24
Mavuta ga taa na magate
(Kulawa 27:20-21)
1 Mndewa Imulungu kamulongela Musa,
2 “Walongele wanhu wa Izilaeli wakugalile mavuta ganogile ga mizeituni mbuli ya taa ili ikwake siku zose.
3 Haluni yaike taa ayo mdihema da mting'hano kunze ya panziya da sanduku da lagano, ili ikwake kuulongozi wa Mndewa Imulungu siku zose, kusongela ichungulo mbaka imitondo. Lagizo dino mudigoge kwa ulelo wenu wose siku zose.
4 Yazike taa azo hana ikingolobweda cha zahabu inogile, kili kuulongozi wa Mndewa Imulungu siku zose.
5 “Soleni usage unogile, mutende magate longo na mabili, kila gate ditendigwe kwa mhishi imoja ya usage.
6 Magate gago gapangigwe misafa mibili mwiimeza ya zahabu inogile, kila msafa magate sita.
7 Kila msafa ugeligwe ubani ung'alile ili kulagusa kamba magate gago galavigwa kwa moto kwa Mndewa Imulungu.
8 Kila siku ya kubwihila magate gago gapangigwe mbuli ya wanhu wa Izilaeli kuulongozi wa Mndewa Imulungu kamba lagano da siku zose.
9 Haluni yaiyeka na ulelo wake awo olondigwa kugaja magate gago kwavija gang'ala na dijo fungu jao mna zinhosa zilavagwa kwa moto kwa Mndewa Imulungu.”
Nhaguso ilondigwa
10 Siku dimoja kulawilila ndwagi mwiing'hambi, Mwiizilaeli imoja na mbwanga imoja mamake kakala Mwiizilaeli lakini tatake kakala Mmisili.
11 Mbwanga ayo mamake kakemigwa Shelomiti biti Dibili kulawa kabila da Dani, mbwanga ayo kadikudula twaga da Mndewa Imulungu. Avo wamgala kwa Musa,
12 wamgodeka mbaka wajuwe viyolonda Mndewa Imulungu mbwanga ayo yatendigwe.
13 Abaho Mndewa Imulungu kamulongela Musa,
14 “Msegeseni mbwanga ayo yadikudule twaga da Mndewa Imulungu, mumgale kunze ya ing'hambi. Wanhu wose wamuhulike viyodikudula ditwaga da Mndewa Imulungu weke makono gao kudipala jake, abaho wanhu wose wa Izilaeli wamtowe mabwe.
15 Abaho walongele wanhu wa Izilaeli, ‘Munhu yoyose yomkudula Imulungu wake, koipapa mwenyego nzambi yake.
16 Munhu yoyose yodikudula twaga da Mndewa Imulungu, yakomigwe. Iwanhu wose wa Izilaeli wamtowe mabwe, yawe munhu baki hebu mwenekae kolondigwa yakomigwe.
17 “ ‘Munhu yoyose yomkoma munhu, na heyo yakomigwe.
18 Munhu yoyose yomkoma mnyama wa miyage, yalihe ugima kwa ugima.
19 Munhu yoyose yomulumiza miyage, na heyo yalumizwe vivo viyamulumize miyage.
20 Munhu yahambena miyage na heyo yabenigwe, siso kwa siso, zino kwa zino, munhu yahamulumiza miyage na heyo yalumizwe.
21 Munhu yomkoma mnyama wa miyage yalihe, lakini munhu yomkoma munhu na heyo yakomigwe.
22 Molondigwa muwe na malagizo gagano, kwa munhu baki hebu kwa mwenekae. Niye ayo Mndewa Imulungu wenu.’ ”
23 Avo, Musa kawalongela wanhu wa Izilaeli gago gose. Abaho wamsola mbwanga ayo yamkudule Mndewa Imulungu wamgala kunze ya ing'hambi na wamtowa mabwe. Wanhu wa Izilaeli watenda kamba Mndewa Imulungu viyamulagize Musa.