23
Nyimwilinyimwili za dini
(Kupetigwa 28:16-31; 29:1-40)
1 Mndewa Imulungu kamulongela Musa,
2 “Walongele vino wanhu wa Izilaeli, ‘Zino azo nyimwilinyimwili ziyasagule Mndewa Imulungu, mweye molondigwa muzijuwe kamba zing'ala.
3 “ ‘Mokuwa na siku sita za kusang'hana, lakini siku ya saba yokuwa siku ya kubwihila. Mwiisiku ayo sikumusang'hane, lakini muiting'hane kwa kutambika. Siku ayo yokuwa siku ya kubwihila ya Mndewa Imulungu, isi yoyose yonda mukale.
4 “ ‘Zino azo siku za nyimwilinyimwili za Mndewa Imulungu, muiting'hane kamba viilondigwa mna zisiku zino zing'ala.
5 Ichungulo ya siku ya longo na nne ya mwezi wa ichanduso musonge kudeng'helela nyimwilinyimwili ya Pasaka mbuli ya Mndewa Imulungu.
6 Mwiisiku ya longo na tano ya mwezi awo musonge kudeng'helela nyimwilinyimwili ya magate hagageligwe hamila, avo kwa kipindi cha siku saba muje magate hagageligwe hamila.
7 Mwiisiku ya ichanduso ya siku azo saba sikumusang'hane, lakini muiting'hane kwa kutambika.
8 Kwa kipindi cha siku saba mmulavile nhosa za kusoma moto Mndewa Imulungu na mwiisiku ya saba muiting'hane hamoja kumtambikila na sikumusang'hane.’ ”
9 Mndewa Imulungu kamulongela Musa,
10 “Walongele wanhu wa Izilaeli, ‘Kamba mwahengila mwiisi yonda niwagwee na mwahasenga, mgalileni mulava nhosa gaja gaichanduso kusengigwa.
11 Na imulava nhosa yavinule uchanha kamba kilaguso cha kumulavila Mndewa Imulungu ili gatogoligwe mbuli yenu, mulava nhosa yagalave imitondo yake vonda imale siku ya kubwihila.
12 Mwiisiku ayo yonda mvinule uchanha kamba kilaguso cha kumulavila Mndewa Imulungu vivija mmulavile nhosa ya kusoma moto ya mwana ng'hondolo wa kimbigalo wa mwaka umoja yelibule kilema chochose.
13 Vivija mmulavile nhosa ya ndiya ya usage unogile mhishi imoja utibwilizigwe na mavuta, mmulavile Mndewa Imulungu kwa moto, na mnung'ho wake omnogeza. Vivija mmulavile divai nyhupa imoja kamba nhosa ya king'waji.
14 Kipindi mung'hali hamunamgalila nhosa azo Mndewa Imulungu, sikumuje gate jojose hebu kinhu kikanzingigwe hebu kinhu chochose kisengigwe sambi. Dino dijo lagizo jake kumwenu na kwa ulelo wenu wose, kokose konda mukale.
15 “ ‘Kulawa siku ayo ya kubwihila, siku imumgalile gaja gaichanduso kusengigwa peteni mbaka gavike mawiki saba.
16 Mna isiku ya malongo matano, imitondo yake ya siku ya kubwihila ya saba, mmulavile Mndewa Imulungu nhosa ya ndiya ya sambi.
17 Kila ng'anda ilave magate mabili ili genuligwe uchanha kamba kilaguso cha kumulavila Mndewa Imulungu. Kila gate ditendigwe kwa mhishi imoja ya usage unogile na ugeligwe hamila, abaho mmulavile Mndewa Imulungu kamba nhosa ya gaja gasengigwe ichanduso.
18 Na mulave hamoja na gago gamagate wana ng'hondolo saba wa mwaka umoja welibule kilema chochose na bofu da kimbigalo da ng'ombe na ng'hondolo wa kimbigalo wabili. Wanyama awo okuwa nhosa ya kusoma moto hamoja na nhosa ya ndiya na nhosa ya king'waji. Mnung'ho wa nhosa azo omnogeza Mndewa Imulungu.
19 Vivija mmulavile mbuzi imoja mbigalo kamba nhosa ya kusegesa nzambi, na mulave wana ng'hondolo wabili wa kimbigalo weli na mwaka umoja kamba nhosa ya kugala kuilumba.
20 Mulava nhosa yawenule uchanha awo iwang'hondolo wabili kamba kilaguso cha kumulavila Mndewa Imulungu hamoja na gamagate ga ndiya ya ichanduso kusengigwa. Nhosa azo zing'ala kwa Mndewa Imulungu na zokuwa za iwalava nhosa waiyeka.
21 Siku dijo walongele wanhu waiting'hane kwa mting'hano ung'alile na sikumusang'hane, dino dokuwa lagizo da siku zose kwa ulelo wenu wose kokose konda mukale.
22 “ ‘Wahasenga mumgunda wako, sikuusenge mbaka kumgwazo wa mgunda wako hebu kubwela kukisogo kusalata vija visigale, walekele wakiwa na wanhu baki, niye ayo Mndewa Imulungu wako.’ ”
23 Mndewa Imulungu kamulongela Musa,
24 “Walongele wanhu wa Izilaeli, ‘Siku ya ichanduso ya mwezi wa saba muhumule, ayo iwe siku ya kukumbuka kuno motowa mhalati na wanhu wose muiting'hane na kumtambikila Mndewa.
25 Sikumutende sang'hano yoyose, lakini mmulavile Mndewa Imulungu nhosa ya kusoma moto.’ ”
26 Mndewa Imulungu kamulongela Musa,
27 “Siku ya longo ya mwezi awo yokuwa siku ya kulohola nzambi zenu, siku ayo yokuwa siku ya mting'hano ung'alile na mufunge kuja na mmulavile Mndewa Imulungu nhosa ya kusoma moto.
28 Sikumutende sang'hano yoyose, kwavija siku ayo yokuwa siku ya kulohola nzambi, ili nzambi zenu zisegesigwe kuulongozi wa Mndewa Imulungu.
29 Munhu yoyose yoleka kufunga kuja siku ayo, yabaguligwe na wanhu wa Izilaeli.
30 Munhu yoyose yonda yasang'hane siku ayo nomkoma.
31 Sikumusang'hane sang'hano yoyose. Lagizo dino dokuwa kwa ulelo wenu wose, kokose konda mukale.
32 Siku ayo yokuwa siku ya kubwihila na molondigwa mufunge kuja, kusongela ichungulo ya siku ya tisa ya mwezi awo mbaka ichungulo ya siku ya longo. Molondigwa muigoge siku ya kubwihila.”
33 Mndewa Imulungu kamulongela Musa,
34 “Walongele wanhu wa Izilaeli, ‘Mna isiku ya longo na tano ya mwezi wa saba, mumtendele Mndewa Imulungu nyimwilinyimwili ya vibanda na yokuwa kwa siku saba.
35 Siku ya ichanduso mutende mting'hano ung'alile na sikumutende sang'hano yoyose.
36 Kwa siku saba mmulavile Mndewa Imulungu nhosa zilavagwa kwa moto, siku ya nane mutende mting'hano ung'alile na mmulavile Mndewa Imulungu nhosa ilavagwa kwa moto. Mting'hano awo ung'ala avo sikumusang'hane sang'hano yoyose.
37 “ ‘Nyimwilinyimwili azo, zizo ziyasagule Mndewa Imulungu, na mutende mting'hano ung'alile na mmulavile Mndewa Imulungu nhosa zilavagwa kwa moto zili nhosa za kusoma moto na nhosa za ndiya na nhosa za king'waji, kila siku kamba viilondigwa.
38 Vivija mulave zija zinhosa zimmulavilaga Mndewa Imulungu mzisiku za kubwihila na vivija nhunza na kija kimulongile na nhosa zimulonda wenyego kumulavila Mndewa Imulungu.
39 “ ‘Mwahamambukiza kusenga mutende nyimwilinyimwili kwa kipindi cha siku saba, kusongela siku ya longo na tano ya mwezi wa saba. Siku ya ichanduso yokuwa siku ya kubwihila na hata siku ya nane.
40 Siku ya ichanduso mubawe matunda ganogile kulawa mmibiki yenu, na mubene mibunho ya mitende, na mibunho izukile mijani mingi na mibiki ikota kumgwazo wa lwanda, na mumtendele Mndewa Imulungu wenu nyimwilinyimwili kwa siku saba.
41 Kila mwaka mumtendele Mndewa Imulungu nyimwilinyimwili ayo kwa siku saba. Lagizo dino mudigoge kwa ulelo wenu wose. Mutende nyimwilinyimwili ayo mwezi wa saba.
42 Mukale mvibanda kwa siku saba, wanhu wose waleleke Izilaeli wakale mvibanda,
43 ili ulelo wenu wajuwe kamba viyawalavile wanhu wa Izilaeli mwiisi ya Misili, kawatenda wakale mvibanda. Niye ayo Mndewa Imulungu wenu.’ ”
44 Avo Musa kawalongela wanhu wa Izilaeli nyimwilinyimwili azo ziyasagule Mndewa Imulungu.