.
22 Kamba punye ajo jenela mulukuli lose, mulava nhosa yawalongele wanhu kamba munhu ayo kafita, awo utamu wa dikulu.
23 Lakini kamba dipute hadigaluke na hajenele bule ila yokoneka ng'hovu ya punye iiyeka, avo mulava nhosa yawalongele wanhu kamba munhu ayo kang'ala.
24 “Kamba munhu kalukula na ikilonda kiwa kidung'hu hebu kizelu,
25 mulava nhosa yakikagule ikilonda acho, na kamba zimvili zigaluka nzelu na kihimbika ng'hani, awo okuwa utamu wa dikulu ulawilila hanhu aho halukule. Mulava nhosa yawalongele wanhu kamba munhu ayo kafita, awo okuwa utamu wa dikulu.
26 Lakini kamba imulava nhosa yahamkagula na kuduhu mvili nzelu mna ikilonda na kamba hakihimbike na kisonga kuhona, baho imulava nhosa yamwike munhu ayo kutali na iwanhu kwa siku saba.
27 Siku da saba mulava nhosa yamkagule na kamba ikilonda chenela mulukuli lose, mulava nhosa yawalongele wanhu kamba munhu ayo kafita, awo okuwa utamu wa dikulu.
28 Lakini kamba kilonda acho hachenele, ila kisonga kuhona, acho chokuwa kilonda cha kulukula, avo imulava nhosa yawalongele wanhu kamba munhu ayo kang'ala, kwavija kana ng'hovu ya kulukula iiyeka.
29 “Kamba mtwanzi hebu mbigalo kana kilonda kudipala hebu mkidevu,
30 mulava nhosa yakikagule, na kamba kihimbika ng'hani na zimvili za njano na sisili, avo mulava nhosa yawalongele wanhu kamba munhu ayo kafita, awo okuwa utamu wa dikulu wa kudipala hebu wa mkidevu.
31 Lakini kamba mulava nhosa yahakona kamba ikilonda hakihimbike na zimvili siyo nhitu, baho mulava nhosa yamwike munhu ayo kutali na iwanhu kwa siku saba.
32 Siku da saba mulava nhosa yakikagule ikilonda na kamba kilonda acho hachenele na kuduhu mvili zili za njano na ikilonda hakihimbike,
33 avo munhu ayo yabee mvili zake hebu ndevu zake hasigale aho hana ikilonda. Abaho mulava nhosa yamwike munhu ayo kutali na iwanhu kwa siku saba ziyagwe.
34 Siku da saba mulava nhosa yakikagule ikilonda. Yahakona acho ikilonda hachenele mulukuli na hakihimbike ng'hani, munhu ayo yafuwe viwalo vake na imulava nhosa yawalongele wanhu kamba munhu ayo kang'ala.
35 Lakini ikilonda acho chahasonga kwenela, kulawa aho imulava nhosa viyawalongele wanhu kamba munhu ayo kang'ala,
36 imulava nhosa yamkagule kabili. Kamba ikilonda chenela mulukuli, mulava nhosa halondigwa yalole kamba kana mvili za njano, kwavija munhu ayo kokuwa kafita.
37 Lakini kamba mulava nhosa yahakona ikilonda kihona na mvili nhitu zota hanhu aho, avo ikilonda kihona na imulava nhosa yawalongele wanhu kamba munhu ayo kang'ala.
38 “Kamba munhu yoyose kana punye zelu mulukuli lwake,
39 mulava nhosa yamkagule munhu ayo. Kamba mulava nhosa yahakona punye ajo zelu kidogo ajo dokuwa punye diiyeka, munhu ayo kokuwa kang'ala.
40 “Kamba mbigalo kana halaza, munhu ayo kang'ala.
41 Kamba halaza jake disongela kukihanga mbaka kukisogo, munhu ayo kokuwa kang'ala kwavija dijo halaza diiyeka.
42 Lakini kamba kudindosi kudili dihalaza hebu kukihanga kuna punye dung'hu na zelu, awo okuwa utamu wa dikulu ulawilila aho hana dihalaza dili kudindosi hebu kukihanga.
43 Mulava nhosa yamkagule, na kamba punye ajo dung'hu na zelu na dina udusi aho kuna idihalaza dili kudindosi hebu kukihanga na dokoneka kamba utamu wa dikulu,
44 munhu ayo kana utamu wa dikulu na avo kafita. Mulava nhosa yawalongele wanhu kamba munhu ayo kafita kwavija utamu wake wamdipala.
45 “Munhu yeli na utamu wa dikulu yavale midambwada na mvili zake sikuyazibunhe na yagubike imhula na umulomo na yachole yolonga, ‘Niye nifita, niye nifita!’
46 Kokala yafitile siku zose viyokugula utamu awo. Yakale kutali na iwanhu kunze ya ing'hambi.
Malagizo ga minyela nyela ili mkiwalo
47 “Kamba kuna minyela nyela kuna ikiwalo, kiwe kiwalo cha sufi hebu kitani,
48 kiwe kilukigwa hebu kisokotigwa kwa kitani hebu sufi, hebu kiwe kiwalo cha ng'hwembe yoyose,
49 na kamba iminyela nyela ayo ina langi ya jani bisi hebu midung'hu na yokwenela mna ikiwalo acho, avo yalagusiligwe mulava nhosa.
50 Mulava nhosa yakikagule kiwalo acho kili na minyela nyela na yakike kumgwazo kiiyeka kwa siku saba.
51 Siku da saba yakikagule kiwalo acho na kamba minyela nyela ayo yenela mna ikiwalo acho, kiwe kilukigwa hebu kisokotigwa hebu kiwalo cha ng'hwembe yoyose, kiwalo acho kina minyela nyela ya utamu avo chokuwa kifita.
52 Mulava nhosa yakilukuze kiwalo acho kwavija kina minyela nyela ya utamu.
53 “Kamba mulava nhosa yahakona minyela nyela ayo hayenele mna ikiwalo acho,
54 avo yalagize kiwalo acho kifuwigwe na kikigwe kumgwazo kiiyeka kwa siku saba ziyagwe.
55 Abaho mulava nhosa yakikagule na kamba kokona hanhu hakalile na iminyela nyela kwa vivija hata kamba hayenele, avo kiwalo acho kifita na kilukuzigwe, iwe iminyela nyela yao ya kukisogo hebu kuulongozi.
56 Kamba mulava nhosa yahakona minyela nyela ayo isonga kulawa viwamambukize kukifuwa ikiwalo, avo yahamovole hanhu aho hakalile na iminyela nyela ya utamu.
57 Abaho kamba minyela nyela ayo yokoneka kabili aho kumwande na kumbe ikala yenele mna ikiwalo acho. Avo kiwalo acho kilukuzigwe.
58 Lakini kamba minyela nyela isegela mkiwalo kifuwigwe, kiwalo acho kifuwigwe kabili ili king'ale.
59 “Avo gano gago malagizo ga minyela nyela ya utamu ulawilila mna ikiwalo cha sufi hebu kitani hebu kilukigwe hebu kisokotigwe hebu kiwalo cha ng'hwembe yoyose. Avo kwa nzila ayo modaha kujuwa kiwalo kifitile na kiwalo king'alile.”