14
Nhosa za kuhonyigwa utamu wa dikulu
1 Mndewa Imulungu kamulongela Musa,
2 “Gano gago malagizo ga munhu yeli na utamu wa dikulu mna isiku ya kuhonyigwa kwake. Yahahonyigwa yagaligwe kwa mulava nhosa.
3 Mulava nhosa yachole na munhu ayo kunze ya ing'hambi yakamkagule. Kamba munhu ayo kahonyigwa utamu wake wa dikulu,
4 baho mulava nhosa yawalagize wanhu wagale ndege wabili wagima wang'alile, na vivija wagale kibanzi cha biki dikemigwa mwelezi na sufi ndung'hu na bunho da hisopo mbuli ya munhu ayo yotendigwa yang'ale.
5 Mulava nhosa yalagize wamchinje ndege imoja mna inongo ili na mazi ganogile ga nzasa.
6 Mulava nhosa yamsole ndege iyagwe yeli mgima na ikibanzi cha biki da mwelezi na sufi ndung'hu na bunho da hisopo wavigele vose mna idamu ya indege yachinjigwe.
7 Abaho yammizile idamu miyanza saba munhu ayo yahonyigwe, kuno komulongela munhu ayo ung'ale. Ija indege imgima yamulekese yachole mmigunda kunze ya dibuga.
8 Abaho munhu ayo yotendigwa yang'hale yafuwe viwalo vake, na yabee mvili zake zose na yakoge mazi, abaho kokuwa kang'ala. Kodaha kubwela mwiing'hambi lakini yakale kunze ya kibanda chake kwa siku saba.
9 Siku ya saba yabee mvili zake zose kabili, na yabee ndevu zake na ng'humbitu na mvili zose zili mulukuli. Abaho yafuwe viwalo vake na yakoge mazi na heyo kokuwa kang'ala.
10 “Siku da nane yagale wana ng'hondolo wabili wa kimbigalo welibule kilema chochose, na yagale ng'hondolo wa kitwanzi wa mwaka umoja yelibule kilema chochose, na yagale mhishi imoja na vibaba vibili va usage unogile utibwilizigwe na mavuta mbuli ya nhosa ya ndiya hamoja na mavuta selusi imoja ya nyhupa.
11 Mulava nhosa yomtenda munhu ayo yang'ale yamgale kwa Mndewa Imulungu behi ya ulwivi lwa dihema da mting'hano hamoja na vinhu vose viyagalile.
12 Mulava nhosa yasole mwana ng'hondolo imoja wa kimbigalo yamulave nhosa ya kulihila gehile hamoja na gaja gamavuta selusi imoja ya nyhupa. Yavinule uchanha kamba kilaguso cha kumulavila Mndewa Imulungu.
13 Abaho yamchinje ayo imwana ng'hondolo hanhu hang'alile howochinjiligwa wanyama wa nhosa ya kusegesa nzambi na nhosa ya kusoma moto. Nhosa ino ya kulihila gehile kamba viiwaga kwa nhosa ya kusegesa nzambi, imulava nhosa ayo yosola izinyama, nhosa zino zing'ala ng'hani.
14 Mulava nhosa yasole idamu ya nhosa ya kulihila gehile na yambake munhu ayo yotendigwa yang'ale mna digwiti jake da mkono wa kudila na mdidole ng'hulu da mkono wa kudila na mdidole ng'hulu da mgulu wa mkono wa kudila.
15 Abaho mulava nhosa yasole mavuta kidogo ya gaja selusi imoja ya mavuta na yagagide mna diganza da mkono wake wa kumoso.
16 Yazabike kidole chake cha mkono wa kudila mna gamavuta gago na yammizile munhu ayo yotendigwa yang'ale miyanza saba kuulongozi wa Mndewa Imulungu.
17 Mavuta gayagwe gasigale mumkono wa mulava nhosa yambake munhu ayo yotendigwa yang'ale mna digwiti jake da mkono wa kudila na mdidole ng'hulu da mkono wake wa kudila na mdidole ng'hulu da mgulu wake wa mkono wa kudila hanhu bahaja hayabakigwe idamu ya nhosa ya kulihila gehile.
18 Mavuta gasigale yambake munhu ayo kudipala. Kwa nzila ayo imulava nhosa komtendela loholo da nzambi kuulongozi wa Mndewa Imulungu.
19 “Mulava nhosa yailave inhosa ya kusegesa nzambi na yamtendele loholo da nzambi ili kusegesa kufita kwake. Abaho yamchinje mwana ng'hondolo wa nhosa ya kusoma moto.
20 Mulava nhosa yailave ija inhosa ya kusoma moto na nhosa ya indiya muupango wa nhosa. Baho mulava nhosa komtendela munhu ayo loholo da nzambi, na heyo kokuwa kang'ala.
21 “Lakini kamba munhu mkiwa hadaha kulava vinhu vose avo, baho yagale mwana ng'hondolo imoja wa kimbigalo yawe nhosa ya kulihila gehile, yainule uchanha kamba kilaguso cha kumulavila Mndewa Imulungu ili kumtendela munhu ayo loholo da nzambi zake. Vivija yagale vibaba vibili va usage unogile utibwilizigwe na mavuta mbuli ya nhosa ya ndiya na mavuta selusi imoja ya nyhupa.
22 Vivija yagale huwa wabili hebu makinda mabili ga njiwa kamba vonda yadahe, kinda dimoja dokuwa mbuli ya nhosa ya kusegesa nzambi na diyagwe mbuli ya nhosa ya kusoma moto.
23 Siku da nane yamgalile mulava nhosa vinhu avo hana ulwivi lwa dihema da mting'hano mbuli ya kusegesigwa ukufita kuulongozi wa Mndewa Imulungu.
24 Mulava nhosa yamsole ayo imwana ng'hondolo wa kimbigalo wa nhosa ya kulihila gehile hamoja na gaja gamavuta selusi imoja ya nyhupa na yavinule uchanha kamba kilaguso cha kumulavila Mndewa Imulungu.
25 Abaho yamchinje ayo imwana ng'hondolo wa kimbigalo wa nhosa ya kulihila gehile. Mulava nhosa yasole idamu kidogo yambake munhu ayo yotendigwa yang'ale mna digwiti da mkono wa kudila, na mna didole ng'hulu da mkono wa kudila na mdidole ng'hulu da mgulu wa mkono wa kudila.
26 Mulava nhosa yagide mavuta kidogo mdiganza jake da mkono wa kumoso.
27 Abaho yammizile kwa kidole cha mkono wa kudila munhu ayo gago gamavuta geli mdiganza jake da mkono wa kumoso miyanza saba kuulongozi wa Mndewa Imulungu.
28 Mulava nhosa yambake mavuta munhu ayo mdigwiti da mkono wa kudila, na mna didole ng'hulu da mkono wa kudila na mdidole ng'hulu da mgulu wa mkono wa kudila. Yambake hanhu aho hayambakile idamu ya nhosa ya kulihila gehile.
29 Mavuta gasigale mumkono wake yambake munhu ayo mdipala, ili yamtendele loholo da nzambi kuulongozi wa Mndewa Imulungu.
30 Abaho mulava nhosa yasole imoja mna iwa huwa wabili hebu iwa njiwa wabili kamba munhu ayo viyadahile kugala.
31 Imoja kokuwa kwa nhosa ya kusegesa nzambi na iyagwe mbuli ya nhosa ya kusoma moto. Vivija yalave nhosa ya ndiya, na mulava nhosa yamtendele loholo da nzambi kuulongozi wa Mndewa Imulungu.
32 Gano gago malagizo mbuli ya munhu yeli na utamu wa dikulu yolemelwa kugala nhosa ya kumtenda yang'ale.”
Kimvuguya cha ng'anda
33 Mndewa Imulungu kamulongela Musa na Haluni,
34 “Mwahengila mwiisi ya Kanaani ayo iniwagwaa iwe yenu, niye notenda kimvuguya cha utamu wa dikulu choneke mna kiwambaza cha ng'anda imoja mna iisi yonda niwagwee iwe yenu.
35 Avo mwene ng'anda ayo yamulongele mulava nhosa kamba kimvuguya cha utamu wa dikulu choneka mng'anda yake.
36 Mulava nhosa yalagize vinhu vose vili mng'anda ayo vilavigwe kunze yang'hali hanasonga kuikagula ing'anda, ili kutenda vinhu avo vose sikuvifite. Abaho mulava nhosa yengile mng'anda ayo yaikagule.
37 Yakikagule goya kimvuguya acho, na kamba choneka mna ikiwambaza na kitenda madoa ga langi ya ukole hebu ndung'hu na kamba madoa gago gengila mna ikiwambaza,
38 baho mulava nhosa yalawe kunze na yaihinde ng'anda ayo kwa siku saba.
39 Siku da saba mulava nhosa yabwele yaikagule ng'anda ayo kabili. Kamba kimvuguya acho chenela mna kiwambaza,
40 yalagize gamabwe geli na ikimvuguya galavigwe gasigwe hanhu hafitile kunze ya dibuga.
41 Dikando da ing'anda ayo dikwatigwe na ditimbwisi jasigwe hanhu hafitile kunze ya dibuga.
42 Abaho wasole mabwe gayagwe wazenge hanhu aho na wakuluge dikando kabili.
43 “Kamba kimvuguya acho choneka kabili viwamambukize kugasegesa gamabwe na kukwata dikando na kukuluga kabili,
44 mulava nhosa yeze kuikagula. Kamba kimvuguya acho chenela mng'anda, baho acho chokuwa kimvuguya cha utamu na ng'anda ayo yokuwa ifita.
45 Ng'anda ayo ituligwe na mabwe gake na dikando na mizengo yake vigaligwe hanhu hafitile kunze ya dibuga.
46 Vivija munhu yoyose yonda yengile mng'anda ayo kipindi viihindigwe kokuwa kafita mbaka ichungulo.
47 Munhu yoyose yonda yawase hebu kudila mng'anda ayo yafuwe viwalo vake.
48 “Lakini kamba mulava nhosa yahaikagula ng'anda ayo na kona kamba ikimvuguya hakibwelile kabili mng'anda ayo viwakuluge dikando, baho yawalongele wanhu kamba ng'anda ayo ing'ala, kwavija ikimvuguya kisegela.
49 Ili kutenda ng'anda ayo ing'ale, mwene ng'anda yagale ndege wabili hamoja na kibimhi cha biki da mwelezi na sufi ndung'hu na bunho da hisopo.
50 Yamchinje ndege imoja mwiinongo ili na mazi ganogile ga nzasa.
51 Abaho yasole ikibimhi cha dibiki da mwelezi na dibunho da hisopo na isufi ndung'hu hamoja na ija indege iyagwe mgima na yavigele vose mwiidamu ya ija indege yachinjigwe. Abaho yaimize idamu mng'anda ayo miyanza saba.
52 Vino avo vonda yaitende ng'anda ayo ing'ale kwa idamu ya ndege, na mazi ganogile ga nzasa na ndege yeli mgima na ikibimhi cha biki da mwelezi na bunho da hisopo na sufi ndung'hu.
53 Ija indege yeli mgima yamulekese yachole mmigunda kunze ya dibuga. Vino avo vonda yailohole ing'anda ayo, nayo yokuwa ing'ala.
54 “Gano gago malagizo ga utamu wa dikulu,
55 na kimvuguya kili mviwambaza va ng'anda hebu minyela nyela ili mkiwalo,
56 pute hebu uvimbe hebu punye,
57 ili mujuwe kinhu gani kifitile na kinhu gani king'alile. Avo, gano gago malagizo ga ivitamu avo vose.”