2
Nhosa za ndiya
1 “ ‘Munhu yogala ndiya kwa Mndewa Imulungu kamba nhosa, tanhu yaiduge iwe usage, yaugele mavuta ga mizeituni na ubani.
2 Abaho yawagalile iwalava nhosa weli ulelo wa Haluni, imoja wao yadehe ganza dimoja da usage awo uli na mavuta hamoja na ubani, vose yavisome moto muupango wa kulavila nhosa, kamba kinhu cha kukumbuka kamba ndiya ayo yose ilavigwa kwa Mndewa Imulungu, nhosa ayo ya kusoma moto yolava mnung'ho umnogeza Mndewa Imulungu.
3 Usage usigale wa nhosa ayo okuwa wa walava nhosa, nhosa ayo ing'ala ng'hani kwavija ilavigwa kwa Mndewa Imulungu kwa moto.
4 “ ‘Kamba munhu komgalila Mndewa Imulungu gate jokigwe kamba nhosa, gate dijo ditendigwe kwa usage ulibule midundulu na utibwilizigwe na mavuta na sikuugeligwe hamila, hebu vigate visisili vitendigwe bila kugeligwa hamila na vibakigwe mavuta.
5 “ ‘Kamba munhu kogala gate jokigwe mkikalango kamba nhosa, gate dijo ditendigwe kwa usage ulibule midundulu na utibwilizigwe na mavuta, lakini sikuugeligwe hamila.
6 Magate gago gabenigwe benigwe na gagidiligwe mavuta, ayo iyo nhosa ya ndiya.
7 “ ‘Kamba kogala magate gatelekigwe mwiinongo kamba nhosa, magate gago gawe ga usage ulibule midundulu na ugeligwe mavuta.
8 Gala ndiya itendigwe kwa vinhu avo kuulongozi wa Mndewa Imulungu kamba nhosa, wagalile walava nhosa na hewo ozigala muupango wa kulavila nhosa.
9 Mulava nhosa kosola hanhu ha ndiya ayo kamba kinhu cha kukumbuka kamba ndiya ayo yose ilavigwa kwa Mndewa Imulungu na koisoma muupango wa nhosa. Ndiya ayo yolava mnung'ho umnogeza Mndewa Imulungu.
10 Usage usigale wa nhosa ayo okuwa wa walava nhosa, nhosa ayo ing'ala ng'hani kwavija ilavigwa kwa Mndewa Imulungu kwa moto.
11 “ ‘Ndiya yoyose imumgalila Mndewa Imulungu kamba nhosa sikuigeligwe hamila, kwavija havilondigwa kusoma hamila hebu uki mwiinhosa ilavigwa kwa Mndewa Imulungu kwa moto.
12 Kodaha kumgalila Mndewa Imulungu ndiya ya ichanduso yuusengile, lakini sikuilavigwe muupango wa kulavila nhosa kamba nhosa imnung'hila goya Mndewa Imulungu.
13 Ugele mkele mzinhosa zako zose za ndiya, kwavija mkele olagusa lagano diyatendile Imulungu na mweye. Ugele mkele mzinhosa zako zose.
14 “ ‘Kamba komgalila Mndewa Imulungu nhosa ya ndiya ya ichanduso yuusengile, ugale kuno ikanzingigwa, hebu idugigwe.
15 Gela mavuta na ubani, ayo iyo nhosa ya ndiya.
16 Mulava nhosa kosoma hanhu ha ndiya ayo idugigwe na gamavuta hamoja na ubani wose, kamba kinhu cha kukumbuka kamba ndiya ayo yose ilavigwa kwa Mndewa Imulungu. Ndiya ayo ilavigwa kwa Mndewa Imulungu kwa moto.