19
Malagizo gayagwe
1 Mndewa Imulungu kamulongela Musa,
2 “Walongele wanhu wose wa Izilaeli, ‘Molondigwa mung'ale kamba niye Mndewa Imulungu wenu vining'ala.
3 “ ‘Kila munhu yamtegeleze tatake na mamake na yagoge malagizo ga siku za kubwihila. Niye ayo Mndewa Imulungu wenu.
4 “ ‘Sikumundeke niye na kuvitambikila vinyago na sikumutende vinyago va imilungu ya zuma. Niye ayo Mndewa Imulungu wenu.
5 “ ‘Mwahamulavila Mndewa Imulungu nhosa za kugala kuilumba, mulave kamba viilondigwa ili zitogoligwe.
6 Nhosa ayo idigwe siku dijo hebu imitondo yake. Kinhu chochose chonda kisigale mbaka siku da kadatu kisomigwe moto.
7 Kamba nhosa ayo yodigwa mbaka siku da kadatu haitogoligwa bule.
8 Munhu yonda yaje nyama ayo kogaya kwa mbuli ayo kwavija kakifitiza kinhu king'alile kwa Mndewa Imulungu. Munhu ayo yabaguligwe na wanhu zake.
9 “ ‘Wahasenga ndiya mumgunda wako, sikuusenge mbaka mumgwazo wa umgunda na sikuubwele kukisogo kusalata vija visigale.
10 Sikuubwele kukisogo kusalata kila kinhu mumgunda wa mizabibu na sikuudondole zabibu zilagale hasi walekele wakiwa na wageni. Niye ayo Mndewa Imulungu wenu.
11 “ ‘Sikuwibe.
“ ‘Sikuumbunyike miyago.
“ ‘Sikuulonge uvizi.
12 “ ‘Sikuuiduwile kwa uvizi kwa twaga jangu, wahatenda vivo kodikudula twaga jangu. Niye ayo Mndewa Imulungu.
13 “ ‘Sikuumonele miyago hebu kumwibila.
“ ‘Fungu da kibaluwa wako sikudikale kumwako mbaka imitondo.
14 “ ‘Sikuumduwile mvugu hebu kumwikila gogo mnzila msuwameso, lakini unidumbe niye Imulungu wako, niye ayo Mndewa Imulungu.
15 “ ‘Wahawatagusa wanhu wataguse goya, sikuumnogele mkiwa hebu kumdumba munhu yeli na cheo. Lakini uwalamule kamba viilondigwa.
16 “ ‘Sikuwange mzing'anda za wanhu na kuwatenda wanhu wagombe kwa kuwalongela mbuli za uvizi.
“ ‘Sikuuwike ugima wa miyago mdizumozumo da ifa. Niye ayo Mndewa Imulungu.
17 “ ‘Sikuumwihile ndugu yako, lakini uilumbe na heyo ili sikuutende nzambi.
18 “ ‘Sikuulihe gehile hebu kuwa na mfundo na munhu yoyose mna iwanhu wako lakini umnogele miyago kamba viuinogela mwenyego. Niye ayo Mndewa Imulungu.
19 “ ‘Gagogeni malagizo gangu gano.
“ ‘Sikuutogole fugo yako ikweligwe na wanyama wa aina iyagwe.
“ ‘Sikuuhande mumgunda wako mbeyu za aina mbili.
“ ‘Sikuuvale kiwalo kitendigwe kwa nyuzi za aina mbili.
20 “ ‘Mbigalo yahawasa na mtwanzi mtumwa yang'hali hanagomboligwa na kalaviligwa vilama na mbigalo iyagwe, wanhu wawataguse wose wabili, lakini sikuwakomigwe kwavija mtwanzi ayo yang'hali hanalekeswa.
21 Mbigalo ayo yagale mdihema da mting'hano nhosa ya ng'hondolo mbigalo mbuli ya kulihila gehile, na nhosa ayo ilavigwe kwa Mndewa Imulungu.
22 Mulava nhosa yamtendele loholo da nzambi kwa ng'hondolo ayo kuulongozi wa Mndewa Imulungu, na nzambi yake yogeligwa kumgongo.
23 “ ‘Mwahavika mwiisi ya Kanaani na kuhanda mibiki ya matunda, matunda gago hamulondigwa kugaja kwa miyaka midatu.
24 Mwaka wa ikane matunda gago gokuwa gang'ala na mugalave kwa Mndewa Imulungu kamba nhosa ya kumgwaa nhogolwa.
25 Lakini mwaka wa tano modaha kugaja gamatunda, mwahatenda gano gose mibiki yenu ya matunda yolela matunda ng'hani. Niye ayo Mndewa Imulungu wenu.
26 “ ‘Sikumuje nyama yoyose kuno ing'hali na damu.
“ ‘Sikumulagule hebu kuwa wahawi.
27 “ ‘Sikumusenye bwenzi na sikumubee ndevu zenu.
28 “ ‘Sikumuichanje chanje mzing'huli zenu mbuli ya kumuyalalila munhu yafile hebu kwika kilaguso mzing'huli zenu. Niye ayo Mndewa Imulungu.
29 “ ‘Sikuumnange mndele wako kwa kumtenda mgoni, ili isi yose sikuimeme ugoni na kumema gehile.
30 “ ‘Gagogeni malagizo ga siku ya kubwihila na hadumbeni hanhu hong'ala. Niye ayo Mndewa Imulungu.
31 “ ‘Sikumuchole kwa wanhu olagula kwa mizimu hebu wahawi ili mulaguliligwe baho moifitiza. Niye ayo Mndewa Imulungu wenu.
32 “ ‘Wategeleze wanhu wavele na uwagwee ukulu. Unidumbe niye Imulungu wako, niye ayo Mndewa Imulungu.
33 “ ‘Munhu baki yaheza mwiisi yako sikuumtendele gehile.
34 Munhu baki ayo yakale kumwako kamba mwenekae na gweye umnogele kamba viuinogela mwenyego, kwavija hata gweye kukala munhu baki mwiisi ya Misili. Niye ayo Mndewa Imulungu wenu.
35 “ ‘Sikuuwabunyike wayago mna ivinhu vako va kupimila va utali na uzito na kumema.
36 Molondigwa mutumie mizani ilondigwa na vipimo vilondigwa. Niye ayo Mndewa Imulungu wenu niwalavile mwiisi ya Misili.
37 “ ‘Molondigwa mugagoge malagizo gangu gose na gaja goniwalongela. Niye ayo Mndewa Imulungu.’ ”