20
Kugaya kwa kuleka kugoga ga Imulungu
1 Mndewa Imulungu kamulongela Musa,
2 “Walongele vino wanhu wa Izilaeli, ‘Munhu yoyose mna iwanhu wa Izilaeli hebu munhu baki yokala kumwenu, yomulava nhosa mwanage kwa imulungu Moleki, munhu ayo yakomigwe. Wanhu wamkome kwa kumtowa mabwe.
3 Niye mwenyego nomgevuzikila munhu ayo na kumbagula na wanhu zake kwavija kamulava imoja wa wanage nhosa kwa imulungu Moleki na avo kahafitiza hanhu hong'ala na twaga jangu ding'ala.
4 Kamba wanhu wa aho omuleka munhu ayo na hawamkoma,
5 niye mwenyego nomgevuzikila munhu ayo na wanhu wa mng'anda mmwake. Nowabagula na wanhu zao heyo mwenyego hamoja na wose oleka kunitamanila niye na kumcholela imulungu Moleki.
6 “ ‘Kamba munhu yoyose yahawacholela walaguzi wa mizimu na wahawi na koleka kunitamanila niye, nomgevuzikila munhu ayo na nombagula na wanhu zake.
7 “ ‘Avo ilaveni kumwangu na muwe wanhu wang'alile kwavija niye ayo Mndewa Imulungu wenu.
8 Gogeni malagizo gangu, niye ayo Mndewa Imulungu niwatenda mweye mung'ale.
9 “ ‘Munhu yoyose yomduwila tatake hebu mamake yakomigwe. Kwavija kamduwila tatake hebu mamake avo ifa yake yokuwa mmakono gake mwenyego.
10 “ ‘Kamba mbigalo yahatenda ugoni na mwehe wa miyage, wose wabili wakomigwe.
11 “ ‘Mbigalo yahamuwasa imoja wa wehe wa tatake, kamgela kinyala tatake, wose wabili wakomigwe. Ifa ya mbigalo ayo na mtwanzi ayo yokuwa mmakono gao wenyego.
12 “ ‘Mbigalo yahamuwasa mwehe wa mwanage, wose wabili wakomigwe. Awo watenda kilozo avo ifa yao yokuwa mmakono gao wenyego.
13 “ ‘Kamba mbigalo yahamuwasa mbigalo miyage kamba vija mtwanzi, wose wabili wakomigwe, kwavija watenda nzambi, ifa yao yokuwa mmakono gao wenyego.
14 “ ‘Kamba mbigalo yahamsola mndele na mama munhu, mbuli ino iha ng'hani. Wose imbigalo na imndele na mamake wasomigwe moto, ili sikukuwe na nzambi hagati yenu.
15 “ ‘Kamba mbigalo yahamuwasa mnyama yakomigwe heyo hamoja na ayo imnyama.
16 “ ‘Mtwanzi yahamkwesela mnyama ili yawasigwe, wose wakomigwe, imnyama na imtwanzi. Ifa yao yokuwa mmakono gao wenyego.
17 “ ‘Kamba mbigalo yoyose yahamsola lumbu jake, mndele wa mamake hebu wa tatake, na mndele ayo katogola kusoligwa na mbigalo ayo yeli lumbu jake, mbuli ayo kilozo, avo wabaguligwe na wanhu wao kwavija watenda mbuli igela kinyala. Ayo imbigalo kogaya kwa kutenda mbuli ayo.
18 “ ‘Kamba mbigalo yahamuwasa mtwanzi kipindi cha kutumika kwake, wose wabili wabaguligwe, kwavija ayo imbigalo kakwasa ukutumika kwa mtwanzi na ayo imtwanzi kagubula kutumika kwake.
19 “ ‘Sikuumuwase mamako mkulu hebu mamako mdodo na sikuumuwase shangazi yako, kwavija wao ni ndugu zako wa usungu, wanhu wose otenda vivo ogaya kwa nzambi zao.
20 “ ‘Kamba munhu yahamuwasa mwehe wa tatake mkulu hebu mdodo, komgela kinyala tatake mkulu hebu mdodo, wose wabili ogaya kwa nzambi zao na wose wofa bila wana.
21 “ ‘Mbigalo yahamuwasa mwehe wa ndugu yake, komgela kinyala ndugu yake, mbuli ayo ifita, wose wabili wofa bila wana.
22 “ ‘Gagogeni malagizo gangu gose na gaja ganiwalongele, buleavo ako kuniwagala mna iisi, isi ayo yowadeka.
23 Sikumukweleleza mila za wanhu wa isi ayo, waniwawingile mgameso genu, kwavija watenda mbuli azo zose na niye nizihila mbuli azo.
24 Lakini niwalongela mweye, moihazi isi yao, nowagwaa mweye kamba uhazi wenu, isi imemile maziwa na uki, niye ayo Mndewa Imulungu wenu niwabagule mweye na wanhu wa isi ziyagwe ili muwe wanhu zangu.
25 “ ‘Avo mujuwe kubagula, mnyama yafitile na mnyama yang'alile, ndege yafitile na ndege yang'alile. Sikumuifitize kwa kukwasa mnyama hebu ndege hebu chochose kitambala mwiisi kiniwalongele kamba kifita.
26 Kwavija niye Mndewa Imulungu wenu ning'ala, niye niwabagula mweye mna wanhu wa isi ziyagwe ili muwe wanhu zangu, avo muwe wanhu ong'ala.
27 “ ‘Mbigalo hebu mtwanzi yoyose yolagula hebu muhawi yakomigwe kwa mabwe. Ifa yao yokuwa mmakono gao wenyego.’ ”