26
Kumweda kwa kugagoga malagizo ga Imulungu
(Kumbukumbu 7:12-24; 28:1-14)
1 “ ‘Sikumuitendele vinyago, na sikumusimike vinyago vao hebu mabwe gao gang'alile mwiisi yenu na kuvitambikila. Niye ayo Mndewa Imulungu wenu.
2 Gogeni malagizo gangu ga siku ya kubwihila, na muhadumbe hanhu hangu hong'ala. Niye ayo Mndewa Imulungu wenu.
3 “ ‘Kamba mwahategeleza gaja goniwalongela na kugoga malagizo gangu,
4 nowagalila mvula mna ikipindi kinogile na migunda yenu yolela ndiya nyingi na mibiki ili mmigunda yenu yolela ng'hani.
5 Vija vihandigwe volela ng'hani na mogendelela kusenga mna umsimu wa kubawa zabibu, na mogendelela kubawa zabibu mna umsimu wa kuhanda mbeyu. Mokuwa na kila kinhu chakuja, na mokala goya mwiisi yenu.
6 “ ‘Nowatenda mukale goya mwiisi mbaka modaha kuwasa bila kudumba chochose. Nowasegesa wanyama wakali mna iisi na kokuwa kuduhu ng'hondo mwiisi yenu.
7 Mowawinga wanhu owehila na mowakoma kwa misime.
8 Wanhu watano owawinga wanhu owehila gana dimoja na wanhu gana dimoja kumwenu owawinga wanhu elufu longo. Wanhu owehila obanangigwa mgameso genu kwa misime.
9 Nowatendela ganogile na kuwatenda mupate wana wengi na mokongezeka, na niye noditenda goya lagano jangu na mweye.
10 Mna umsimu wa kusenga mokuwa mung'hali moja vija vimusengile miyaka ibitile. Vivija movisegesa vija vili mmakanho genu ili mupate hanhu ha kwika vija vimusenga sambi.
11 Niye nokwika kae yangu hamoja na mweye, na siwaleka bule.
12 Nokala na mweye, na nokuwa Imulungu wenu na mokuwa wanhu zangu.
13 Niye na Mndewa Imulungu wenu, niwalavile mwiisi ya Misili ili sikumuwe watumwa wa Wamisili, niye nikibena kinhu kifungigwe msingo zenu ili mugende kuno mwima wima.
Makungu mbuli ya kuleka kumtegeleza Imulungu
(Kumbukumbu 28:15-68)
14 “ ‘Lakini kamba hamtegeleza na kugoga gano goniwalagiza,
15 kamba mwahagalema malagizo gangu, na kugehila gaja gonilonga na mwahabena lagano jangu,
16 avo na niye nowatendela vino, nowagalila magazo ga kusinhukiza na nowagwaa utamu wa kifuwa kikulu, na nowagalila homa yonda iwatende munyolile, mogaya bule kuhanda mbeyu, kwavija wanhu owehila awo onda waje.
17 Niye nowahindusila kisogo, na mweye motoigwa na wanhu owehila, motawaligwa na wanhu owehila. Mosinhusigwa na kukimbila hamoja kuduhu munhu yowawinga.
18 “ ‘Kamba mokuwa mung'hali mogendelela kutenda gehile nowakoboza miyanza saba ng'hani kubanza aho haichanduso mbuli ya nzambi zenu.
19 Nowakoboza kwa udala wa mizoyo yenu na noutenda ulanga uwe mzelu, na noitenda isi iwe ndala mbwee kamba dibwe.
20 Mogaya bule, kuhanda mmigunda yenu kwavija honda mupate ndiya yoyose na isi honda ilele bule matunda.
21 “ ‘Mwahagendelela kunilema na molema kunitegeleza nokongeza kuwakoboza miyanza saba ng'hani mbuli ya nzambi zenu.
22 Nowagalila wanyama wakali na hewo owakomela wanenu na woja fugo yenu na owatenda muhunguke na nzila zenu zovulala kuluwala.
23 “ ‘Na mwahagendelela kulema kugoga malagizo gangu hamoja niwakoboza kwa gago gose gehile,
24 baho niye nowagevuzikila na nowakoboza miyanza saba ng'hani mbuli ya nzambi zenu.
25 Nowagalila ng'hondo kuliha lagano jangu dimubenile. Mweye mokimbilila mna gamabuga genu, lakini nowagalila mitamu ihile na nowagela mmakono ga wanhu owehila.
26 Noihunguza ndiya yenu mbaka watwanzi longo okoka magate mna ikivu kimoja. Owagwelela magate kwa kupima na hata mwahaja mokuwa mung'hali na nzala.
27 “ ‘Mwahagendelela kulema malagizo gangu hamoja na gago gose gehile ganiwagwee,
28 nowakoboza vihile ng'hani, niye mwenyego nowakoboza miyanza saba ng'hani kwa nzambi zenu.
29 Na mweye moja nyama za wanenu wa kimbigalo na wa kitwanzi.
30 Nohananga hanhu homutambikila ako kuvigongo, noubena upango wenu wa kulavila nhosa na ubani, noyasa mitufi yenu mna ivinyago vimtambikila, niye nowaleka.
31 Nogananga mabuga genu na hanhu henu hong'ala nohatenda vihame na nozilema nhosa zenu zimundavila.
32 Noinanga isi yenu mbaka wanhu owehila wakalile aho wakanganye.
33 Nowapwililisa mziisi ziyagwe na mokomigwa kwa misime, isi yenu yokuwa vihame na mabuga genu gonangika.
34 Baho isi yobwihila kamba siku ya kubwihila kwa miyaka heleketwaa, kipindi acho mweye mwa mna ziisi za wanhu owehila. Isi yobwihila goya mzisiku za kubwihila.
35 Kwa miyaka heleketwaa isi yokuwa yobwihila kwavija haibwihile kipindi vimukalile mumo.
36 “ ‘Na wayagwe onda wasigale, nowatenda wadumbe kuko mziisi za wanhu owehila na okimbila hata lusanze luhembelusigwa na beho. Okimbila kamba munhu yokimbila ng'hondo. Okimbila na kugwa hata kamba kuduhu munhu yowawinga.
37 Oigwila wenyego chaka chaka kamba munhu yokimbila ng'hondo hata kamba kuduhu munhu yomuwinga. Honda mudahe kuitowa na wanhu owehila.
38 Mofila mziisi ziyagwe na mna ziisi za wanhu owehila mozikigwa.
39 Wayagwe onda wasigale mna ziisi za wanhu owehila onyolila na omala kwa nzambi zao, na mbuli ya nzambi za wahenga zao.
40 “ ‘Lakini kamba wahazitambula nzambi zao na nzambi za wahenga zao na gehile gawanhendile niye na kundema,
41 mbaka niye niitowa nao na niwagala mna iisi ya wanhu owehila na kamba wahatogola kamba watenda nzambi na wahatogola kutagusigwa na kuiyona hawafaya,
42 baho niye nodikumbuka lagano jangu diniilagane na Abulahamu na Isaka na Yakobo na noikumbuka isi iniwalongele nowagwaa.
43 Kipindi viwokala kunze ya isi yao, isi yodeng'helela kubwihila kamba siku za kubwihila kwavija yokala vihame. Kipindi acho hewo olihigwa kwa nzambi zao za kuleka kugoga malagizo gangu na kugehila.
44 Lakini kwa gago gose wahakala mziisi za wanhu owehila, niye siwasa hebu kuwehila na kuwabananga wose na kudilema lagano jangu. Niye ayo Mndewa Imulungu.
45 Bule, mbuli yao nodikumbuka lagano jangu diniilagane na wahenga zao, waniwalavile mwiisi ya Misili, kuno wanhu wa isi ziyagwe olola, ili niwe Imulungu wao. Niye ayo Mndewa Imulungu.’ ”
46 Gano gago gayalongile Mndewa Imulungu, na gamalagizo na mafundizo ga Imulungu gayawagwelele wanhu wa Izilaeli kuko kulugongo lwa Sinai kubitila Musa.