18
Kuiwasa kugomesigwe
1 Mndewa Imulungu kamulongela Musa,
2 “Walongele vino wanhu wa Izilaeli, ‘Niye ayo Mndewa Imulungu wenu.
3 Sikumutende kamba viwotenda wanhu wa isi ya Misili kuko kumulawile, vivija sikumutende kamba viwotenda wanhu wa isi ya Kanaani kuko kuniwagala. Sikumukweleleze viwotenda hewo.
4 Mweye mugoge malagizo gangu na mukweleleze gaja goniwalongela, niye ayo Mndewa Imulungu wenu.
5 Gogeni malagizo gangu na gaja goniwalongela kwavija munhu yogagoga kokuwa mgima kubitila gago, niye ayo Mndewa Imulungu.
6 “ ‘Munhu yoyose sikuyamuwase ndugu yake wa usungu, niye ayo Mndewa Imulungu.
7 “ ‘Sikuumgele kinyala tatako kwa kumuwasa mamako, sikuumuwase mamako yakulelile.
8 “ ‘Sikuumuwase mwehe wa tatako, mbuli ayo yomgela kinyala tatako.
9 “ ‘Sikuumuwase lumbu jako, yawe mndele wa tatako hebu wa mamako, yawe kakulila mng'anda imoja na gweye hebu kakulila kunze.
10 “ ‘Sikuumuwase mzukulu wako, yawe mzukulu wako yaleligwe na mwanago wa kimbigalo hebu mzukulu wako yaleligwe na mwanago wa kitwanzi, mbuli ayo yokugela kinyala.
11 “ ‘Sikuumuwase mndele yaleligwe na mamako wa kuvikila, yasoligwe na tatako, mndele ayo lumbu jako.
12 “ ‘Sikuumuwase shangazi yako, kwavija ayo ni lumbu wa tatako.
13 “ ‘Sikuumuwase mamako mkulu hebu mamako mdodo, kwavija ayo ni ndugu wa mamako.
14 “ ‘Sikuumuwase mwehe wa tatako mkulu hebu mwehe wa tatako mdodo, kwavija ayo nayo vivija mamako.
15 “ ‘Sikuumuwase mwehe wa mwanago, kwavija ayo mkwe yako.
16 “ ‘Sikuumuwase mwehe wa mdodo wako hebu mkulu wako, kwavija ayo mulamu wako.
17 “ ‘Sikuumuwase mtwanzi yoyose na imwana hebu na wazukulu zake. Kwavija awo ndugu zake, wahatenda vivo kotenda gehile.
18 “ ‘Sikuumsole mkulu wa mwehe wako hebu mdodo wa mwehe wako, kipindi mwehe wako yang'hali mgima.
19 “ ‘Sikuumuwase mtwanzi mna ikipindi chake cha kutumika.
20 “ ‘Sikuumuwase mwehe wa miyago, wahatenda avo koifitiza mwenyego.
21 “ ‘Sikuumulave nhosa mwanago yoyose kwa imulungu yokemigwa Moleki, kwavija wahatenda vivo kodikudula twaga jangu niye Imulungu wako. Niye ayo Mndewa Imulungu.
22 “ ‘Sikuumuwase mbigalo miyago kamba viutenda kwa mtwanzi, mbuli ayo yonigevuza niye Imulungu.
23 “ ‘Sikuumuwase mnyama kwavija koifitiza mwenyego. Na mtwanzi sikuyaigale mwenyego kuwasigwa na mnyama kwavija mbuli ayo kilozo.
24 “ ‘Sikumuifitize kwa kutenda mbuli azo, kwavija mbuli azo zizo zowotenda wanhu wa isi zili kuulongozi wenu na niye nowawinga ili mukale mweye.
25 Isi yao ifitizigwa na niye niitagusa, nayo iwadeka wanhu okala mumo.
26 Lakini mweye na iwageni okala kumwenu gagogeni malagizo gangu na gaja goniwalongela na sikumutende mbuli kamba zizo.
27 Kwavija nzambi azo wazitenda wanhu wakalile mwiisi ayo, na hewo waifitiza isi ayo.
28 Avo mwahaifitiza isi ayo yowadeka kamba viiwadekile wanhu wakalile mumo.
29 “ ‘Munhu yoyose yotenda mbuli kamba azo kobaguligwa na wanhu zake.
30 Gogeni gaja ganiwalagize, sikumukweleleze gaja gawatendile wanhu wakalile mwiisi ayo mweye hamunakwiza, mwahatenda vivo moifitiza wenyego. Niye ayo Mndewa Imulungu wenu.’ ”